ތަފާތު ހިޔާލުތަކަށް ޖާގަދިނުމަކީ ރާއްޖޭގެ މިނިވަންކަމާއި ގައުމުގެ ހަމަޖެހުމަށް ވަރަށް މުހިންމު ކަމެއް ކަމަށް ޑިފެންސް މިނިސްޓަރު މާރީޔާ އަހުމަދު ދީދީ ވިދާޅުވެއްޖެ އެވެ.
މިއަދު ފާހަގަކުރަމުންދާ ރާއްޖޭގެ 58 ވަނަ މިނިވަން ދުވަހުގެ މުނާސަބަތުގައި ދެއްވި ހާއްސަ ހިތޯބެއްގައި މިނިސްޓަރު އިތުރަށް ވިދާޅުވީ، ހަމަހަމަ ފުރުސަތު ހޯދައި ދިނުމާއި ވިޔަފާރި އާއި އިގްތިސޯދުގައި ރައްޔިތުންނަށް ބައިވެރިވެވޭނެ ފަހި މާހައުލެއް އޮތުމާއި، އާންމުންގެ ފުދުންތެރިކަން އިތުރުކުރުމަކީވެސް މިނިވަންކަމާ ގުޅިލާމެހިފައިވާ ކަމެކެވެ.
"ތަފާތު ހިޔާލުތަކަށް ޖާގަދީ، އެކަކު އަނެކަކަށް އިހުތިރާމުކޮށް، ގުޅިގެން މަސައްކަތް ކުރުމަކީ މިނިވަންކަމާއި ގައުމުގެ ހަމަޖެހުން ދެމެހެއްޓުމަށް މުހިންމު ކަމެއް," މާރިޔާ ވިދާޅުވި އެވެ.
މިނިސްޓަރު މިކަންކަން ފާހަގަކުރެއްވީ، މިނިވަންކަމަކީ ހަމައެކަނި އަސްކަރީ ބާރާއި ގުޅިފައިވާކަމެއް ނޫންކަމަށް ވިދާޅުވެފަ އެވެ.
"ބަދަލުވަމުންދާ ސަރަހައްދީ މާހައުލާއި، އިސްތިހާރީ ހަލަބޮލިކަމުގެ ތެރެއިން، މިގައުމު ކުރާ ދަތުރު އަމާންކަމާ އޮމާންކަމާ ހަމަޖެހުމާއެކު ކުރިއަށް ގެންދިއުމުގެ ހަކަތަޔަކީ އަޅުގަނޑުމެންގެ އެއްބައިވަންތަކަން" މިނިސްޓަރު ވިދާޅުވި އެވެ.
ކޮވިޑުގެ ބަލިމަޑުކަމަށްފަހު މިނިވަން ދުވަސް ކުލަގަދަކޮށް ފާހަގަކުރަމުން ނުދިޔަ ނަމަވެސް މި އަހަރު ސަރުކާރުން ވަނީ މިނިވަންދުވަހާ ގުޅުވައިގެން ގިނަ ހަރަކާތްތަކެއް ރާވާފަ އެވެ. އެގޮތުން ހެވިކަމުގެ ކުޅިވަރުތަކާއި، ޕެރޭޑާއި، ފުޅަނދުބުރުގެ އިތުރުން ހުޅުމާލެ ބަލަހައްޓާ އާބަންކޯއާ ގުޅިގެން "މިނިވަން އުފާ" ގެ ނަމުގައި އެ ރަށުގެ ސެންޓްރަލް ޕާކުގައި އަށްޑުވަހަށް ދެމިގެންދާ ކާނިވަލެއް ބޭއްވުމަށް ވަނި ހަމަޖެހިފަ އެވެ.
ދިވެހިރާއްޖޭގެ މިނިވަން ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެވެސް ޖުލައިމަހުގެ 26 ވަނަ ދުވަހެވެ. ދިވެހިރާއްޖެއަށް ފުރިހަމަ މިނިވަންކަން ލިބިފައި ޖުލައި 26، 1965 ގަ އެވެ.
