ރަހުނަކާ ނުލާ ލޯނު ދޫކުރަން ފެށީ މި ސަރުކާރުން ކަމަށް ވިދާޅުވެ, ރައީސް އިބްރާހިމް މުހައްމަދު ސޯލިހު, ދަ ޑިމޮކްރެޓްސް އިން އިއުލާނު ކުރި ވިޔަފާރީގެ އުސޫލަށް މިއަދު ރައްދު ދެއްވައިފި އެވެ.
ރިޔާސީ އިންތިހާބުގެ ކެމްޕެއިނަށް ށ. މާއުނގޫދުއަށް ވަޑައިގެން ރައީސް ވަނީ, ޑިމޮކްރެޓްސްގެ ފަރާތުން ނެރެފައިވާ އެ ޕާޓީގެ ފަސޭހަ ވިޔަފާރި ސިޔާސަތަކީ މި ސަރުކާރުން ކޮށް ނިންމާފައިވާ ކަމެއް ކަން ފާހަގަކުރައްވާ ފާޑު ވިދާޅުވެފަ އެވެ.
"ބައެއްގެ [ޑިމޮކްރެޓްސްގެ] މެނިފެސްޓޯ އިއުލާނު ކުރިއިރުގައި އެބަ ބުނޭ އެސްއެމްއީ ލޯނު މޯގޭޖެއް ނެތި ދޫކުރާނަމޯ ތިމަންނަމެންގެ ވެރިކަމުގައި. ބުނިއިރުގައި ބަލަ މި ސަރުކާރުން މިހާރު ވެސް އެބަ ދޫކުރެއޭ އެސްއެމްއީ ލޯނު،" ވަކި ޕާޓީއެއްގެ ނަން ހާމަ ނުކުރައްވާ ރައީސް ވިދާޅުވި އެވެ.
އެމްޑީޕީގެ ރިޔާސީ ކެންޑިޑޭޓް ރައީސް ސޯލިިހް ވިދާޅުވި ގޮތުގައި މާ މޮޅު ޕްލޭނަކަށް ހަދައިގެން ވާދަވެރިން ރަހުނަކާ ނުލާ ލޯނު ދޫކުރާނެ ކަމަށް ބުނި ނަމަވެސް އެއީ މިހާރުވެސް ހިނގަ ހިނގާ އޮތް ކަމެކެވެ. އެހެންކަމުން, ކެމްޕެއިނުގައި ރަށްރަށަށް ވަޑައިގެން ދެންވެސް ދައްކަވާނީ ކޮށްނިމިފައި ހުރި ކަންކަމުގެ ވާހަކަ ކަމަށް އެމަނިކުފާނު ވިދާޅުވި އެވެ.
މާއުނގޫދޫގައި ބޭއްވި ބަނދަރު ބައްދަލުވުމުގައި ރައީސް ވަނީ ޑިމޮކްރެޓްސްގެ އިތުރުން ރިޔާސީ އިންތިހާބަށް ކުރިމަތިލާން ނިންމާފައިވާ އެމްއެންޕީއަށް ވެސް ފާޑުކިޔުން އަމާޒުކުރައްވާފަ އެވެ. އެމްއެންޕީއަށް ފާޑު ވިދާޅުވީ, ހދ. މަކުނުދޫގައި އެއާޕޯޓެއް އަޅައި ދިނުމަށް އެމްއެމްދޕީގެ ރިޔާސީ ކެންޑިޑޭޓް މުހައްމަދު ނާޒިމް ވެވަޑައިގެންނެވި ވައުދާ ގުޅުއްވަ އެވެ.
"ކުރިމަތިލާން ނިންމަވާފައި ތިއްބެވި ބައެއް ކެންޑިޑޭޓުން ވަޑައިގެން ވިދާޅުވާ ބައެއް ވާހަކަ އެބަހުރި. ކޮންމެވެސް އެއް ރަށަކަށް ގޮސް ވިދާޅުވި ތިމަންނަމެންގެ ވެރިކަމުގައި މިރަށުގައި 1200 މީޓަރުގެ އެއާޕޯޓެއް އަޅައިދޭނަމޭ. ބުނި އިރުގައި މިހާރު މި ސަރުކާރުން އެރަށުގައި 1500 މީޓަރުގެ އެއާޕޯޓެއް އެޅުމުގެ މަސައްކަތް ކުރިއަށް އެބަދޭ،" ނަން ހާމަނުކުރައްވާ ރައީސް ވިދާޅުވި އެވެ.
ރައީސް ވިދާޅުވި ގޮތުގައި އެރަށުގައި [މަކުނުދޫގައި] އެއާޕޯޓު އެޅުމަށް ބޭނުންވާ ސާމާނު މިހާރު ހުރީ އެރަށަށް އަރުވާފަ އެވެ.
މި މޭރުމުން ވާހަކަފުޅު ކުރިއަށް ގެންދަވަމުން, ރައްޔިތުން ބޭނުންވަނީ 1200 މީޓަރުގެ އެއާޕޯޓަކަށް ދާންތޯ ނުވަތަ 1500 މީޓަރުގެ އެއާޕޯޓަކަށް ދާންތޯ ރައީސް ސުވާލު ކުރެއްވި އެވެ.
ރިޔާސީ އިންތިހާބުގައި ވާދަކުރަން ނިންމާފައިވާކަން އިއުލާންކޮށްފައިވާ ދެ ޕާޓީއަކަށް ރައީސް ރައްދު ދެއްވިއިރު, މިއަދު ށ. ފުނަދުއަށް ވަޑައިގެން އެމަނިކުފާނު ވަނީ ޕީޕީއެމް ފިޔަވައި އެމްޑީޕީއާ ވާދަކުރެވޭނެ ޕާޓީއެއް ނެތް ކަމަށް ވިދާޅުވެފަ އެވެ. މީގެ ކުރިން ވެސް ކެމްޕޭން ކުރައްވަމުން ރައީސް ވަނީ އެމަނިކުފާނު ވާދަވެރިންގެ ގޮތުގައި ދެކެނީ ހަމައެކަނި ޕީޕީއެމުން ކަމަށް ވިދާޅުވެފަ އެވެ.
