މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ދޭ އާރްޓީއެލް ބަހުގެ ހިދުމަތް އިތުރަށް ފުޅާކުރުމުގެ ގޮތުން ހިޔާ ފްލެޓް ސަރަހައްދަށް ބަސް ހުއްޓިއެއް އިތުރުކޮށްފި އެވެ.
އެމްޓީސީސީން ކުރި އިއުލާނެއްގައި ބުނެފައިވަނީ ހުޅުމާލެ ދެވަނަ ފިޔަވަހީގެ ހިޔާ ސަރަހައްދުގެ 14، 15 އަދި 16 ވަނަ ޓަވަރުގައި ދިރިއުޅޭ ގިނަ ރައްޔިތުންގެ އެދިފައިވާތީ ހިޔާ ސަރަހައްދުގެ H16 ގައި ބަސް ހުއްޓިއެއް ގާއިމު ކޮށްފައިވާ ކަމަށެވެ.
އެގޮތުން, އެމްޓީސީސީގެ ބަހުގެ ހިދުމަތުގައި ހިމެނޭ R6, R7, R8 އަދި R9 ބަސް ރޫޓުގައި ހިދުމަތް މިއަދުން ފެށިގެން މި އައު ބަސް ހުއްޓިއަށް ވެސް ލިބޭނެ ކަމަށް އެ ކުންފުނިން މައުލޫމާތު ދެ އެވެ.
މިބަދަލުތަކާ އެކު ހިޔާ ފްލެޓުތަކުގައި ދިރިއުޅޭ ރައްޔިތުންނަށް އިތުރު ފަސޭހަތަކެއް ލިބިގެން ދާނެ ކަމަށް އެމްޓީސީސީން ބުނެ އެވެެ.
އެމްޓީސީސީން އަންނަނީ ހުޅުމާލެއިން މާލެއަށް ކޮންމެ 15 މިނެޓަކުން ބަސް ދަތުރު ކުރުމުންނެވެ. ހުޅުމާލެ އަށް ކުރާ ބަސް ދަތުރުތައް ފުޅާކުރުމުގެ ގޮތުން އެންމެ ފުރަތަމަ ޑަބަލް ޑެކް ބަސް ގެނައީ އޮކްޓޯބަރު 9، 2018 ގަ އެވެ. އޭގަ ފަހުން އެމްޓީސީސީން ވަނީ މި ހިދުމަތައް އިތުރު ބަސްތަކެއް އިތުރުކޮށްފަ އެވެ.
