ސެޕްޓެމްބަރު، 9 ގައި އޮންނަ ރިޔާސީ އިންތިހާބުގައި ވާދަ ކުރުމާމެދު އިދިކޮޅު ކޯލިޝަނުން ގޮތެއް ނުނިންމިޔަސް ޕީއެންސީގެ ކެންޑިޑޭޓުގެ ގޮތުގައި ހުންނެވި ޑރ. މުއިއްޒުގެ ކެންޑިޑެސީ ފޯމު މާދަމާ އިލެކްޝަންސް ކޮމިޝަނަށް ހުށަހަޅަން ނިންމައިފި އެވެ.
ޕީޕީއެމް/ޕީއެންސީ ކޯލިޝަނުގައި އިސްކޮށް ހަރަކާތްތެރިވާ ބޭފުޅަކު ނަން ނުޖެހުމަށް ޝަރުތުކޮށް "އަދަދު" އާ ވާހަކަ ދައްކަވަމުން ބުނީ ކޯލިޝަނުން ގޮތެއް ނިންމާފައި ނުވި ނަމަވެސް މުއިއްޒުގެ ކެންޑިޑެސީ ފޯމު މާދަމާ ކޮމިޝަނަށް ހުށަހަޅާނެ ކަމަށެވެ.
"ކޯލިޝަނުން ކޮންމެ ނިންމިޔަސް މުއިއްޒުގެ ފޯމު މާދަމާ ހުށަހަޅާން،" އޭނާ ވިދާޅުވި އެވެ.
ޑރ. މުއިއްޒުގެ ކެންޑިޑެސީ ފޯމު މާދަމާ ހުށަހެޅާނެކަމުގެ އިޝާރާތެއް ކޮށްފައިވާ ކަމަށް އިލެކްޝަންސް ކޮމިޝަނުގެ އިސް އޮފިޝަލަކު ވެސް ވަނީ މި ނޫހަށް ކަށަވަރު ކޮށްދީފަ އެވެ.
އިދިކޮޅު ކޯލިޝަނުގެ މައިނޯރިޓީ ޕާޓީ، ޕީއެންސީން ރިޔާސީ އިންތިހާބަށް ނުކުންނާނެ ކެންޑިޑޭޓެއްގެ ގޮތުގައި ޑރ. މުއިއްޒު ކަނޑައެޅީ އެ ކޯލިޝަނުގެ ރިޔާސީ ޓިކެޓު އަރުވާފައިވާ، ކުރީގެ ރައީސް ޔާމީންއަށް އިންތިހާބުގައި ވާދަ ނުކުރެއްވޭ ހާލަތެއް ކުރިމަތިވެއްޖެ ނަމަ އެވެ.
އެ ނިންމުން އެގޮތަށް ނިންމާފައި އޮއްވައި މިއަދު ދިވެހިރާއްޖޭގެ ސުޕްރީމް ކޯޓުން ވަނީ މަނީ ލޯންޑަރިންގެ ކުށް ސާބިތުވެ، 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ، އަބްދުﷲ ޔާމީންގެ ކެންޑިޑެސީ ބަލައިނުގަތުމަށް އިލެކްޝަންސް ކޮމިޝަނުން ނިންމި ނިންމުމަކީ ރަަނގަޅު ނިންމުމެއް ކަމަށް ހުކުމްކޮށްފަ އެވެ.
އެއާއެކު ޔާމީން ވަނީ އިންތިހާބު ބޮއިކޮޓު ކުރުމަށް ޕީޕީއެމްގެ ލީޑަޝިޕަށް ލަފާ ދެއްވައިފަ އެވެ. އެ އެންގެވުމާ މެދު މަޝްވަރާ ކުރުމަށް މިއަދު ބޭއްވި އިދިކޮޅުގެ ޖޮއިންޓު ސެނެޓު ބައްދަލުވުން ވެސް ވަނީ ހޫނުވެފަ އެވެ. އަދި ޕީޕީއެމްގެ މައި އޮފީސް ހުންނަ އިމާރާތުގެ ތެރޭގައި ވަނީ އެ ހިޔާލުތަފާތުވުންތައް ބޮޑުވެ މާރަމާރީ ވެސް ހިންގައިފަ އެވެ.
ޑރ. މުއިއްޒުގެ ކެންޑިޑެސީ ފޯމު މާދަމާ ހުށަހެޅުމަށް ނިންމާފައިވާއިރު، ރައީސް ޔާމީނަށް ތާއީދު ކުރާ ގިނަ މެމްބަރުން ދަނީ ޔާމީނުގެ އެންގެވުމާ އެއްގޮތަށް ރިޔާސީ އިންތިހާބު ބޮއިކޮޓު ކުރުމަށް ގޮވާލަމުންނެވެ. އަދި އެ ފަރާތްތަކުން ވަނީ ރިޔާސީ އިންތިހާބުގައި މުއިއްޒު ވާދަ ކުރެއްވި ނަމަވެސް ވޯޓު ނުދޭނެކަމަށް ނޫސްވެރިންގެ ކުރިމަތީގައި މިއަދު ގޮވައި ހަޅޭއްލަވައިފަ އެވެ.
