ކުރިއަށް އޮތް ރިޔާސީ އިންތިހާބުގައި ޕީޕީއެމްގެ ރިޔާސީ ކެންޑިޑޭޓު، ޖަލުގައި ހުންނެވި ކުރީގެ ރައީސް އަބްދުﷲ ޔާމީންގެ ރަނިންމޭޓުގެ ގޮތުގައި ކުރީގެ ނައިބު ރައީސް އަދި ޔާމީނުގެ އެމަނިކުފާނުގެ އިސް ވަކީލު ޑރ. މުހައްމަދު ޖަމީލު އަހުމަދު އިއުލާންކުރުމުން މަރުހަބާ ނުދަންދަނަވައި އެ ޕާޓީގެ ނައިބު ރައީސް ޑރ. މުހައްމަދު މުއިއްޒު ފެޔަށް ޖެހިލައްވައިފި އެވެ.
ރަނިންމޭޓުކަން ދިނުމާއެކު ޕީޕީއެމް/ޕީއެންސީގެ ކޯލިޝަންގެ ލީޑަޝިޕުގައި ހިމެނޭ ހުރިހާ ބޭފުޅުންވަނީ ޔާމީނުގެ ފުރަތަމަ ވެރިކަމުގައި ނައިބު ރައީސްކަން ވެސް ކުރެއްވި ޖަމީލަށް މަރުހަބާ ދަންނަވާފަ އެވެ.
ޖަމީލަށް ރަނިން މޭޓުކަން ދިންތާ ގާތްގަނޑަކަށް 24 ގަޑިއިރު ފާއިތުވެގެންދިޔައިރު ވެސް މުއިއްޒު މިހާތަނަށް ޖަމީލަށް މަރުހަބާ ދަންނަވާފައެއް ނުވެ އެވެ.
މިކަމާ ގުޅިގެން މުއިއްޒުގެ ބަހެއް ހޯދުމަށް "އަދަދު" އިން ގުޅުމުން ފޯނަށް ޖަވާބު ނުދެއްވާތީ ބަހެއް ލިބޭ ގޮތް ވަނީ ނުވެފަ އެވެ.
ޖަލު ހުކުމުގެ ސަބަބުން ޔާމީނަށް ރިޔާސީ އިންތިހާބުގައި ވާދަނުކުރެވޭނެ ކަމަށް ވިދާޅުވެ، ޕާޓީގެ ރިޔާސީ ޓިކެޓު ހޯއްދެވުމަށް މުއިއްޒު މަސައްކަތް ކުރެއްވި ކަމަށް ޕީޕީއެމްގެ ތެރޭގައި އަޑުފެތުރުނެވެ. އެކަން މުއިއްޒުގެ ގާތް ބޭފުޅުން މީގެކުރިން ކަށަވަރުވެސް ކޮށްދިނެވެ.
ނަމަވެސް ޖުލައިން 26 ގައި މުއިއްޒު ދެއްވި ހާއްސަ ވީޑިއޯ މެސެޖެއްގައި އެ ތުހުމަތުތައް ދޮގުކުރައްވާ އަބަދުވެސް ހުންނެވީ އަދި ހުންނަވާނީވެސް ޔާމީނާއެކު ކަމަށް ވިދާޅުވެ 30 މިނެޓު މުއިއްޒު ވާހަކަދެއްކެވި އެވެ.
""މިހުރިހާ ވާހަކައެއް މި ދަންނަވަނީ އަޅުގަނޑުގެ ތާއީދު، އަޅުގަނޑު ރައީސަށް ސަޕޯޓްކުރާ ކުރުން، އެއީ ހަގީތަތްކަން، ސާބިތު ހިފޭ ހެކިތަކާ އެކީގައި ދެންނެވުމުގެ ގޮތުން، އެލިގޭޝަންސް ތަކަށް [ތުހުމަތުތަކަށް] އެއްވެސް ގޮތަކަށް ޖަވާބު ނުދީ އަބަދު ހުރުމަކީ އަޅުގަނޑު ގަބޫލުކުރާ ގޮތުގައި އެހާ ރަނގަޅުކަމަކަށް ނުވާތީ،" މުއިއްޒު އެރޭ ވިދާޅުވި އެވެ.
ވަރަށް ނުތަނަވަސްކަމާ އެކު އިންނަވައިގެން މުއިއްޒު ވިދާޅުވީ ޕީޕީއެމްއާއި އެޕާޓީގެ ލީޑަރު އަދި ކުރީގެ ރައީސް އަބްދުﷲ ޔާމީނާ އޮތް ގުޅުމުގެ ގާތްގަނޑަކަށް މުޅި ތާރީހެވެ. އޭނާ އަކީ ޔާމީނަށާއި ޕީޕީއެމްއަށް ވަފާތެރި ބޭފުޅެއްކަން ދޭހަވާ އެކި އެކި މުއާމަލާތްތަކުގެ ވާހަކަ ވަކިވަކިން ދައްކަވަން ފެށްޓެވުމުގެ ކުރިން އޭނާ ވިދާޅުވީ އޭނާއަށް އެކި ފަރާތްތަކުން ކުރާ ތުހުމަތުތަކާ ހެދި ބައެއް މެމްބަރުންގެ މެދުގައި ހިތްނުތަނަވަސްކަން އޮތް ކަން ގަބޫލުކުރައްވާ ކަމަށެވެ.
ރިޔާސީ އިންތިހާބަށް ކުރިމަތިލުމުގެ ފުރުސަތު އަންނަ މަހުގެ ހަތަކަށް ހަމަވާއިރު ޕީޕީއެމުން ދަނީ ޔާމީނުގެ ފޯމު ހުށަހެޅުމަށް ތައްޔާރުވަމުންނެވެ. ޔާމީނުގެ އިންތިހާބީ އެޖެންޓު މުހައްމަދު ތޮލާލް މިއަދު ވިދާޅުވީ ކޯޓުތަކުން ނިންމަން ޖެހޭ ކަންކަން ނިމުމުން މާދަމާވެސް ފޯމު ހުށަހެޅިދާނެ ކަމަށެވެ. ނަމަވެސް، ޔާމީނުގެ ޖަލު ހުކުމް އޮއްވާ އެ ފޯމު ބަލައިނުގަންނާނެ ކަމަށް އީސީގެ ރައީސް ފުއާދު ތައުފީގު ވަނީ މީގެ ކުރިން ވިދާޅުވެފަ އެވެ.
