އިއްޔެ އަކީ ތާރީހީ ދުވަހެކެވެ.
ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި ޕީޕީއެމްގެ ކެންޑިޑޭޓު، ކުރީގެ ރައީސް އަބްދުﷲ ޔާމީންގެ ޝަރުތު ހަމަ ނުވާ ކަމަށް އިލެކްޝަންސް ކޮމިޝަނުން ނިންމާފައިވާ ނިންމުން ރަނގަޅު ކަމަށް ސުޕްރީމް ކޯޓުން ނިންމިއިރު، ޕީޕީއެމްގެ ސިސްޓަ ޕާޓީ، ޕީއެންސީގެ ރިޔާސީ ޓިކެޓު، މާލޭ ސިޓީގެ މޭޔަރު ޑރ. މުއިއްޒު ވަނީ ހޯއްދަވައިފަ އެވެ.
ޕީއެންސީން ވަކި ކެންޑިޑޭޓެއް ނެރުމަށް ނިންމައި، އެ ޕާޓީގެ ސެނެޓުގެ ވޯޓުން ކެންޑިޑޭޓެއް ހޮވީ ވެސް، 11 އަހަރުގެ ޖަލު ހުކުމެއްގައި ހުންނެވި ޔާމީންގެ އިރުޝާދާއެކު އެވެ. ނަމަވެސް، ދެކެވަޑައިގަންނަވަމުން ގެންދެވި ރިޔާސީ އުއްމީދުގެ ހުޅުކޮޅު އެންމެ ފަހުގެ މަރުހަލާއިން ނިވިގެން ދިޔުމުން، ގޮތް ދޫނުކުރައްވައި، ޔާމީން ބޭނުންފުޅުވީ 40،000 އަށް ވުރެ ގިނަ މެމްބަރުން ތަމްސީލްކުރާ ޕީޕީއެމް/ޕީއެންސީ ކޯލިޝަނުން އިންތިހާބު ބޮއިކޮޓްކުރުމަށެވެ.
ޔާމީން މިނިވަންކުރަން އެ ކޯލިޝަންގެ ހުރިހާ މެމްބަރުން ބޭނުންވެ އެވެ. ނަމަވެސް ޔާމީނަށް "މަރުދޭ" މެމްބަރުންތަކެއް ފިޔަވައި، އެހެން އެންމެން ވެސް ނިންމީ، ޔާމީން އެދިވަޑައިގެންނެވި ގޮތާ ދެކޮޅަށް އިންތިހާބު ބޮއިކޮޓްނުކޮށް، ކެންޑިޑޭޓަކު ނެރެ އިންތިހާބުގައި ވާދަ ކުރުމަށެވެ.
އެކަމަށް ބަހުސް ކުރުމަށް ފަހު އިއްޔެ ބޭއްވި ޕީޕީއެމް/ޕީއެންސީގެ ސެނެޓުގެ ބައްދަލުވުމުގައި އިންތިހާބު ބޮއިކޮޓް ކުރަން ވޯޓު ދިނީ 45 ސެނެޓަރުންނެވެ. އިންތިހާބުގައި ބައިވެރިވާން 67 ވޯޓު ލިބުނެވެ. ޖުމްލަ 126 ސެނެޓަރަކު ޖަލްސާއަށް ހާޒިރުވި އެވެ. ނަމަވެސް, ހުރިހާ މެމްބަރުން ވޯޓުގައި ބައިވެރިއެއް ނުވެ އެވެ.
އިންތިހާބުގައި ވާދަކުރަން ފޯމް ހުށަހެޅުމުގެ ސުންގަނޑިއަކީ މިއަދު މެންދުރު ފަހު 2:00 އެވެ. އެ ވަގުތު ޖެހުމަށް މަދު ގަޑިއިރުތަކަކަށް ވެފައިވާއިރު، އަދިވެސް ޔާމީން ގޮތް ދޫކުރައްވަން ބޭނުންފުޅެއް ނުވެ އެވެ.
ނަމަވެސް މުއިއްޒުގެ އަރިސް ބައެއް ބޭފުޅުން ވިދާޅުވީ، ޔާމީން ބޭނުންފުޅު ނުވިޔަސް މިއަދު މުއިއްޒު ފޯމް ހުށަހަޅުއްވާނެ ކަމަށެވެ.
ކުރިއަށް އޮތް ރިޔާސީ އިންތިހާބުގައި ވާދަ ކުރައްވަނީ އެމްޑީޕީގެ ކެންޑިޑޭޓް އަދި މިހާރު ރައީސް އިބްރާހިމް މުހައްމަދު ސޯލިހާއި ދަ ޑިމޮކްރެޓްސްގެ އިލްޔާސް ލަބީބާއި ޖުމްހޫރީ ޕާޓީގެ ގާސިމް އިބްރާހިމެވެ. އޭގެ އިތުރުން މޯލްޑިވްސް ނެޝަނަލް ޕާޓީގެ މުހައްމަދު ނާޒިމާއި މޯލްޑިވްސް ރިފޯމް މޫވްމަންޓުގެ ފާރިސް މައުމޫނު އިންތިހާބުގައި ވާދަ ކުރައްވަ އެވެ. ކުރީގެ ހޯމް މިނިސްޓަރު އުމަރު ނަސީރު އަދި ކުރީގެ ބަންޑާރަ ނައިބު ޑރ. މުހައްމަދު މުނައްވަރު ވެސް އަމިއްލަ ގޮތުން އިންތިހާބުގައި ވާދަ ކުރައްވާނެކަން ވަނީ އިއުލާނު ކުރައްވައިފަ އެވެ.
މުހިންމު ބައެއް ހަބަރު
ދުވަހުގެ ކޯޓޭޝަން
ރިޔާސީ އިންތިހާބު ބޮއިކޮޓްކުރަން ޕީޕީއެމްގެ ބައެއް މެމްބަރުން ބޭނުންވާތީ އިއްޔެ އެ އޮފީހުގައި ހަމަނުޖެހުން ބޮޑުވެ، ދޮރު ތަޅުލާފައި ހުރި ވަގުތު އެ ޕާޓީގެ މެމްބަރަކު ދޮރުގެ ބިއްލޫރި ޖާގައިން ބޭރު ބަލަނީ. -- ފޮޓޯ: މުހައްމަދު ޝަހުޒާން/ އަދަދު
