ނިމިގެން ދިޔަ ޖޫން މަހު ޗައިނާގައި ކޮވިޑު ޖެހިގެން 239 މީހުން މަރުވެފައިވާ ކަމަށް އެ ގައުމުން ބުރާސްފަތި ދުވަހު ބުނެފި އެވެ.
ޗައިނާގެ ސެންޓަ ފޯ ޑިޒީސް ކޮންޓްރޯލް އެންޑް ޕްރިވެންޝަން އިން ބުނެފައިވާ ގޮތުގައި އެ ގައުމުގައި ކޮވިޑު ޖެހޭ މީހުންނާއި އެ ބަލީގައި މަރުވާ މީހުން ދަނީ އިތުރުވަމުންނެވެ. މި އަހަރުގެ އޭޕްރީލް، މެއި މަހު ކޮވިޑު ޖެހިގެން އެ ގައުމުގައި މީހަކު މަރުވެފައިވާ ކަމަށް ރިޕޯޓުކޮށްފައި ނެތަސް، މެއި މަހު 164 މީހުން މަރުވައިވާ ކަމަށް އެ ގައުމުގެ ސީޑީސީ އިން ބުނެ އެވެ.
ދެ ހާސް ނަވާރަ ވަނަ އަހަރު ފަހުކޮޅު ޗައިނާއިން ފެނުނު ކޮވިޑާއި ގުޅިގެން ދެ އަހަރު ވަންދެން އޮތީ ވަރަށް ބޮޑަށް ހަރުކަށި ފިޔަވަޅުތައް އަޅައިފަ އެވެ. މި ފަހުން ކޮވިޑުގެ ކޭސްތައް އިތުރުވީ ދެ އަހަރަށް ފަހު މިދިޔަ ޑިސެމްބަރު މަހުގައި ފިޔަވަޅުތައް އުވާލުމާއެކު އެވެ.
ޑިސެމްބަރު މަހުން ފެށިގެން ކޮވިޑު ކޭސްތައް މައްޗަށް ދިޔަސް، ފެބްރުއަރީ މަހުގެ 23 ވަނަ ދުވަހު ކޮވިޑުގެ މަރު ސުމަކަށް ވެއްޓުނު ކަމަށް ޗައިނާގެ ސީޑީސީން ބުނެ އެވެ. ނަމަވެސް އެއަށް ފަހުން މެއި މަހުން ފެށިގެން އަލުން ވެސް ކޭސްތައް އިތުރުވާން ފަށައިފަ އެވެ. ގާތްގަނޑަކަށް 60،000 މީހުން މަރުވެފައިވާ ކަމަށް ރަސްމީ ނަންބަރު ތަކުން ދައްކަ އެވެ.
ޗައިނާގެ ރަސްމީ އިދާރާތަކުން ދުނިޔޭގެ ސިއްހަތު ޖަމިއްޔާއަށް އަންގާފައިވާ ގޮތުގައި، ޖެނުއަރީ 3، 2020 އިން ޖުލައި 5، 2023 ގެ ނިޔަލަށް އެ ގައުމުގައި 99.2 މިލިއަން މީހުން ކޮވިޑަށް ޕޮޒިޓިވްވެ 121،490 މީހުން އެ ބަލީގައި އެ ގައުމުން ވަނީ މަރުވެފަ އެވެ.
ނަމަވެސް ތަޖުރިބާކާރުން ލަފާކުރާ ގޮތުގައި ޗައިނާގައި ކޮވިޑު ޖެހިގެން މަރުވި މީހުންގެ އަދަދު އެ ގައުމުން ބުނާ އަދަދަށް ވުރެ މާ މަތިވާނެ އެވެ.
