ވެރިކަން ލިބިވަޑައިގެންފި ނަމަ ސަރުކާރުގެ ދަރަނީ ރީސްޓަރަކްޗާކޮށް، އިގުތިސޯދީ ބޮޑެތި ބަދަލުތަކެއް ގެންނާނެ ކަމަށް، ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
މާލޭ ސިޓީގެ މޭޔަރުގެ މަގާމުގައި ހުންނެވި މުއިއްޒުގެ ރިޔާސީ ކެމްޕޭނަށް ހދ. ކުޅުދުއްފުށީގައި ބޭއްވި ޖަލްސާގައި އޭނާ ވިދާޅުވީ ފިސްކަލް ޕޮލިސީއާ ގުޅޭ ގާނޫނެއް ތައާރަފުކޮށް ބޭކާރު ހަރަދެއް ނުކުރެވޭނެ ގޮތް ހަދާނެ ކަމަށެވެ. އަދި ސަރުކާރުގެ ކުންފުނިތަކުގެ ހިންގުން ވެސް ހަރުދަނާ ކުރާނެ ކަމަށް އޭނާ ވިދާޅުވި އެވެ.
"ސަރުކާރުގެ އެސްއޯއީތައް ފިނޭންސް މިނިސްޓްރީން ބަޖެޓު ދީގެން ހިންގާ ތަންތަން. އެކަން އެބަޖެހޭ ނިމުމަކަށް އަންނަން. މި ކުންފުނިތައް ރެގިއުލޭޓުކުރެވި އަމިއްލަ ހަރަދުގައި ހިންގާ ކުންފުނިތަކަކަށް ހަދަންޖެހޭ. އެކަމަށް ގާނޫނުތައް ހަދާނަން،" މުއިއްޒު ވިދާޅުވި އެވެ.
"އޭރު ކުންފުނިތަކުން ދުވާލަކަށް 100 ވަޒީފާ ދިނުން ހުއްޓޭނެ."
އޭނާގެ ވެރިކަމެއްގައި ޑިވެލޮޕްމެންޓު ބޭންކެއް ތައާރަފު ކުރުމަކީ ކުރަން ނިންމާފައިވާ ކަމެއް ކަމަށާއި އިގުތިސޯދު ހަރުދަނާކޮށް، އިގުތިސޯދު ނަގައި ކޮޅަށް ޖަހައި، ބުންވަރު ހުރި އިގުތިސޯދަކަށް ހެދުމަކީ ޔަގީންވެގެން ދާނެ ކަމެއް ކަމަށް މުއިއްޒު ވިދާޅުވި އެވެ.
މުއިއްޒު ގެންނާނެ މައިގަނޑު އަނެއް ބަދަލަކީ މަގާމުތަކަށް މީހުން އައްޔަން ކުރުން ހަރުދަނާ ކުރުމެވެ. މުއިއްޒުގެ ވެރިކަމެއްގައި މިނިސްޓަރަކަށް ނުވަތަ ކުންފުންޏެއްގެ އެމްޑީއަކަށް އަންނަ ފަރާތަކީ މަގާމުގެ އިއްޒަތަށް އަންނަ މީހަކަށް ވެގެން ނުވާނެ ކަމަށް ފާހަގަ ކުރެއްވުނެވެ.
"ވަޒީފާގެ ޒިންމާ ނެގޭނެ ވަރުގެ މީހުން ނޫނީ ނުލާނަން. ނަތީޖާ ނެރެދެވޭނެ މީހުން ހުރިހާ މަގާމަކަށް ލާނީ،" މުއިއްޒު ވިދާޅުވި އެވެ.
ހދ. އަތޮޅުގައި އޮންނަ ކޭލަކުނުގެ ވެއްޓަށް ގެއްލުން ނުވެ އެތަން ތަރައްގީކޮށް އާމްދަނީ ލިބޭނެ ގޮތް ހަދާނެ ކަމަށް މުއިއްޒު ވިދާޅުވި އެވެ. އަދި ޓޫރިޒަމް ހދ. އަށް އަތޮޅަށް ގެނެސްދާނަން އޭނާ ވިދާޅުވި އެވެ.
މުއިއްޒުގެ އެހެން ވައުދުތައް
- ކުޅުދުއްފުށީ ހުރިހާ މަގެއްގައި ތާރު ނުވަތަ ގާ އެތުރުން
- ހުރިހާ ބަލިތަކަށް ފަރުވާ ދެވޭ ފެންވަރަށް ކުޅުދުއްފުށީ ހޮސްޕިޓަލް ތަރައްގީކުރުން
- ހިތުގެ ބަލިތަކަށް ވެސް ފަރުވާ ލިބޭނެ ގޮތް ހެދުން
- ކުޅުދުއްފުށީ ވަޒީފާ ކުޅުދުއްފުށިން އުފެއްދުން
- ފަސް ބަސެންޓުގައި ލޯނު ނެގުން
- އެއާޕޯޓު ތަރައްގީ ކުރަންޖެހޭ
- ފަސް ޕަސެންޓު ރޭޓުގައި ލޯނު ދޭނެ
މުއިއްޒުގެ ކެމްޕޭނުގައި މިއަދު ހަނިމާދޫ އަދި ނޮޅިވަރަމަށް ވަޑައިގެންނެވި އެވެ.
