މިނިވަން ދުވަސް ފާހަގަކުރުމުގެ ގޮތުން ފުޅަނދުބުރާއިއެކު މާލޭގައި ގިނަ ހަރަކާތްތަކެއް ބާއްވަން ނިންމައިފި އެވެ.
ރާއްޖެ ޓީވީގެ "ފަލަ ސުރުހީ" ޕްރޮގްރާމުގައި މައުލޫމާތު ދެއްވަމުން ހޯމް މިނިސްޓްރީގެ ސީނިއާ އެގްޒެކެޓިވް ޑިރެކްޓާ އަރުޝަދު އަޝްރަފް ވިދާޅުވީ، ރާއްޖޭގެ 58 ވަނަ މިނިވަން ދުވަހުގެ މުނާސަބަތުގައި "މިނިވަން އުފާ 2023" ގެ ނަމުގައި ގިނަ ހަރަކާތްތަކެއް ކުރިއަށް ގެންދިއުމަށް ހަމަޖެހިފައިވާކަމަށެވެ.
މިއަހަރުގެ މިނިވަން ދުވަހުގެ ހަރަކާތްތައް މިމަހުގެ 25 ވަނަ ދުވަހުން ފެށިގެން އަންނަ މަހުގެ ހަތަރު ވަނަ ދުވަހުގެ ނިޔަލަށް މާލޭގެ އިތުރުން ރަށްރަށުގައި ވެސް ގިނަ ހަރަކާތްތަކެއް ކުރިއަށް ދާނެ އެވެ.
ޖުލައި 26 ވަނަ ދުވަހުގެ ހެނދުނު ޖުމްހޫރީ މައިދާނުގައި ގައުމީ އިނާމު ދިނުމާއިއެކު ދިދަ ނެގުމުގެ ރަސްމިއްޔާތު އޮންނާނެ އެވެ. އަދި އެރޭ ގަލޮޅު ދަނޑުގައި ހެވިކަމާއި ކުޅިވަރު ހަރަކާތްތަކުގެ އިތުރުން ސުކޫލު ކުދިން ހުށަހަޅައިދޭ ހަރަކާތްތައް ވެސް ބޭއްވުމަށް ވަނީ ހަމަޖެހިފަ އެވެ.
2022 ވަނަ އަހަރުގެ މިނިވަން ދުވަހުގެ ޕެރޭޑް -- ފޮޓޯ: މުހައްމަދު ޝާބިން/ އަދަދު
މީގެ އިތުރުން ޖުލައި 27 ވަނަ ދުވަހުގެ ހަވީރު މިނިވަން ދުވަހުގެ ޕެރޭޑު އޮންނާނެ އެވެ. އަދި އެރޭ އެންމެ ގިނަ ބަޔަކު އިންތިޒާރުކުރާ ފުޅަނދުބުރު ކުރިއަށްދާނެ އެވެ.
ފުޅަނދުބުރު އޮންނާނީ ސޯސަން މަގާއި މެދުޒިޔާރަތް މަގާއި މަޖީދީ މަގުގެ އިތުރުން ހުޅުމާލޭގައެވެ. 28 ވަނަ ދުވަހުގެ ހަވީރު ހުޅުމާލެ ސެންޓްރަލް ޕާކުގައި ފުޅަނދު ބުރުތައް ދައްކާލުން ވެސް ކުރިއަށް ދާނެ އެވެ.
ޖުލައި 28 ވަނަ ދުވަހުން ފެށިގެން އޮގަސްޓް ހަތަރެއްގެ ނިޔަލަށް ގިނަ ހަރަކާތްތަކަކާއިއެކު ހުޅުމާލޭގައި ކާނިވަލެއް ވެސް ކުރިއަށް ގެންދިއުމަށް ހަމަޖެހިފައިވާކަމަށް މިނިސްޓްރީއިން މައުލޫމާތު ދެއެވެ.
އެންމެ ފަހުން މާލޭގައި ފުޅަނދުބުރެއް ބޭއްވީ 2019 ވަނަ އަހަރުގަ އެވެ. ސަރުކާރުގެ ކުންފުނިތަކުން ބައިވެރިވާ މި ހަރަކާތުގައި މިއަހަރު ވެސް ގިނަ ކުންފުނިތަކަކުން ބައިވެރިވެ އެވެ. އަދި މިނިވަން ދުވަހުގެ މި ހަރަކާތްތަކުގައި ރައީސުލްޖުމުހޫރިއްޔާ އިބްރާހިމް މުހައްމަދު ސޯލިހުގެ ދެކަނބަލުން ވެސް ބައިވެރިވެވަޑައިގަންނަވާނެ ކަމަށް ހޯމް މިނިސްޓްރީއިން ބުނެއެވެ.
