ރާއްޖެއިން ބޭރުން އައި މީހަކު ހިމަބިއްސަށް ޕޮޒިޓިވްވެފައިވާތީ, ބަލި އިތުރަށް ފެތުރުނަ ނުދިނުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މަސައްކަތް ފަށައިފި އެވެ.
އެޗްޕީއޭއިން މިއަދު ނެރުނު ބަޔާނެއްގައި ބުނީ, ހިމަބިއްސަށް ޕޮޒިޓިވްވެފައި ވަނީ ރާއްޖެއިން ބޭރުގައި އުޅުމަށްފަހު އައި ދިވެއްސެއް ކަމަށެވެ. އަދި އޭނާ ޕޮޒިޓިވްވީ މިދިޔަ އަންގާރަ ދުވަހު މާލެ ސަރަހައްދުން ކަމަށް އެ އިދާރާއިން ބުނެ އެވެ.
އެ އެޖެންސީން ބުނީ, ބައްޔަށް ޕޮޒިޓިވްވި މީހާގެ ސިއްހާ ހާލު ހުރި ގޮތުން, އޭނާ ހޮސްޕިޓަލުގައި އެޑްމިޓްކޮށްގެން ފަރުވާ ދެމުންދާ ކަމަށެވެ. އަދި އޭނާގެ ހާލަތު ރަނގަޅުވަމުން އަންނަ ކަމަށާއިި އެއީ މީސްލްސް ވެކްސިނުގެ ދެ ޑޯޒް ފުރިހަމަ ކޮށްފައިވާ މީހެއްކަން ވެސް އެޗްޕީއޭއިން ހާމަކޮށްފައިވެ އެވެ.
މީސްލްސް ޖެހުމުގެ ފުރުސަތު އެންމެ ބޮޑަަށް އޮތީ ވެކްސިން ނުޖަހާ މީހުންނާއި ކުޑަކުދިންގެ އިތުރުން ދިފާއީ ނިޒާމު ބަލިކަށި މީހުންނަށެވެ. ވެކްސިން ޖަހާފައިވާ މީހުންނަށް މީސްލްސް ޖެހުމަކީ ޑޮކްޓަރުން ބުނާ ގޮތުގައި ވަރަށް ނާދިރު ކަމެކެވެ. ވެކްސިނުގެ ދެ ޑޯޒް ފުރިހަމަކޮށްފައިވާ ނަމަ ބަލި ޖެހުމުގެ ފުރުސަތު 97 ޕަސަންޓު ކުށަކޮށްދެ އެވެ.
ހިމަބިހީގެ އިމްޕޯޓެޑް ކޭސްއެއް ރާއްޖެއިން ފެނުމުން, އެކަމުގައި ކަނޑައަޅާފައިވާ އުސޫލުތަކުގެ މަތިން ކޮންޓެކްޓުން ދެނެގަތުމުގެ މަސައްކަތް އެޗްޕީއޭއިން ވަނީ ފަށައިފަ އެވެ.
"ބައެއް ކޮންޓެކްޓުންނަށް އެކަން [ހިމަބިއްސަށް ޕޮޒިޓިވްވި މީހަކާ ކޮންޓެކްޓުވީކަން] އަންގާ, އޭގެ ތެރެއިން ވެކްސިން ފުރިހަމަނުވާ ފަރާތްތަކަށް ވެކްސިން ދިނުން ވަނީ ކުރިއަށް ގެންދެވިފައި،" އެޗްޕީއޭއިން ބުނެ އެވެ.
އެޗްޕީއޭއިން ބުނީ ބަލި ޖެހިފައިވާ މީހާ ވަނީ އޭނާގެ ކިބައިން ބަލި ފެތުރުމުގެ ފުރުސަތު އޮތް މުއްދަތުގެ ތެރޭގައި ދަތުރުކޮށްފައި ކަމަށެވެ. ދަތުރުމަތީގަ އާއި, ގެ އާއި ހޮސްޕިޓަލުގައި އޭނާއާ ކޮންޓެކްޓުވި މީހުންގެ މައުލޫމާތު އެ އެޖެންސީން މިހާރު ދަނީ އެއް ކުރަމުންނެވެ. ކޮންޓެކްޓުންގެ ވެކްސިން ފުރިހަމަ ކުރުމުގެ އިތުރުން, ބަލި ޖެހުނު މީހާ ދިރިއުޅޭ ސަރަހައްދުގައި ރިންގް ވެކްސިނޭޝާން ކުރިއަށް ގެންދިއުމަށް ވެސް އެޗްޕީއޭއިން ވަނީ ނިންމާފަ އެވެ.
ހިމަބިހީގެ މައިގަނޑު އަލާމާތްތަކަކީ ހުންއައުމާއެކު ހަމުގައި ރަތް ބިހިތަކެއް ނެގުމެވެ. އަދި ބައެއް މީހުންގެ ފަރާތުން ކެއްސުމާއި އަރިދަފުސް ފޭބުން އަދި ލޯ ރަތްވުން ފަދަ އަލާމަތްތައް ފެނުމަކީ ވެސް އެކަށީގެންވާ ކަމެކެވެ. ހިމަބިއްސަކީ ހަލުވި ކަމާއެކު ފެތުރޭ ބައްޔެއް ކަމަށްވާއިރު, ބަލީގެ އަލާމާތްތައް ފެންނަ ނަމަ ސިއްހީ ހިދުމަތްތެރިއެއްގެ ލަފާ ހޯދުމަކީ މުހިންމު ކަމެކެވެ.
ހިމަބިއްސަކީ ރާއްޖޭގައި ނައްތާލެވިފައިވާ ބައްޔެއް ކަމަށްވާތީ, ބަލީގެ އެންމެ ކޭސްއެއް ފެނުނު ނަމަވެސް އެއީ ބަލީގެ އައުޓްބްރޭކެއް ކަމަށް ބަލަ އެވެ. ރާއްޖެއިން ހިމަބިހި ނައްތާލެވިފައިވާކަން ޑަބްލިއުއެޗްއޯއިން އިއުލާން ކުރީ 2017 ވަނަ އަހަރެވެ.
އޭގެ ފަހުން، 2020 ވަނަ އަހަރު ކުރީކޮޅު ވެސް މާލެ ސަރަހައްދަށް ހިމަބިހީގެ އައުޓްބްރޭކެއް އައެވެ. އަދި, މިދިޔަ އޭޕްރީލް މަހު އައްޑޫ ސިޓީން ވެސް ވަނީ އައުޓްބްރޭކެއް ފެނިފަ އެވެ. ނަމަވެސް އެ ދެ އައުޓްބްރޭކް ވަނީ ކޮންޓްރޯލްކޮށްފަ އެވެ.
