ކުރިއަށް ރިޔާސީ އިންތިހާބު ކާމިޔާބުކުރެވޭ ހާލަތެއްގައި ވެރިކަންކުރައްވާނީ ކުރީގެ ރައީސް އަބްދުﷲ ޔާމީންގެ އިރުޝާދުގެ ދަށުން ކަމަށް ޕީއެންސީގެ ރިޔާސީ ޓިކެޓު މިއަދު ކާމިޔާބު ކުރެއްވި މާލެ ސިޓީ މޭޔަރު ޑރ. މުހައްމަދު މުއިއްޒު ވިދާޅުވެއްޖެ އެވެ.
މިއަދު ޕީއެންސީގެ ޕްރައިމަރީގެ ވޯޓަށްފަހު މުއިއްޒު ވިދާޅުވީ އެ ދެ ޕާޓީން ވެސް ހުރިހާ ކަަމެއް ކުރިއަށް ގެންދަނީ ޔާމީނުގެ އިރުޝާދުގެ ދަށުން ކަމަށެވެ. އަދި މިއަދު ބޭއްވި ޕްރައިމަރީގެ ކަންކަންވެސް ކުރިއަށް ގެންދިޔައީ ވެސް ޔާމީނުގެ އިރުޝާދުގެ ދަށުން ކަމަށް މުއިއްޒު ވިދާޅުވި އެވެ.
"އާދެ އަޅުގަނޑުމެން މި ދެންނެވީ އަޅުގަނޑުމެންގެ ހުރިހާ މަސައްކަތެއް ވެސް ކުރިއަށް ގެންދަނީ އަދި ގެންދާނީވެސް ރައީސް ޔާމީނުގެ އިރުޝާދުގެ ދަށުން ކަމަށް،" ވެރިކަން ކުރައްވާނީ ޔާމީނުގެ އިރުޝާދުގެ ދަށުންތޯ "އަދަދު" އިން ސުވާލުކުރުމުން މުއިއްޒު ވިދާޅުވި އެވެ.
ނަމަވެސް އޭގެ ތަފުސީލެއް މުއިއްޒު ނުދެއްވަ އެވެ.
ޕީއެންސީގެ ކެންޑިޑޭޓަކު ނެރުން ނިންމީ ޖަލު ހުކުމެއް ތަންފީޒުކުރަމުންދާ ޕީޕީއެމްގެ ރިޔާސީ ކެންޑިޑޭޓު، ޔާމީން އަށް ކުރިމަތި ނުލެވޭ ހާލަތެއްގައި އެ ދެ ޕާޓީގެ ކޯލިޝަނުން ކެންޑިޑޭޓަކު ނެރުމަށެވެ.
ޔާމީނުގެ ކެންޑިޑެސީ އީސީއިން ބަލައިނުގަންނަން ނިންމި މައްސަލާގައި ސުޕްރީމް ކޯޓުން މާދަމާ ގޮތެއް ނިންމާނެ އެވެ. ޔާމީނަށް ކުރިމަތިލެވޭނަމަ މުއިއްޒު ފަހަތަށް ޖެހިލައްވާނެ ކަމަށް މިއަދު ވިދާޅުވި އެވެ.
މިއަދު ހަވީރު ބޭއްވި ޕްރައިމަރީ މުއިއްޒު ކާމިޔާބު ކުރެއްވީ ޕީއެންސީގެ ސެނެޓުގެ 48 މެމްބަރުން ތެރެއިން 25 ވޯޓު ހޯއްދަވައިގެނެވެ. މުއިއްޒުއާ ވާދަ ކުރެއްވި، ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އަދި ކުރީގެ ޑިފެންސް މިނިސްޓަރު އާދަމް ޝަރީފަށް ލިބިވަޑައިގަތީ 23 ވޯޓެވެ.
ޕީޕީއެމް/ޕީއެންސީގެ ކެމްޕޭނުގެ ހަރަކާތްތައް ފެށިގެން އައި އިރު ވެސް ޑރ. މުއިއްޒު އިންތިހާބުގައި ކުރިމަތިލުމުގެ ޝައުގުވެރިކަން އޮތް ވާހަކަތައް ފެތުރެމުން ދިޔަ އެވެ. އެހެން ނަމަވެސް ޑރ. މުއިއްޒު ވަނީ އެތައް ފަހަރަކު އެ ވާހަކަތައް ދޮގުކުރައްވާފަ އެވެ.
މުއިއްޒުގެ ސިޔާސީ ހަޔާތް ފެއްޓެވީ އަދާލަތު ޕާޓީންނެވެ. އެއަށް ފަހު އެމްޑީއޭއާ ގުޅިވަޑައިގެން އެ ޕާޓީގެ ނައިބު ރައީސްކަން ވެސް ކުރެއްވުމަށް ފަހު، ޕީޕީއެމްއާ ގުޅިވަޑައިގަތެވެ.
ޔާމީންގެ ވެރިކަމުގައި ހައުސިން މިނިސްޓަރަކަށް ހުންނެވި މުއިއްޒު ޕީއެންސީއާ ގުޅިވަޑައިގަތީ ރިޔާސީ ޕްރައިމަރީގައި ވާދަކުރައްވަން މިއަދު އެވެ.
ޔާމީނަށް ކުރިމަތިވެފައިވާ ހާލަތު
ޔާމީން 11 އަހަރަށް ޖަލަށްލާން ކްރިމިނަލް ކޯޓުން ހުކުމް ކުރީ އެމަނިކުފާނުގެ ވެރިކަމުގައި ހިންގި އެމްއެމްޕީއާރުސީގެ ބޮޑު ހިޔާނާތުގެ މައްސަލާގައި ވ. އާރަށް ކުއްޔަށް ދޫކުރުމުގެ ތެރެއިން 1.1 މިލިއަން ޑޮލަރު ރިޝްވަތުގެ ގޮތުގައި ނަގައި އެ ފައިސާ ލޯންޑަކުރި ކަމަށް ސާބިތުވުމުންނެވެ.
ޔާމީނަށް އިއްވާފައިވާ ޖަލު ހުކުމުގެ އިސްތިއުނާފު ހައި ކޯޓުގައި އޮތީ މަޑުޖެހިފަ އެވެ. އިސްތިއުނާފު އަވަސް ކުރަން ކަނޑައަޅައިދިނުމަށް އެދި ސުޕްރީމް ކޯޓަށް ދެ ފަހަރު ދުސްތޫރީ މައްސަލައެއް ހުށަހެޅި ނަމަވެސް އެ މައްސަލަތައް ކޯޓަށް ބަލައިނުގަތެވެ.
އެންމެ ފަހުން ރަނިން މޭޓުގެ ގޮތުގައި ޔާމީންގެ ފުރަތަމަ ނައިބު އަދި މިހާރު އެމަނިކުފާނުގެ އިސް ވަކީލެއްގެ ގޮތުގައި ހުންނެވި ޑރ. މުހައްމަދު ޖަމީލު އަހުމަދު ކަނޑައެޅުއްވުމަށް ފަހު ޔާމީނާއި ޖަމީލުގެ ނަން ކެންޑިޑެސީ ފޯމް އިލެކްޝަންސް ކޮމިޝަނަށް ހުށަހެޅި ނަމަވެސް، ކެންޑިޑެސީ ބަލައި ނުގަތެވެ.
އީސީގެ އެ ނިންމުން ޔާމީންގެ ފަރާތުން ވަނީ ސުޕްރީމް ކޯޓަށް ހުށަހަޅައިފަ އެވެ. އެ މައްސަލާގެ އަޑުއެހުމެއް މާދަމާ މެންދުރުފަހު 3:00 އަށް ވަނީ ތާވަލުކޮށްފަ އެވެ.
އަންނަ ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި ވާދަ ކުރައްވަނީ ޖުމްހޫރީ ޕާޓީގެ ގާސިމް އިބްރާހިމާއި އެމްޑީޕީގެ ރައީސް އިބްރާހިމް މުހައްމަދު ސޯލިހާއި ރައީސް މުހައްމަދު ނަޝީދު އުފެއްދެވި ދަ ޑިމޮކްރެޓްސްގެ ރިޔާސީ ކެންޑިޑޭޓް، މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބާއި މޯލްޑިވްސް ނެޝަނަލް ޕާޓީގެ މުހައްމަދު ނާޒިމެވެ.
