އިދިކޮޅު ޕީޕީއެމްގެ ރިޔާސީ ޓިކެޓް ހޯއްދަވަން މަސައްކަތް ކުރައްވާ ކަމަށް މާލޭގެ މޭޔަރު އަދި އެޕާޓީގެ ނައިބު ރައީސް ޑރ. މުހައްމަދު މުއިއްޒަށް ކުރާ ތުހުމަތު ވަރުގަދަކޮށް، އޭނާއަށް ބަަޔަކު މަރުގެ އިންޒާރު ދީފި އެވެ.
މުއިއްޒުގެ އަރިސް ބޭފުޅަކު "އަދަދު" އަށް މައުލޫމާތު ދެއްވި ގޮތުގައި ކާކުކަން ނޭނގޭ ގޮތަށް، އެހެން ގައުމެއްގެ ނަމްބަރެއް ބޭނުންކޮށްގެން އޭނާއަށް މަރުގެ އިންޒާރުދިނީ އަނބިކަނބަލުންގެ ފޯނަށް ފޮނުވި މެސެޖެއް މެދުވެރިކޮށެވެ. އެ އިންޒާރުގެ މައްސަލަ މުއިއްޒު މިހާރު ވަނީ ފުލުހުންނަށް ހުށަހަޅުއްވައިފަ އެވެ.
އޭނާ ވިދާޅުވި ގޮތުގައި އެފަދަ އިންޒާރެއް އައިސްފައި މިވަނީ ސީދާ މުއިއްޒާ ދިމާލަށް ޕާޓީގެ އެތެރޭން ނުރުހުމުގެ ބަސްތައް ރައްދުކުރާތާ ދުވަސްކޮޅެއް ފަހުންނެވެ. އެހެން ނަމަވެސް މަރުގެ އިންޒާރު އައީ ޕާޓީގެ އެތެރޭން ކަމަކަށް އޭނާ ތުހުމަތެއް ނުކުރައްވަ އެވެ.
މަރުގެ އިންޒާރުދީ ފޮނުވި މެސެޖުގައި ތުހުމަތު ކޮށްފައިވާ ގޮތުގައި ޕީޕީއެމްގެ ރިޔާސީ ކެންޑިޑޭޓް، ކުރީގެ ރައީސް އަބްދުﷲ ޔާމީނުގެ ރަނިންމޭޓަކަށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ހަމަޖައްސަވަން ޔާމީނު ނިންމަވާފައިވާ ނިންމުން ބަދަލުކުރައްވަން މުއިއްޒު ގެންދަވަނީ މަސައްކަތް ކުރައްވަމުންނެވެ. އެ ގޮތަށް މަސައްކަތް ނުކުރަން އެ މެސެޖްގައި އިންޒާރުކޮށްފައި ވެ އެވެ.
"ޕްލޭން ބީގައި އަދި ސީ ގައި ވެސް ޕީޕީއެމްޕީއެެންސީގެ ކެންޑިޑޭޓަކީ ޑރ. ޖަމީލް. އެއީ ރައީސް ޔާމީންގެ ނިންމުން،" މުއިއްޒަށް މަރުގެ އިންޒާރުދީ އަނބިކަނބަލުންގެ ފޯނަށް ފޮނުވިކަމަށް ބުނާ މެސެޖްގައި ވެ އެވެ.
މުއިއްޒަށް މަރުގެ އިންޒާރު ދިނުމުން އެކަން ކުށްވެރިކޮށް ޕީޕީއެމުން ނެރުނު ބަޔާނެއްގައި ބުނީ އެފަދަ ނާތަހުޒީބު، ފިނޑި އަމަލުތަކުން އެޕާޓީގެ ލީޑަޝިޕް ބައިބައިކުރެވިދާނެ ކަމަށް ހީކުރުމަކީ އެކަން އެގޮތަށް ކުރި ބަޔަކަށް ކުރެވޭ ކުށްހީއެއް ކަމަށެވެ.
"...މި ކޯލިޝަނުގެ ލީޑަޝިޕް ވެސް އަދި ސެނެޓް ވެސް މަސައްކަތްކުރާނީ އެފަދަ ބިރުދެއްކުންތަކާއި އިންޒާރުތަކަށް ބެލުމެއް ނެތި، މި ކޯލިޝަންގެ ރިޔާސީ ކެންޑިޑޭޓް އަދި ލީޑަރު، ޕީޕީއެމްގެ ރައީސް ، ރައީސް އަބްދުﷲ ޔާމީނަށް ސަރުކާރުން ކުރަމުން ގެންދާ އަނިޔާތަކުން އެމަނިކުފާނު މިންޖުކޮށް، ކުރިއަށް އޮތް ރިޔާސީ އިންތިހާބު އެމަނިކުފާނަށް ކާމިޔާބުކޮށްދިނުމަށް އެކަތިގަނޑެއްގެ ގޮތުގަ އެވެ،" ޕީޕީއެމްގެ ބަޔާނުގައި ބުންޏެވެ.
ޕީޕީއެމްގެ ރިޔާސީ ޓިކެޓް ހޯއްދަވަން މުއިއްޒު މަސައްކަަތްކުރައްވާ ކަމަށް އެޕާޓީގެ އެތެރޭން ކުރި ތުހުމަތުތަކަށް، ޖުލައި 26 ގައި އޭނާ ރައްދު ދެއްވި އެވެ. އެ ދުވަހުގެ ރޭ ޗެނަލް 13 އަށް ވަޑައިގެން މުހާތަބުކުރެއްވީ ޕީޕީއެމް/ޕީއެންސީ ކޯލިޝަނުގެ މެމްބަރުންނާ އެވެ. ގާތް ގަނޑަކަށް ބައިގަޑިއިރު ވަންދެން އާއްމު މެމްބަރންނާ މުހާތަބު ކުރައްވައި ދެއްކެވީ ރިޔާސީ ކެންޑިޑޭޓް، ރައީސް އަބްދުﷲ ޔާމީނަށް ތާއީދު ކުރައްވާ މިންވަރުގެ ހެކިތަކުގެ ވާހަކަ އެވެ.
ވަރަށް ނުތަނަވަސްކަމާ އެކު އިންނަވައިގެން މުއިއްޒު އެރޭ ވިދާޅުވީ ޕީޕީއެމްއާއި އެޕާޓީގެ ލީޑަރު އަދި ކުރީގެ ރައީސް އަބްދުﷲ ޔާމީނާ އޮތް ގުޅުމުގެ ގާތްގަނޑަކަށް މުޅި ތާރީހެވެ. އޭނާ އަކީ ޔާމީނަށާއި ޕީޕީއެމްއަށް ވަފާތެރި ބޭފުޅެއްކަން ދޭހަވާ އެކި އެކި މުއާމަލާތްތަކުގެ ވާހަކަ ވަކިވަކިން ދައްކަވަން ފެއްޓެވުމުގެ ކުރިން އޭނާ ވިދާޅުވީ އޭނާއަށް އެކި ފަރާތްތަކުން ކުރާ ތުހުމަތުތަކާ ހެދި ބައެއް މެމްބަރުންގެ ތެރޭގައި ހިތް ނުތަނަވަސްކަން އޮތް ކަން ގަބޫލުކުރައްވާ ކަމަށެވެ.
