ޕީޕީއެމްގެ ރިޔާސީ ޓިކެޓް ހޯއްދަވަން އެޕާޓީގެ ނައިބު ރައީސް އަދި މާލޭގެ މޭޔަރު ޑރ. މުހައްމަދު މުއިއްޒު މަސައްކަތްކުރައްވާ ކަމަށް އެރި އަޑުތަކާ ހެދި އިދިކޮޅު ކޯލިޝަނުގެ އެތެރޭގައި އުފެދުނު އުދާސްތަކަށް އޭނާ މިރޭ ޖަވާބުދާރީ ވެވަޑައިގެންފި އެވެ.
އޭނާ ވިދާޅުވީ މިރޭ ދެއްކެވި ވާހަކަތަކަކީ ޔާމީނަށް ތާއީދުކުރައްވާ ކުރެއްވުމަކީ ހަގީގަތެއްކަން ސާބިތުކޮށްދެއްވުމަށް ދެެއްކެވި ވާހަކަތަކެއް ކަމަށެވެ.
"މިހުރިހާ ވާހަކައެއް މި ދަންނަވަނީ އަޅުގަނޑުގެ ތާއީދު، އަޅުގަނޑު ރައީސަށް ސަޕޯޓްކުރާ ކުރުން، އެއީ ހަގީތަތްކަން، ސާބިތު ހިފޭ ހެކިތަކާ އެކީގައި ދެންނެވުމުގެ ގޮތުން، އެލިގޭޝަންސް ތަކަށް [ތުހުމަތުތަކަށް] އެއްވެސް ގޮތަކަށް ޖަވާބު ނުދީ އަބަދު ހުރުމަކީ އަޅުގަނޑު ގަބޫލުކުރާ ގޮތުގައި އެހާ ރަނގަޅުކަމަކަށް ނުވާތީ،" މުއިއްޒު ވިދާޅުވި އެވެ.
ޕީޕީއެމްގެ ރިޔާސީ ކެންޑިޑޭޓް، ކުރީގެ ރައީސް އަބްދުﷲ ޔާމީނަށް އިއްވާފައިވާ ޖަލުހުކުމް އެގޮތުގައި އޮތުމުން ކުރިއަށް އޮތް ރިޔާސީ އިންތިހާބުގައި އެމަނިކުފާނަށް ވާދަކުރެއްވިދާނެ ކަމަކަށް ނުބެލެވެ އެވެ. އެހެންވެ އެމަނިކުފާނުގެ ބަދަލުގައި ކެންޑިޑޭޓަކު ނެރެން ޖެހޭ ފަދަ ހާލަތެއް އުފެދުމާ އެކު އެންމެ ބާރަށް ދެކެވުނު ވާހަކަ އަކީ ރިޔާސީ ޓިކެޓް ހޯއްދަވަން މުއިއްޒު މަސައްކަތް ކުރައްވާ ވާހަކަ އެވެ.
އޭނާ މިއަދު މެންދުރުފަހު ނޫސްވެރިންނާ ބައްދަލުކުރައްވާނެ ކަން އިއުލާނުކުރެއްވުމަށް ފަހު އެންމެ ފަހު ވަގުތު އެ ބައްދަލުވުން ކެންސަލް ކުރެއްވި އެވެ. އެއަށް ފަހު މިރޭ ޗެނަލް 13 އަށް ވަޑައިގެން މުހާތަބުކުރެއްވީ ޕީޕީއެމް/ޕީއެންސީ ކޯލިޝަނުގެ މެމްބަރުންނާ އެވެ. ގާތް ގަނޑަކަށް ބައިގަޑިއިރު ވަންދެން އާއްމު މެމްބަރންނާ މުހާތަބު ކުރައްވައި ދެއްކެވީ ރިޔާސީ ކެންޑިޑޭޓް، ރައީސް އަބްދުﷲ ޔާމީނަށް ތާއީދު ކުރައްވާ މިންވަރުގެ ހެކިތަކުގެ ވާހަކަ އެވެ.
މުއިއްޒު ވިދާޅުވި ގޮތުގައި އެ ވާހަކަތަކައިގެން މިރޭ އެ ޓީވީ ސްޓޭޝަނަށް ވަޑައިގެންނެވީ ތުހުމަތުތަކަށް އެކި ފަހަރު މަތިން ޖަވާބުދެއްވުމުގެ ބަދަލުގަައި އެއް ފަހަރާ ހުރިހާ ވާހަކަތަކެއް ވިދާޅުވާށެވެ.
"އަޅުގަނޑު މި ދެއްކި، މިދައްކަމުންދާ އެއްވެސް ވާހަކައެއްގައި ސާބިތު ނުހިފޭ އެއްވެސް ކަމެއް ނޯންނާނެ،" މުއިއްޒު ވިދާޅުވި އެވެ.
އޭނާ ވިދާޅުވީ މިރޭ ދެއްކެވި ވާހަކަތަކުގެ ތެދުކަމުގެ މައްޗަށް ހެކިވާނެ އެތައް ބަޔަކު ތިބޭނެ ކަމަށެވެ.
ވަރަށް ނުތަނަވަސްކަމާ އެކު އިންނަވައިގެން މުއިއްޒު ވިދާޅުވީ ޕީޕީއެމްއާއި އެޕާޓީގެ ލީޑަރު އަދި ކުރީގެ ރައީސް އަބްދުﷲ ޔާމީނާ އޮތް ގުޅުމުގެ ގާތްގަނޑަކަށް މުޅި ތާރީހެވެ. އޭނާ އަކީ ޔާމީނަށާއި ޕީޕީއެމްއަށް ވަފާތެރި ބޭފުޅެއްކަން ދޭހަވާ އެކި އެކި މުއާމަލާތްތަކުގެ ވާހަކަ ވަކިވަކިން ދައްކަވަން ފެށްޓެވުމުގެ ކުރިން އޭނާ ވިދާޅުވީ އޭނާއަށް އެކި ފަރާތްތަކުން ކުރާ ތުހުމަތުތަކާ ހެދި ބައެއް މެމްބަރުންގެ ތެރޭގައި ހިތް ނުތަނަވަސްކަން އޮތް ކަން ގަބޫލުކުރައްވާ ކަމަށެވެ.
"ބަޔަކު އަޅުގަނޑާ ބެހޭ ގޮތުން އަދި ސުވާލުތަކެއް ކުރިޔަކަސް އަދި ތުހުމަތުތަކެއް ކުރިޔަސް، އަޅުގަނޑުގެ ގަބޫލުކުރުމަކީ ، އަޅުގަނޑު ގަބޫލުކުރާ ގޮތަކީ އަޅުގަނޑު އެކަމަކަށް މާބޮޑަށް ޖަވާބުދޭކަށް ގަސްދެއް ނުކުރަމޭ. އެހެން ނަމަވެސް މިގޮތަށް މިހާ ގިނަ ދުވަސްތަކެއް ވަންދެން އަޅުގަނޑު އެއްވެސް ވަރަކަށް މިވާހަކަތައް ނުދައްކައި ހުރުމުން، ޕާޓީގެ މެމްބަރުންގެ ތެރޭގައި، ބައެއް މެމްބަރުންގެ ތެރޭގައި ހިތް ނުތަވަސްކަން އުފެދޭކަން ގަބޫލުކުރެވޭ،" މުއިއްޒު ވިދާޅުވި އެވެ.
އެހެން ނަމަވެސް މިރޭ ދެއްކެވި ވާހަކަތަކީ އާ ވާހަކަތަކެއް ނޫން ކަމަށާއި ޕާޓީގެ އޮފީސް ކުރިމަތީ މީގެ ދެރެއެއް ވަރު ކުރިން ކުރި އިހުތިޖާޖެއްގައި ވެސް ދައްކަވާފައި ވާނީ މިރޭ ދެއްކެވި ވާހަކަތައް ކަމަށް ވެސް އޭނާ ވިދާޅުވި އެވެ.
