މިދިޔަ މޭމަހުގެ ތެރޭގައި އިފްތިތާހުކުރި "ޖެމްސް ވޯކްސްޕޭސް" ސަރުކާރުގެ އިދާރާތަކުން ރަސްމީކޮށް ބޭނުންކުރަން ފަށައިފި އެވެ.
މީގެ ކުރިން ސަރުކާރުގެ އެއް އިދާރާއަކުން އަނެއް އިދާރާއަކަށް ސިޓީ ބިޓީ ބަދަލުކުރުމަށް ބޭނުންކުރަމުން އައީ "ގަވަމެންޓް އީ-ލެޓަރ މެނޭޖްމަންޓު ސިސްޓަމް" އެވެ. ޖެމްސް މެދުވެރިކޮށް ރަސްމީ މުއާމަލާތްތައް ކުރުމާއި، ލިޔެކިޔުން ތައްޔާރުކުރުން އަދި އެހެން ސޮފްޓްވެއާއެއް ބޭނުން ނުކޮށް ޖެމްސްއިން ސިޓީ ބިޓީ ޑްރާފްޓްކޮށް، އެފަދަ ސިޓީ ބިޓީތައް ޕްރިންޓް ނުކޮށް އިލެކްޓްރޯނިކް ސޮޔާއެކު ފޮނުވޭނެ އެވެ.
ޖެމްސް ވޯކް ސްޕޭސް ބޭނުންކުރުމުގެ މަރުހަލާތައް ނިމިގެންދާއިރު، ވިޔަފާރިތަކާއި ޖަމިއްޔާތަކާއި އަމިއްލަ ފަރާތްތަކަށްވެސް ޖެމްސްގެ ތެރެއިން ސަރުކާރުގެ އިދާރާތަކަށް ސިޓީބިޓި ފޮނުވައި މުއާމަލާތްކުރެވޭނެކަމަށް ރައީސް އޮފީހުން ނެރުނު ދެންނެވުމެއްގައި ބުނެފައި ވެއެވެ.
ޖެމްސް ވޯކްސްޕޭސް ބޭނުންކުރަންފެށި އިދާރާތައް؛
ރައީސް އޮފީސް
- މިނިސްޓްރީ އޮފް ހޯމް އެފެއާޒް
- މިނިސްޓްރީ އޮފް އެޑިޔުކޭޝަން
- މިނިސްޓްރީ އޮފް ހަޔަރ އެޑިޔުކޭޝަނުން
- މިނިސްޓްރީ އޮފް އެންވަޔަރަންމަންޓް
- ކްލައިމެޓް ޗޭންޖް އެންޑް ޓެކްނޯލޮޖީ
- ނޭޝަނަލް ސެންޓަރ ފޯ އިންފޮމޭޝަން ޓެކްނޯލޮޖީ
- ފުވައްމުލަކު ސިޓީ ކައުންސިލްގެ އިދާރާ
- މިލަދުންމަޑުލު ދެކުނުބުރީ ކުޑަފަރީ ކައުންސިލްގެ އިދާރާ
- އައްޑޫ އެކުއެޓޯރިއަލް ހޮސްޕިޓަލް
ޖެމްސް ތަންފީޒުކުރުމަށް ހަމަޖެހިފައިވަނީ ތިން މަރުޙަލާއަށް ބަހައިލައިގެންނެވެ. އެ ތިން މަރުހަލާގެ މަސައްކަތް ވެސް މިއަހަރުގެ ތެރޭގައި ނިންމާނެ ކަމަށް ރައީސް އޮފީހުން ބުނެފައި ވެއެވެ.
ސަރުކާރުގެ އިދާރާތަކުގައި ޖެމްސް ވޯކް ސްޕޭސް ތަންފީޒުކުރުމުގެ މަރުހަލާތައް ކުރިޔަށް ގެންދިޔުމުގައި ނޭޝަނަލް ސެންޓަރ ފޯ އިންފޮމޭޝަން ޓެކްނޯލޮޖީއަށް ސަރުކާރުގެ އިދާރާތަކުން އެއްބާރުލުން ދިނުމަށް ރައީސް ވަނީ އެދިވަޑައިގެންފަ އެވެ.
