ސަން ކުންފުނީގެ ވެރިޔާ އަދި އެމްޑީއޭގެ ލީޑަރު އަހްމަދު ސިޔާމް މުހައްމަދު، އެ ގައުމަށް ވަޑައިގަތުމުން އޭނާގެ ޕާސްޕޯޓު ހިފަހައްޓާފައިވާ ކަމަށް ބުނެ ދޮގު ހަބަރު ފެތުރުމުގު ތުހުމަތު އަލަށް އުފެއްދި ދަ ޑިމޮކްރެޓްސްއަށް ކުރެއްވީ ރައީސް އިބްރާހިމް މުހައްމަދު ސޯލިހު އަންގަވައިގެން ކަމަށް ޑިމޮކްރެޓްސްގެ ވަގުތީ ޗެއާޕާސަން ހަސަން ލަތީފު ވިދާޅުވެއްޖެ އެވެ.
ސިޔާމްގެ ތުހުމަތު ތަކާއި ގުޅިގެން ސުވާލުކުރުމުން ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރުކަންވެސް ކުރައްވާ ހަސަން ލަތީފު "އަދަދު" އަށް ވިދާޅުވީ، އެބޭފުޅާ ކޮމެންޓުކުރައްވާއިރު ސިޔާމަށް މުހާތަބު ކުރައްވާނީ އެމްޑީއޭގެ ލީޑަރުގެ ގޮތުގައި ނޫން ކަމަށާއި މުހާތަބުކުރައްވާނީ އެމްއެމްޕީއާރުސީގެ ހިޔާނަތުގައި ދައުވާކޮށްފައިވާ ކުންފުންޏެއްގެ ވެރިޔާގެ ގޮތުގައި ކަމަށެވެ.
ހަސަން ލަތީފު ތުހުމަތުކުރެއްވި ގޮތުގައި، ސިޔާމް އެފަދައިން ތުހުމަތުކުރައްވައި "އެއްވެސް މީހަކަށް ކާކުކަން ނޭނގޭ ވަގު އެކައުންޓަކުން ކުރި ޓުވީޓަކާ ގުޅިގެން އެބޭފުޅުންގެ ޕާޓީއަށް ބަދުބަސް ވިދާޅުވީ 'ސީދާ ރައީސް ސޯލިހު އަންގަވައިގެން"ނެވެ.
"އަޅުގަނޑަކަށްވެސް ނޭނގޭ ހަސަން ކުރުސީ އަކީ ކާކު ކަމެއް، ތިބޭފުޅާއަކަށްވެސް ނޭނގޭ، ސަން ސިޔާމަކަށްވެސް ނޭނގޭ، ދެން ކިހިނެއް އެ ޑިމޮކްރެޓްސްއަށް ވަނީ؟ ރައީސް ސޯލިހު ވިދާޅުވާ ގޮތަކަށް ވާހަކަ އެ ދައްކަވަނީ، ރައީސް ސޯލިހު ވިދާޅުވެގެން އެ ވާހަކަ އެ ދައްކަވަނީ ސަން ޓްރެވަލް ސިޔާމް"
އެމްޑީޕީގެ ކުރީގެ ޗެއާޕާސަންކަންވެސް ކުރެއްވި ހަސަން ލަތީފު ތުހުމަތުކުރެއްވީ ރައީސް ސޯލިހާއެކު ކޯލިޝަން ހަދައިން ހުންނެވި އެމްޑީއޭގެ ލީޑަރު، ސިޔާމް އެ ހުންނެވީ 'ބްލެކްމެއިލް' ވެފައި ކަމަށާއި އެ ތުހުމަތު ތަކަކީ މަޖުބޫރީ ތުހުމަތުތަކެއް ކަމަށެވެ. އަދި ރައީސް ސޯލިހު ގެންދަވަނީ ކޯޓުގައި އޮތް ސިޔާމްގެ މައްސަލަތަކުގެ ނަހަމަ ބޭނުން ހިއްޕަވަމުން ކަމަށްވެސް އޭނާ ތުހުމަތުކުރެއްވި އެވެ.
ސިންގަޕޫރުގައި ހިނގަމުންދާ މައްސަލަ
ނ. އަތޮޅު އިރުފުށި ރިސޯޓް ހިންގަން 2009 ގައި ސަން ޓްރެވަލް އާއި ހިލްޓަން އިންޓަނޭޝަނަލްއާ ދެމެދު ހެދި އެއްބަސްވުން 2013 ގައި ސަން ޓްރެވަލްއިން އުވާލުމާ ގުޅިގެން ސިންގަޕޫރުގެ އާބިޓްރޭޝަނަށް ހިލްޓަނުން ހުށަހެޅި އެވެ. އަދި, މައްސަލާގައި ބަދަލުގެ ގޮތުގައި 24 މިލިއަން ޑޮލަރު (370 މިލިއަން ރުފިޔާ) ދެއްކުމަށް އޮތީ ހުކުމްކޮށްފަ އެވެ.
ސިޔާމްގެ ކުންފުނިން ފައިސާ ދައްކާފައި ނުވާތީ, އެ ނިންމުން ތަންފީޒުކޮށް ދިނުމަށް ހިލްޓަންއިން ސިންގަޕޫރުގެ ހައިކޯޓަށް ހުށަހަޅާފައިވާ މައްސަލައިގެ އަޑުއެހުންތަކަށް އޭނާ ހުރީ ސިންގަޕޫރުގަ އެވެ. ރާއްޖޭގެ ބައެއް މީޑިއާތަކުން ރިޕޯޓުކުރި ގޮތުގައި ސިޔާމްގެ ޕާސްޕޯޓު ހިފަހައްޓައި އޭނާއަށް ސިންގަޕޫރުން ފުރުން އޮތީ މަނާކޮށްފަ އެވެ.
އެހެން ނަމަވެސް ރޭ ރާއްޖެ އައިސް ނޫސްވެރިންނާ ވާހަކަ ދައްކަވަމުން ސިޔާމް ވަނީ އެފަދަ އެއްވެސް ކަމެއް ހިނގާފައި ނުވާ ކަމަށް ވިދާޅުވެ ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިސްވެ އުފައްދަވާ ދަ ޑިމޮކްރެޓްސްއަށް ތުހުމަތުތަކެއް ކުރައްވި އެވެ.
ރިޔާސީ އިންތިހާބަށް 50 ދުވަހަށް ވެފައިވާއިރު ސިޔާމް އަކީ ރައީސް އިބްރާހިމް މުހައްމަދު ސޯލިހު ދެވަނަ ދައުރަކަށް އެކުލަވާލި ކޯލިޝަންގެ މައި ޕާޓްނަރެކެވެ. މިރޭ ވެސް ސިޔާމް ވަނީ އިންތިހާބު ކާމިޔާބުވާނެ ކަމުގެ ފުރިހަމަ ޔަގީންކަން އޮތް ކަމަށް ވިދާޅުވެފަ އެވެ.
