ރައީސް އިބްރާހިމް މުހައްމަދު ސޯލިހު ސެޕްޓޭމްބަރު 2021ގައި އެމެރިކާގެ ނިއުޔޯކަށް ކުރެއްވި ދަތުރުފުޅުގެ ހަރަދުތަކުގެ ރަސީދުތައް ހާމަ ކުރަން އިންފޮމޭޝަން ކޮމިޝަނަރުގެ އޮފީހުން (އައިކޮމް)އިން އެންގުމުން އެ މައުލޫމާތު ސިއްރު ކުރަން ރައީސް އޮފީހުން ސުޕްރީމް ކޯޓަށް ހުށަހެޅި މައްސަލަ ބަލައިނުގަންނަން އެކޯޓުން ނިންމައިފި އެވެ.
ރައީސް ސޯލިހު ނިއުޔޯކަށް ކުރެއްވި ދަތުރުފުޅުގެ ހަރަދުތަކުގެ ތަފްސީލުތަކާއި ރަސީދުތައް ހޯދަން އެދުނީ ދިޔަރެސް ނޫހުންނެވެ. ހަރަދުގެ ޖުމްލަ އަދަދު ފިޔަވައި އިތުރު ތަފްސީލުތައް ނުދޭން ރައީސް އޮފީހުން ނިންމުމުން ދިޔަރެސްގެ ފަރާތުން އިންފޮމޭޝަން ކޮމިޝަނަރަށް މައްސަލަ ހުށަހެޅި އެވެ.
އައިކޮމްއިން އެންގީ އުނިކުރަން ޖެހޭ މައުލޫމާތު އުނިކޮށްފައި ރަސީދުތައް ހާމަކުރުމަށެވެ. އައިކޮމްގެ ނިންމުން ރައީސް އޮފީހުން އިސްތިއުނާފު ކުރުމުން އެ ކޯޓުން ނިންމާފައި ވަނީ އައިކޮމްގެގެ ނިންމުން ރަނގަޅު ކަމަށެވެ. އެހެންވެ، ހައި ކޯޓުގެ ހުކުމް އިސްތިއުނާފު ކުރަން ރައީސް އޮފީހުން ސުޕްރީމް ކޯޓަށް މައްސަލަ ހުށަހެޅީ މި މަހުގެ ދެވަނަ ދުވަހު އެވެ.
ސުޕްރީމް ކޯޓުގެ ވެބްސައިޓުގައި އާންމު ކުރާ އެ ކޯޓަށް ހުށަހަޅާ މައްސަލަތަކުގެ ދަފުތަރުން އެނގޭ ގޮތުގައި، އެ މައްސަލައިގައި ރައީސް އޮފީހުން އިސްތިއުނާފަށް ހުށަހެޅި މައްސަލަ ބަލައިނުގަތުމަށް އެ ކޯޓުގެ ރަޖިސްޓްރާ ވަނީ ނިންމަވައިފަ އެވެ.
ރަޖިސްޓްރާ މިގޮތަށް ނިންމެވި ނަމަވެސް، ރަޖިސްޓްރާގެ އެފަދަ ނިންމުންތައް އިސްތިއުނާފު ކުރަން ކޯޓުގެ ފަނޑިޔާރުންނަށް ހުށަހެޅޭނެ އެވެ. އަދި ފަނޑިޔާރުންނަށް ފެންނަ ނަމަ މައްސަލަ ބަލައިގަންނަން ނިންމިދާނެ އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ދަތުރުގެ ހަރަދުތައް ހޯދަން އެދުމުން ރައީސް އޮފީހުން ދީފައި ވަނީ ދަތުރުފުޅަށް ކުރި ޖުމްލަ ހަރަދެވެ. އެއީ ގާތްގަނޑަކަށް 5.3 މިލިއަން ރުފިޔާ އެވެ.
ނިއުޔޯކަށް ރައީސް ވަޑައިގަތީ އދގެ އާންމު މަޖިލީހުގެ 76 ވަނަ ސެޝަނުގައި ބައިވެރިވެ ވަޑައިގެންނެވުމަށެވެ. އެ ދަތުރުފުޅުގައި އަނބިކަނބަލުން ފަޒްނާ މުހައްމަދާއި ރައީސް އޮފީހުގެ ވަފުދެއް ވެސް ވަޑައިގަތެވެ.
