ހ. މައިޒާން ގޭގެ ފުރަތަމަ ފްލޯގައި ހުންނަ އޮފީހެއް ފަޅާލައި ގިނަ އަދަދެއްގެ ފައިސާ ވަގަށް ނެގި މައްސަލައެއްގައި މީހަކު ޖަލަށްލާން ކްރިމިނަލް ކޯޓުން އިއްޔެ ހުކުމްކޮށްފި އެވެ.
މާޗު 23 ގެ 19:21 ހާއިރު، މައިޒާންގޭގެ ފުރަތަމަ ފްލޯގައި ހުންނަ އޮފީހުގެ ބެލްކަނީގެ ސްލައިޑިން ދޮރު މަތާލައިގެން، އެ އޮފީހަށް ވަދެ، 453،906ރ. އާއި 16،400 ޑޮލަރު ވަގަށް ނެގި މައްސަލައެއްގައި ދައުލަތުން ދައުވާ ކުރީ ލ.ގަން، ތުނޑި، ހުދުވިލާގެ، ހުސެއިން ރިޔާޒުގެ މައްޗަށެވެ.
އެ މައްސަލައިގައި އޭނާގެ މައްޗަށް އުފުލީ ވައްކަމުގެ ދައުވާއާއި، އެނގިހުރެ ހުއްދަ ނޫން ތަނަކަށް ވަނުމުގެ ދައުވާއާއި މުދަލަށް ގެއްލުންދިނުމުގެ ދައުވާ އެވެ.
ދައުލަތާއެކު ހެދި އިއުތިރާފު އެއްބަސްވުމެއްގެ ދަށުން ރިޔާޒު ވަނީ ދައުވާތަކަށް ކޯޓުގައި އެއްބަސްވެފަ އެވެ.
ހުއްދަ ނެތި ތަނަކަށް ވަނުމުގެ ކުށާއި މުދަލަށް ގެއްލުން ދިނުމުގެ ކުށަށް އޮންނަ އަސާސީ އަދަބަކީ ހަތަރު މަހާއި 24 ދުވަހަށް ޖަލަށްލުމެވެ. އެކަމަކު، އިއުތިރާފު އެއްބަސްވުމުގެ ދަށުން އެއިން ކޮންމެ ކުށަކަށް އޭނާއަށް ކަނޑައެޅީ ދެ މަހާއި 12 ދުވަހުގެ ޖަލު ހުކުމެކެވެ.
ރިޔާޒުގެ މައްޗަށް ބޮޑު ހުުކުމެއް އައީ ވައްކަމުގެ ކުށަށެވެ. އެ ކުށަށް އޮންނަ އަދަބަކީ ތިން އަހަރާއި ދެ މަހާއި 12 ދުވަހަށް ޖަލަށްލުމެވެ. އެކަމަކު، އިއުތިރާފު އެއްބަސްވުމުގެ ދަށުން އޭނާއަށް ކަނޑައެޅީ އެއް އަހަރާއި ހަތް މަހާއި ހަ ދުވަހުގެ ޖަލު އަދަބެކެވެ.
މި މައްސަލައިގެ ބަންދުގައި އެނާ ހަތަރު މަހާއި ހަތަރު ދުވަސް ހޭދަކޮށްފައިވާތީ، އެ ހުރިހާ ކުށަކަށް އޭނާ ތަންފީޒު ކުރަން ޖެހޭނީ ޖުމްލަ އެއް އަހަރާއި ހަތް މަހާއި 26 ދުވަހެވެ.
ކްރިމިނަލް ކޯޓުގައި މި މައްސަލަ ބެއްލެވީ ގާޒީ އަލީ އާދަމް އެވެ.
