ފުވައްމުލައް ގިރާ ސަރަހައްދު ހިމާޔަތްކުރަން ބޭނުންވާ ހިލަ ބަރުކޮށްގެން ދިޔަ ބާޖެއް އެ ރަށު ފަރަށް އެރި މައްސަލަ އެންވަޔަރްމެންޓަލް ޕްރޮޓެކްޝަން އެޖެންސީ (އީޕީއޭ)ީ އިން ބަލާނެ ކަމަށް އެ އެޖެންސީން ބުނެފި އެވެ.
ފުވައްމުލައް ފަރަށް އެ ބާޖު އެރީ އިއްޔެ އެވެ. ބާޖު ފަރުމައްޗަށް އެރުމުގެ ސަބަބުން މިހާރު އޮތީ އަރިއަޅާލާފަ އެވެ. އީޕީއޭގެ ޑިރެކްޓަރް ޖެނެރަލް އިބްރާހީމް ނައީމް "އަދަދު" އަށް ވިދާޅުވީ، ފަރަށް އެރި ބާޖުގެ ވެރިފަރާތުން އީޕީއޭއަށް ދޮގުމައުލޫމާތު ދީފައިވާ ކަމަށެވެ. ވެރިފަރާތުން ބާޖު ފަރަށް ނާރާ ކަމަށް ބުނި ނަމަވެސް ބާޖު ފަރަށް އަރާފައިވާކަން އީޕީއޭއަށް އިނގިފައިވާ ކަމަށާއި އެ މައްސަލަ އެ އޮތޯރިޓީން ބަލާނެ ކަމަށް ނައީމް ވިދާޅުވި އެވެ.
ފުވައްމުލައް ގިރާ ސަރަހައްދު ހިމާޔަތްކުރުމުގެ ދަށުން ބޮޑުހިލަ ޖެހުމުގެ މަސައްކަތް ކުރަމުން އަންނީ އެމްޓީ ހޯގާޑު ކުންފުނިންނެވެ. މި މަޝްރޫއުގެ ދަށުން އެ ރަށުގެ އިރުމަތީ ފަރާތުގައި 2650 މީޓަރުގެ ބޮޑުހިލަ ތޮއްޓެއް ގާއިމުކުރުމަށް ވަނީ ހަމަޖެހިފަ އެވެ. ނެދަލެންޑްސްގެ ގްރާންޓް އެހީ އަދި ކުވައިތު ފަންޑުން ފައިނޭންސް ކުރާ މި މަޝްރޫއަށް ޖުމްލަ 300 މިލިއަން ރުފިޔާ ހޭދަވާނެ އެވެ.
މި ހާދިސާއާ ގުޅިގެން އިއްޔެ "އަދަދު" އަށް މައުލޫމާތު ދެއްވި ފުވައްމުލަކު ސިޓީ ކައުންސިލްގެ އޮފިޝަލް ވިދާޅުވީ ބާޖު ފުންކުރުމުގެ މަސައްކަތް ކުރަމުން އަންނަ ކަމަށާއި އިތުރު ތަފުސީލު ދޭނީ ހޯގާޑު ކުންފުނިން ކަމަށެވެ. ނަމަވެސް އެ ކުންފުނީގެ ބަހެއް އަދި ނުލިބެ އެވެ.
