އިދިކޮޅު ރިޔާސީ ކެންޑިޑޭޓުން ކެމްޕެއިން ކުރައްވާ ގޮތާއި އެބޭފުޅުންގެ ސިޔާސަތުތަކަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިރޭ ވަރަށް ބޮޑަށް ފާޑުވިދާޅުވެއްޖެ އެވެ.
ނ. މަނަދޫގައި ވެރިކަން ކުރާ އެމްޑީޕީން ބޭއްވި ޖަލްސާއެއްގައި ވާހަކަ ދައްކަވަމުން ރައީސް ވިދާޅުވީ، އެއް ބަޔަކު ކެމްޕެއިން ކުރަނީ ޒާތީ ގޮތުން ކަމަށާއި އަނެއް ބަޔަކު މިހާރު ކަން ހިނގާ ގޮތް ވައުދުތަކުގެ ގޮތުގައި ހުށަހަޅާއިރު ހިނގަމުންދާ މަސައްކަތް ވެސް ކުރާނެ ވާހަކަ ކެންޑިޑޑޭޓަކު ބުނެފައިވާ ކަމަށެވެ.
"އެއްބަޔަކު ކުރަމުންދާ ކަމަކީ ޒާތީ ގޮތުން ވާހަކަ ދެއްކުން. އެ ނޫން އެއްވެސް ކަމެއް ނޫން. ތިމާ ހެނދުނު ހޭލާއިރު ސިކުނޑީގައި ހުރި އެއްޗެއް އެވަގުތަކު ބުނެލަނީ. ހަވީރުވެގެން އަންނައިރު އެ ބަދަލުވޭ،" ރައީސް ސޯލިހު ވިދާޅުވި އެވެ. "ހުވަފެނުފައި ފެންނަ ކަންކަން ހަގީގަތަކަށް ހަދަންޏާ ފުރަތަމަ ޖެހޭނީ ނިދިން ހޭލަން."
ރައީސް ވަނީ ވަކިވަކިން ބައެއް ކެންޑިޑޭޓުންގެ ވައުދުތަކަށް އަލި އަޅުއްވާލައި އެކަންކަމަށް ފާޑު ވިދާޅުވެފަ އެވެ. އެގޮތުން ޑިމޮކްރެޓްސްގެ ފަސޭހަ ވިޔަފާރި ޕޮލިސީއަށް ވެސް އެމަނިކުފާނު ފާޑުވިދާޅުވި އެވެ.
"ދެން އަނެއް ބަޔަކު ދައްކާ ވާހަކައަކީ މިހާރު ވެސް ސަރުކާރުން ކުރަމުން އަންނަ ކަންކަމުގެ ވާހަކަ. ތިމަންނާމެންގެ ވެރިކަމެއްގައި އެސްއެމްއީ ލޯނު އެއްވެސް މޯގޭޖެއް ނެތި، ރަހުނެއް ނެތި ދޫކުރާނަމޭ. ބަލަ މިހާރު ވެސް އެކަން ކުރަމުންދާ ގޮތޭ އެއީ،" އެމަނިކުފާނު ވިދާޅުވި އެވެ.
މިއަދު ކެމްޕެއިން ފެއްޓެވި މައި އިދިކޮޅު ޕާޓީ ޕީޕީއެމްގެ ކެންޑިޑޭޓު ޑރ. މުހައްމަދު މުއިއްޒު މިއަދު ހާމަކުރެއްވި ބައެއް ސިޔާސަތުތަކަށް ވެސް ރައީސް ފާޑުވިދާޅުވި އެވެ.
"ތިމަންނަގެ އަމާޒަކީ އާބާދީ ބޮޑު ރަށްރަށަށް، މީހުން ގިނަ ރަށްރަށަށް ކަންތައްތައް ކޮށްދިނުމޭ. އެއީ ތަފާތަކީ. އެއީ ތަފާތަކީ. އަޅުގަނޑުމެންގެ ކުރިމަތީގައި އެންމެ އިސްކަންދެނީ ދިވެހި ފަރުދުން. ކޮންމެ ތާކު ކޮންމެ ރަށެއްގައި އުޅުނު ކަމުގައިވިޔަސް ދިވެހިންނަށް ހައްގުވާ ކަންތައްތަކެއް ހުރޭ،" ރައީސް ވިދާޅުވި އެވެ.
ރައީސް ވިދާޅުވީ ވަކި ބަޔަކަށް ކަންކަން ކޮށްދިނުމުން ހިނގާނީ އަނިޔާވެރިކަން ކަމަށެވެ. މީގެ ކުރިން އޮތީ އެފަދަ ވެރިކަމެއްކަން ފާހަގަ ކުރައްވަމުން ރައީސް ވިދާޅުވީ ދެން ހާލަތަށް ރާއްޖެ ދިޔުމަށް ދޫނުކޮށްލައްވާނެ ކަމަށެވެ.
މިވަގުތު އެއާޕޯޓެއް އަޅާ ރަށެއްގައި ހަމަ އެއާޕޯޓެއް އެޅުމަށް ކެންޑިޑޭޓަކު ވައުދުވުމުން އެކަމަށް ވެސް ރައީސް ފާޑުވިދާޅުވި އެވެ.
"އަނެއްބޭފުޅަކު ވަޑައިގެން އެބަ ވިދާޅުވޭ މިރަށުގައި ތިމަންނަ އަޅާނަމޭ 1200 މީޓަރުގެ އެއާޕޯޓެއް. ބަލަ އެރަށުގައި މިހާރު އެބަ އަޅައޭ 1500 މީޓަރުގެ އެއާޕޯޓެއް،" ރައީސް ވިދާޅުވި އެވެ.
