ރާއްޖޭގައި އިންޑިއާ ސިފައިންގެ ގިނަ ބަޔަކު ގާއިމްވެ ތިބޭ ކަމަށް ތުހުމަތުކޮށް، އިދިކޮޅު ޕީޕީއެމް/ޕީއެންސީން އެކަމާ ދެކޮޅަށް ވަރުގަދަ މުޒާހަރާތައް ކުރިއަށް ގެންދިޔަ ނަމަވެސް، އެ ކޯލިޝަނުގެ ވެރިކަމެއްގައި ވަކި ގައުމަކާ ދުޝްމަންވުމުގެ ސިޔާސަތެއް ނޯންނާނެ ކަމަށް ކެންޑިޑޭޓް ޑރ.މުހައްމަދު މުއިއްޒު ވިދާޅުވެއްޖެ އެވެ.
އަވަށްޓެރި އިންޑިއާއިން ރާއްޖޭގެ ދާހިލީ ކަންކަމުގެ ތެރެއަށް ވަދެ، ނުފޫޒު ފޯރުވާ ކަމަށް ޕީޕީއެމުން ތުހުމަތުކުރަން ފެށީ އެޕާޓީގެ ފުރަތަމަ ސަރުކާރުގެ، 2013 ގައި އިންތިހާބުވުމުގެ ވެސް ކުރިންނެވެ. އެޕާޓީގެ ވެރިކަމުގައި ރައީސް އަބްދުﷲ ޔާމީނުގެ ސަރުކާރުގައި އެ ތުހުމަތުތައް އިތުރަށް ވަރުގަދަ ވި އެވެ.
އިންޑިއާ ސިފައިން ރާއްޖޭގައި ތިބުމާ ދެކޮޅަށް ޕީޕީއެމް/ޕީއެންސީ ކޯލިޝަނުން ބޮޑެތި މުޒާހަރާތައް ކުރަން ފެށީ ޔާމީންގެ ވެރިކަން ނިމި، އެ ކޯލިޝަނަކީ އިދިކޮޅު ކޯލިޝަނަކަށް ވީ ހިސާބުންނެވެ.
ސެޕްޓެމްބަރު ނުވައެއްގައި ބާއްވާ ރިޔާސީ އިންތިހާބަށް ޕީއެންސީގެ ޓިކެޓްގައި ކުރިމަތިލައްވާފައިވާ ޑރ.މުއިއްޒަށް ކޯލިޝަނުގެ ތާއީދު އޮތްކަން ހާމަކުރަން ރޭ ބޭއްވި ނޫސްވެރިންގެ ބައްދަލުވުމުގައި، "އިންޑިއ އައުޓް މުޒާހަރާ"ތަކުގެ ވާހަކަ ދެކެވުމުން މުއިއްޒުގެ ހާރިޖީ ސިޔާސަތު ހާމަކުރެއްވި އެވެ.
އޭނާ ވިދާޅުވީ ގައުމު ތަރައްގީކޮށް، ރައްޔިތުންނަށް ހައްގު މިންވަރު ހޯދައިދޭން މަސައްކަތް ކުރާ ނަމަ، ހުރިހާ ގައުމަކާ ވެސް ގާތްގުޅުމެއް އޮންނަ ހާރިޖީ ސިޔާސަތެއް އޮންނަން ޖެހޭ ކަމަށެވެ.
"އަޅުގަނޑުމެން ކުރިއަށް ގެންދާނީ މި ދެންނެވި ގޮތަށް. ވަކި ގައުމެއް ބާކީކޮށް، ނޫނީ ވަކި ގައުމަކަށް އާދަޔާ ހިލާފު އިސްކަމެއް ދީ، އެގޮތެއް ނޫން. އެމަނިކުފާނުގެ [ރައީސް ޔާމީނުގެ] ސިޔާސަތު ވެސް ހަގީގަތުގައި އޮތީ އެގޮތަށް، އޭރުގައި ވެސް. އެހެންވީމާ އެއްވެސް ގައުމަކާ އަޅުގަނޑުމެން ދުޝްމަންވެ، އެގައުމަކާ ވަކިވެ، ނޫނީ އެހެން ގައުމަކާ އެއްގޮތް ވެ، އެއްކައިރިވެ، އެހެންނެެއް ނޫން،" މުއިއްޒު ވިދާޅުވި އެވެ.
އިންޑިއާ ސިފައިން ރާއްޖޭގައި ގާއިމްވެ ތިބުމަކީ ބޮޑު މައްސަލައެއް ކަަމަށް ވިދާޅުވެ، އެކަމާ ދެކޮޅަށް މުއިއްޒު ވާހަކަ ދެއްކެވީ ވަކި ގައުމަކާ ދުޝްމަން ނުވުމުގެ ސިޔާސަތު ތަފްސީލުކުރެއްވުމަށް ފަހުގަ އެވެ. އޭނާ ވިދާޅުވީ އެކަމަށް ހައްލެން އަންނަން ޖެހޭނެ ކަމަށެވެ.
