ކުރީގެ ރައީސް އަބްދުﷲ ޔާމީނަށް ޕީޕީއެމްގެ ރިޔާސީ ކެންޑިޑޭޓެއްގެ ގޮތުގައި ވާދަކުރަން ފުރުސަތު ގެއްލުނު ނަމަވެސް އެ ޕާޓީން އެހެން ކެންޑިޑޭޓެއް ނެރެން އިތުރު ވަގުތު ދޭން ޕީޕީއެމުން ހުށަހެޅި ހުށަހެޅުމަށް ސުޕްރީމްކޯޓުން ރިއާޔަތް ނުކޮށް އެ މައްސަލަ ނިންމައިފި އެވެ.
ޔާމީންގެ ކެންޑިޑެސީ ބަލައިނުގަންނަން ނިންމީ ގޯސްކޮށް ކަމަށް ކަނޑައަޅަން އެމަނިކުފާނުގެ ފަރާތްޕުޅުން ސުޕްރީމް ކޯޓަށް ހުށަހެޅި މައްސަލާގައި އެމަނިކުފާނު އެދިވަޑައިގެންނެވީ ކޯޓުން އެގޮތަށް ނުނިންމާ ހާލަތުގައި އެހެން ކެންޑިޑޭޓެއްގެ ނަން ހުށަހަޅަން އިތުރު ވަގުތު ދޭން އަމުރުކޮށްދިނުމަށެވެ.
ޔާމީނުގެ ކެންޑިޑެސީ ބަަލައިނުގަންނަން އިލެކްޝަންސް ކޮމިޝަނުން ނިންމީ ރަނގަޅަށް ކަމަށް ސުޕްރީމްކޯޓުން މިއަދު ހުކުމް ކުރީ ފަނޑިޔާރު ހުސްނުއް ސުއޫދުގެ ރައުޔަށް ދެން ތިއްބެވި ހުރިހާ ފަނޑިޔާރުން ތާއީދުކުރައްވައިގެން، ފަނޑިޔާރުންގެ އިއްތިފާގުންނެވެ.
ރިޔާސީ އިންތިހާބުގައި ޔާމީނަށް ވާދަ ނުކުރެވޭ ހާލަތުގައި އެހެން ކެންޑިޑޭޓަކު ނެރުމަށް ޓަކައި، ކެންޑިޑެސީ ހުށަހެޅުމުގެ ވަގުތު އިތުރުކޮށްދޭން އެދި ޕީޕީއެމުން ހުށަހެޅި ހުށަހެޅުމަށް ސުއޫދުގެ ރައުޔުގައި ރިއާޔަތެއް ނުކުރައްވަ އެވެ. އަދި ޝަރީއަތް ނިންމާލަމުން، ރިޔާސަތުގައި އިންނެވި އުއްތަމަ ފަނޑިޔާރު މުއުތަސިމް އަދުނާން ވެސް އެ ކަމަށް ރިއާޔަތެއް ނުކުރައްވަ އެވެ.
ރިޔާސީ އިންތިހާބަށް ކުރިމަތިލާން ހުޅުވާލި މުއްދަތު މާދަމާއަށް ހަމަވެ އެވެ. ކުރިމަތިލާން ހުޅުވާލާ މުއްދަތު ރިޔާސީ އިންތިހާބުގެ ގާނޫނުގައި ބަޔާންކޮށްފައި އޮވެ އެވެ.
ޔާމީނަށް ކެންޑިޑެސީ ކަށަވަރު ނުވެއްޖެ ހާލަތެއްގައި ޕީއެންސީން ވެސް ކެންޑިޑޭޓަކު ނެރޭ ގޮތަށް އެ ޕާޓީގެ ސެނެޓުން ވަނީ މިދިޔަ ބުރާސްފަތި ދުވަހު ފާސްކޮށްފަ އެވެ. އަދި އެ ކެންޑިޑޭޓަކީ ޕީޕީއެމުން ވަކިވެ އިއްޔެ އެ ޕާޓީއާ ގުޅިވަޑައިގެންނެވި، މާލޭގެ މޭޔަރު ޑރ. މުހައްމަދު މުއިއްޒު ކަމަށް ވެސް ކަނޑައެޅި އެވެ.
އެއީ ޔާމީންގެ އިރުޝާދުގެ ދަށުން ނިންމާފައިވާ ފަހު ޕްލޭނެވެ. ޔާމީނަށް ވާދަނުކުރެވޭނަމަ، ޕީޕީއެމުން ބޭނުން ވަނީ ފުރަތަމަ އެ ޕާޓީގެ ކެންޑިޑޭޓެއް ނެރުމަށެވެ. ޕީޕީއެމުން ސުޕްރީމް ކޯޓުގައި އެދުނީ އެ ކެންޑިޑޭޓަކު ނެރުމަށް އިތުރު ވަގުތު ދިނުމަށެވެ. އިތުރަށް ވަގުތު ދޭން ކޯޓުން ގޮތެއް ނުނިންމުމުން ދެން އެ ޕާޓީން އަމަލުކުރާނެ ގޮތެއް އަދި ނޭނގެ އެވެ.
ރިޔާސީ އިންތިހާބުގެ ފުރަތަމަ ބުރުގެ ވޯޓުލުން އޮންނާނީ ސެޕްޓެމްބަރު މަހުގެ 9، ގަ އެވެ. ދެ ވަނަ ބުރަކަށް ގޮސްފި ނަމަ އެ އިންތިހާބު ބާއްވާނެ ތާރީހެއްގެ ގޮތުގައި ކަނޑައަޅާފައިވަނީ ސެޕްޓެމްބަރު 30، އެވެ. މި ފަހަރުގެ އިންތިހާބުގައި ވޯޓުލުމުގެ ހައްގު ލިބިގެންވާ މީހުންގެ އަދަދު 280،000 އަށް އަރަ އެވެ.
