އީދު ދުވަހު ފަތިހު މަޖީދީ މަގުން ހިނގާފައި ދަނިކޮށް ބާރު ސްޕީޑެއްގައި ދުއްވާފައި ދިޔަ ސައިކަލަކުން ޖެހި ސީރިއަސް އަނިޔާތަކެއް ލިބުނު އަލީ ހަފީޒު ބޭސްފަރުވާއަށް ރާއްޖެއިން ބޭރަށް ފޮނުވަން އެހީ ލިބިއްޖެ އެވެ.
އޭޑީކޭ ހޮސްޕިޓަލުގެ އައިސީޔޫގައި ފަރުވާދެމުންދާ އުމުރުން 50 އަހަރުގެ ހަފީޒްގެ ހާލު އަދިވެސް ވަރަށް ގޯހެވެ. އެހެންވެ، އޭނާގެ ގާތް ފަރާތްތަކުން ވަނީ އެއާއެމްބިއުލާންސެއްގައި އޭނާ ރާއްޖެއިން ބޭރަށް ފޮނުވުމަށް އެހީ ހޯދުމުގެ މަސައްކަތް އިއްޔެ ފަށައިފަ އެވެ.
މިއަދު ހަފީޒްގެ ފަރާތުން ކޮށްފައިވާ ފޭސްބުކް ޕޯސްޓެއްގައި ބުނެފައި ވަނީ އޭނާގެ އާއިލާގެ މެމްބަރުންނާއި، އެކުވެރިންނާއި، އެމްއެންޔޫ މުވައްޒަފުންނާއި ދަރިވަރުން، އާންމުން އަދި ސަރުކާރުގެ އެހީތެރިކަމާއެކު އޭނާ ބޭސްފަރުވާއަށް އެއާއެމްބިއުލާންސެއްގައި ރާއްޖެއިން ބޭރަށް ފޮނުވުމުގެ އިންތިޒާމު ހަމަޖެހިފައިވާ ކަމަށެވެ.
"މި ހިތާމަވެރި ދަނޑިވަޅުގައި އާއިލާގެ ފަރާތުން އަދިވެސް އެދެނީ ތިޔަ އެންމެހާ ބޭފުޅުން ހަފީޒުއަށް އަވަސް ޝިފާ ދެއްވުން އެދި ހެޔޮދު އާކޮށްދެއްވުމަށެވެ." އެ ޕޯސްޓުގައިވެ އެވެ.
ބުދަ ދުވަހުގެ ފަތިހު 5:00 އެހާއިރު، ހިނގި އެ އެކްސިޑެންޓުގައި ސައިކަލު ދުއްވަން އިނީ 22 އަހަރުގެ ޒުވާނެކެވެ. އޭނާގެ އަތުގައި ސައިކަލު ދުއްވުމުގެ ލައިސަންސެއް ނެތް ކަމަށް ފުލުހުން އެ ދުވަހު ބުނެފައިވެ އެވެ. އޭނާ މިހާރު ހުރީ ކޯޓު އަމުރެއްގެ ދަށުން ހައްޔަރުކޮށްފަ އެވެ.
