މާލެ ސަރަހައްދުން ގޯއްޗާއި ފްލެޓް ދޫކުރަން މި ސަރުކާރުން ހިންގި ސްކީމަށް ކުރިމަތިލި މީހުންގެ ތެރެއިން ޝަރުތު ހަމަވާ ކަމަށް ކަނޑައަޅާ މީހުނަށް ދޫކުރާނެ، ދައުލަތުގެ ސިއްކަ ޖެހި ލިޔުމާ އެއްގޮތަށް ގެދޮރު ޔަގީންކޮށްދޭނެ ކަމަށް ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
އަލިމަސް ކާނިވާގެ ދޮންމަނިކު ކެފޭގެ ތިރީގައި ހަދާފައިވާ "ދިވެހީންގެ ޖަގަހަ" ހުޅުވުމުގެ ރަސްމިއްޔާތުގައި މުއިއްޒު ވިދާޅުވީ ރާއްޖޭގައި ކުރިމަތިވެފައިވާ އިޖުތިމާއީ އެތައް މައްސަލައެއް ގޮސް ގުޅެނީ ބޯހިޔާވަހިކަމުގެ މައްސަލައާ ކަމަށެވެ.
ކުރީގެ ރައީސް ޑރ. މުހައްމަދު ވަހީދާއި ކުރީގެ ރައީސް އަބްދުﷲ ޔާމީނުގެ ވެރިކަމުގައި ހަތް އަހަރު ވަންދެން ހައުސިން މިނިސްޓަރުގެ މަގާމުގައި ހުންނެވި މުއިއްޒު ވިދާޅުވީ ހިޔާ ފްލެޓް ދިނުމަށް ކުރީގެ ސަރުކާރުން ލިޔުން ހަވާލުކުރި މީހުންގެ ތެރެއިން ބައެއް ފްލެޓް މި ސަރުކާރުން އަތުލި ނަމަވެސް، މި ސަރުކާރުން ފްލެޓު ލިޔުން ދޭ މީހުންނަށް އެހެން ނުހައްދަވާނެ ކަމަށެވެ.
"ގޯތި ވިޔަސް، ފްލެޓް ވިޔަސް، ލިޔުންތަކެއް ވިޔަސް، ރައްޔިތަކަށް ސަރުކާރަކުން ދީފި އެއްޗެއް، ގެޒެޓްކޮށްގެން ދައުލަތުގެ ސިއްކަ ޖަހާފައި ދޭ އެއްޗެއް އަތުލައިގެން ނުވާނެ، ކޮންމެ ގޮތަކަށް ދިން ނަމަވެސް ދެން އެ އަތުލުން ނުވާނެ އިންސާފަކަށް،" މިހާރު މާލޭގެ މޭޔަރަކަށް ވެސް ހުންނެވި މުއިއްޒު ވިދާޅުވި އެވެ.
އޭރުގެ ސަރުކާރުން ހުޅުމާލޭ ދެވަނަ ފިޔަވަހީގެ ދަށުން ހިއްކި ބިމުގެ ސަރަހައްދުގައި އެޅި 6،000 އެއްހާ ފްލެޓްތައް ދީފައިވަނީ އެންމެ ރަނގަޅަށް ޝަރުތު ހަމަވާ މީހުން ނުބަލައި، މިނިސްޓަރު މުއިއްޒުގެ "ލިސްޓަކަށް" ކަމަށް ތުހުމަތު ކުރެވުނެވެ. މި ސަރުކާރު އައިސް ފްލެޓް ލިބޭ މީހުންގެ ލިސްޓު އަލުން މުރާޖައާކޮށް، ބައެއް މީހުންގެ ޝަރުތު ހަމަނުވާ ކަމަށް ބުނެބައެއް މީހުންގެ ނަން އުނިކުރި އެވެ.
މި ސަރުކާރުން އިއުލާންކުރި ސްކީމްތަކުގެ ދަށުން ބިނާކުރަން ނިންމާފައިވާ ފްލެޓްތަކުގެ 70 ޕަސެންޓު ނުނިމޭ ކަމަށް މުއިއްޒު ވިދާޅުވި އެވެ. އަދި ގޯތި ދޭން އިއުލާންކުރާ ބައެއް ސަރަހައްދުތަކަކީ އަދި ބިން ނުހިއްކި އޮތް ފަޅުތަކެއް ކަމަށް ވިދާޅުވެ، ސަރުކާރަށް ވަރަށް ބޮޑަށް ފާޑުވިދާޅުވި އެވެ.
"ރައްޔިތުންނަށް ހިދުމަތް ދިނުމުގައި ހަމަހަމަކަން، އަދުލުވެރިކަން އޮންނަން ޖެހޭ، އަޅުގަނޑުމެންގެ ސަރުކާރެއްގައި ގެދޮރުވެރިކަން ނުލިބޭ ރައްޔިތަކު ނުހުންނާނެ،" މުއިއްޒު ވިދާޅުވި އެވެ.
މާލެ ސަރަހައްދުގައި ގެދޮރުގެ މައްސަލަ ހައްލުކުރުމަށް ޖުމުލަ ހައްލެއް ޕީޕީއެމްގެ ފުރަތަމަ ސަރުކާރު، ޔާމީނުގެ ވެރިކަމުގައި އިއުލާންކުރި ކަމަށް މުއިއްޒު ގަބޫލުކުރެއްވި އެވެ. އެއީ ގުޅީފަޅާއި ފުށިދިއްގަރު ފަޅު ހިއްކައި މާލެ ސަރަހައްދުގެ އާ ފިޔަވައްސެއްގެ ޕްލޭނެވެ. އޭރުގެ ސަރުކާރުން އިއުލާންކުރި ޕްލޭނާ އެއް ގޮތަށް، އެ މުއްދަތުގައި އެ ކަން ނުކުރެވޭ ކަމަށް މުއިއްޒު ވިދާޅުވި އެވެ.
"ރައީސް ޔާމީންގެ ސަރުކާރުގެ ޕްލޭން އަޅުގަނޑުމެންގެ ސަރުކާރުގައި ތަންފީޒުކުރާނެ،" މުއިއްޒު ވިދާޅުވި އެވެ.
މި ސަރުކާރުން އިއުލާން ކުރި ބިންވެރިޔާ ސްކީމްގެ ދަށުން ގޯއްޗަށް އެދި 23،088 މީހުންގެ ފަރާތުން، 15،164 އެޕްލިކޭޝަން ހުށައަޅާފައިވެ އެވެ. އޭގެ ތެރެއިން ޝަރުތު ހަމަވީ 19،857 މީހުން ހުށައެޅި، 12،794 ފޯމެވެ. ގޯއްޗަށް ޝަރުތު ހަމަވާ މީހުނަށް އަންނަ މަހު ލިޔުން ހަވާލު ކުރުމަށް ވަނީ ނިންމައިފަ އެވެ.
ގޯތި ދޭން ނިންމާފައިވަނީ ހުޅުމާލޭން 1،000 ގޯތީގެ އިތުރުން، ގުޅީފަޅުން 2،000 ގޯއްޗާއި އަދި ގިރާވަރު ފަޅު ހިއްކާ އެ ބިމުން މަދުވެގެން 2,000 ގޯތި މާލޭ ރަށްވެހިންނަށް ދިނުމަށެވެ. އެ 5،000 ގޯތީގެ ތެރެއިން ފުރަތަމަ ބުރުގައި ދޫކުރާނީ 3،000 ގޯއްޗެވެ.
މާލެ ސަރަހައްދުން ދޫކުރާ ގޯތީގެ އިތުރުން ގެދޮރުވެރިޔާ ސްކީމުގެ ދަށުން މާލެއިން ދޫކުރާ ފުލެޓުތައް ލިބޭ މީހުންގެ ވަގުތީ ލިސްޓު ވެސް ވަނީ މިދިޔަ އަންގާރަ ދުވަހު އާންމުކޮށްފަ އެވެ.
ހައުސިން މިނިސްޓަރީން އިއުލާނު ކުރި ފުލެޓު ލިބޭ މީހުންގެ ވަގުތީ ލިސްޓުގައި 15،000 އަށްވުރެ ގިނަ މީހުންގެ ޝަރުތު ހަމަވާ ކަމަށް ކަނޑައަޅާފައިވެ އެވެ. ޝަރުތު ހަމަވާ އެންމެނަށް ފްލެޓް ދިނުމަށް ގާތްގަނޑަކަށް 13،000 ފްލެޓް ގާއިމްކުރަން ޖެހެ އެވެ.
