މާލެ ސަރަހައްދުގައި ހޮޑާއި ބޭރަށް ހިންގުމުގެ ބަލި ގިނަވުމުގެ ސަބަބުން ކެންސަލް ކުރި މިނިވަން އުފާ ކާނިވަލް މިރޭ ފަށާ ގޮތަށް ހަމަޖެހިއްޖެ އެވެ.
ހޯމް މިނިސްޓްރީ އާއި އާބަންކޯ ގުޅިގެން ހުޅުމާލެ ސެންޓްރަލް ޕާކުގައި ބާއްވާ މި ކާނިވަލް މިރޭ 8:00 ގައި ހުޅުވަން ނިންމާފައިވާކަން އިއުލާންކުރީ ހޯމް މިނިސްޓްރީންނެވެ. އެ މިނިސްޓްރީން ބުނީ، ކާނިވަލް ހުޅުވުމުގެ މަސައްކަތަށް މިއަދު ހަވީރު 4:00 އިން ފެށިގެން ސެންޓްރަލް ޕާކު ސަރަހައްދު ބަންދު ވާނެ ކަމަށެވެ.
އިއްޔެ ފަށަން އޮތް ކާނިވަލް ފަސްކުރީ މާލެ ސަރަހައްދުގައި ފެތުރެމުންދާ ރޯގާއާ ގުޅިގެން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ލަފާ ދިނުމުންނެވެ.
އެޗްޕީއޭއިން ހާމަކޮށްފައިވާ ގޮތުގައި ކުއްލިއަކަށް މާލޭގައި ބަލި އިތުރުވީ ނޯރޯވައިރަސްގެ ސަބަބުންނެވެ. އަދި މިއީ ހަލުވި ކަމާއެކު ގައިންގަޔަށް އަރާ ރޯގާއެއް ކަމުން ސަލާމަތީ ފިޔަވަޅުތައް އެޅުމަށް އެ އެޖެންސީން އިލްތިމާސްކުރެ އެވެ.
މި ވައިރަހަކީ ބަންދު ތަންތަނުގެ އިތުރުން ގިނަ މީހުން އެއްވެ ތިބޭ ތަންތަނުގައި ހަލުވިކަމާ އެކު ފެތުރޭ ވައިރަސްއެއް ކަމުން އެޗްޕީއޭއިން ވަނީ މީހުން ގިނަ ތަންތަނަށް ނުދިއުމަށް އިލްތިމާސްކޮށްފަ އެވެ.
އެޗްޕީއޭއިން ވަނީ، ބަލީގެ އަލާމާތްތައް ފެންނަ ނަމަ ގޭގައި މަޑުކުރުމާއި, އަލާމާތްތައް ހުއްޓޭތާ 24 ގަޑިއިރު ނުވަނީސް ކައްކާ, ކާން ހަދައިދިނުން ފަދަ ކަންކަން ނުކުރުމާއި, ގިނަގިނައިން އަތްދޮވުން އަދި, ބަލި ޖެހިފައިވާ މީހާ ހޮޑުލާ, ނުވަތަ ބޭރަށް ހިންގާތަން ސާފުކޮށް, ޑިސްއިންފެކްޓް ކުރުމަށް އިލްތިމާސްކޮށްފަ އެވެ.
މާލޭގައި ކުއްލިއަކަށް ބަލި ގިނަވެފައި މިވަނީ, މިނިވަން ދުވަހާ ގުޅިގެން, ގިނަ ބަޔަކު އެއްވެ ހަރަކާތްތައް ބާއްވާފައި ވަނިކޮށެވެ. އެގޮތުން, މިމަހުގެ 26 ވަނަ ދުވަހުން ފެށިގެން ކޮންމެ ދުވަހަކު ވެސް ގިނަ ބަޔަކު އެއްވެ, އެކި ކަހަލަ ހަރަކާތްތައް ބާއްވާފައިވެ އެވެ.
އެޗްޕީއޭއިން ހާމަކޮށްފައިވާ ގޮތުގައި މާލެ ސަރަހައްދުގައި މި ރޯގާ ފެތުރޭތާ ދެ ހަފްތާ ވެއްޖެ އެވެ.
