ޕީޕީއެމް/ޕީއެންސީގެ ވެރިކަމެއްގައި ބަދަލުހިފުމެއް ނޯންނާނެ ކަމަށާއި އަމަލުކުރާނީ އިންސާފުން ކަމަށް އެކޯލިޝަނުގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ސެޕްޓެމްބަރު ނުވައެއް ގައި ބާއްވާ ރިޔާސީ އިންތިހާބަށް ކެމްޕޭން ކުރަން ޕީޕީއެމް/ޕީއެންސީ ކޯލިޝަނުން މިއަދު ހއ. ކެލާގައި ބޭއްވި ޖަލްސާގައި މުއިއްޒު ވިދާޅުވީ ވެރިކަމެއް ކުރާނީ ވަކި ޕާޓީއެއްގެ ބަޔަކަށް ނޫން ކަމަށާއި ސިޔާސީ ފިކުރާ ގުޅުވައިގެން ރައްޔިތުންގެ މެދުގައި ތަފާތު ނުކުރައްވާނެ ކަމަށެވެ.
"ހަމަޖެހުން މިގައުމަށް އަންނަން ޖެހޭ. އަޅުގަނޑުމެންނަކީ ބަދަލުހިފުމުގެ ރޫހު ދޫކޮށްލާ ބަޔަކަށް ވާން ޖެހޭ. އެހެން ނަމަވެސް ކަންކަމުގައި އިންސާފާއި އަދާލަތު، އަދުލުވެރިކަން އަޅުގަނޑުމެންގެ ތެރޭގައި އޮންނަން ޖެހޭނެ. އަދުލުވެރިކަމާ އިންސާފާ އެކީގައި އަޅުގަނޑުމެންގެ ތެރޭގައި ކަންކަން ގާއިމްވެގެން ދާނީ،" މުއިއްޒު ވިދާޅުވި އެވެ.
މުއިއްޒު މިއަދު މިމޭރުމުން ވާހަކަ ދެއްކެވީ ޕީޕީއެމް/ޕީއެންސީގެ ވެރިކަމެއްގައި މިހާރުގެ ރައީސް އިބްރާހީމް މުހައްމަދު ސޯލިހު ހުންނަވަން ޖެހިވަޑައިގަންނަވާނީ ޖަލުގައި ކަމަށް ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވުމުން، އެ ވާހަަކައަށް ފާޑުކިއުންތައް އަމާޒުވެފައި ވަނިކޮށެވެ.
މުއިއްޒު މިއަދު ދެއްކެވި ވާހަކައިގައި އަބްދުއްރަހީމްގެ އެ ވާހަކައަށް ސީދާ ގޮތެއްގައި ދެކޮޅެއް ނުހައްދަވަ އެވެ. އެހެން ނަމަވެސް ވިދާޅުވީ ރާއްޖޭގައި ގާއިމްވެފައި އޮންނަން ޖެހޭނީ އަދުލުވެރިކަމާއި އިންސާފު ކަމަށާއި "އަނިޔާވެރިކަން ނިމުމަކަށް އަންނަން ޖެހޭ" ކަމަށެވެ.
ޕީޕީއެމް/ޕީއެންސީ ކޯލިޝަނުގެ ވެރިކަމެއްގައި ހުރިހާ ރައްޔިތުން ހަމަހަމަވާނެ ކަމަށް ވެސް އޭނާ ވިދާޅުވި އެވެ. އެ ކޯލިޝަނުގެ ވެރިކަމެއްގައި ރައްޔިތުންގެ އަޑު އަހާނެ ކަމަށާއި އަޑު އަހައި އެކަންކަމަށް ސަމާލުކަން ދޭނެ ކަމަށް ވެސް ވިދާޅުވި އެވެ.
"ހުރިހާ ރައްޔިތުން ހަމަހަމަވާނެ. ހުރިހާ ރައްޔިތުންނަށް ހިދުމަތްކުރާނީ އުފަލާ އެކީގައި، ހިތްހަމަޖެހުމާ އެކީގައި. އިހުލާސްތެރިކަމާ އެކީގައި،" މުއިއްޒު ވިދާޅުވި އެވެ.
އިދިކޮޅު ކޯލިޝަނުގެ ރިޔާސީ ޓިކެޓް މުއިއްޒަށް ލިބިވަޑައިގެންނެވީ އެކޯލިޝަނުން ފުރަތަމަ ކަނޑައެޅި ރިޔާސީ ކެންޑިޑޭޓް، ކުރީގެ ރައީސް އަބްދުﷲ ޔާމީނަށް އިއްވާފައިވާ 11 އަހަރުގެ ޖަލުހުމުމެއް އޮތުމުން، އެމަނިކުފާނަށް ފުރުސަތު ގެއްލުމުންނެވެ. މުއިއްޒުގެ އިންތިހާބީ އެއް ވައުދަކީ ޔާމީނު މިނިވަން ކުރުމެވެ.
