ވެރިކަން ހިންގާ އެމްޑީޕީ ދޫކުރައްވައި ވަޑައިގަތުމަށްފަހު އެ ޕާޓީއަށް މަލާމާތް ކުރުމުގެ ގޮތުން، "އެމްޑީޕީ އޮންނާނީ ކާށިދޫ ދާއިރާގެ މެމްބަރު އަބްދުﷲ ޖާބިރުގެ ޗެއާމަންކަމުގައި" ކަމަށް ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ މިއަދު ވިދާޅުވުން އެއަށް ކުރީގެ ބަންޑާރަ ނައިބު ދިޔާނާ ސައީދު ހޫނު ރައްދެއް ދެއްވައިފި އެވެ.
އެމްޑީޕީއަށް މަލާމާތް ކުރުމުގެ ބޭނުމުގައި ޖާބިރު ކުޑައިމީސްކޮށް ވާހަކަ ދެއްކުމުން ނޫހަކުން ހަދާފައި އިން ހަބަރެއްގެ ފޮޓޯއަކާއެކު އީވާއަށް ރައްދެއްގެ ގޮތުން ދިޔާނާ ހަމައެކަނި ލިޔުއްވީ، ނަސަބުވެރިކަމުން ބޮޑާވެގަތުމާ ގުޅޭ ގޮތުން ދިވެހި އަދީބު ހުސެއިން ސަލާހުއްދީން ހައްދަވާފައިވާ ބައިތެކެވެ.
"ވިމާ މޮޅު ނަސަބަކުން އަޔަތީ ތިމާމެން ކިބުރުވެރި މިވަނީ ރިމާދަށް ފުރޮޅިގެން އެދަނީ ދިމާއަށް އަގުރު އަލިފާނޭ،" ދިޔާނާ ވިދާޅުވެފައިވެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން އީވާ ވިދާޅުވީ އެމްޑީޕީ ދާނީ ފަހަތަށް ކަމަށާއި އަންނަ އަހަރު އެ ޕާޓީގެ ޗެއާޕާސަނަކަށް ހުންނަވާނީ ޖާބިރު ކަމަށެވެ.
"އަޅުގަނޑަށް ލަފާކުރެވެނީ އަންނަ އަހަރު މި ދުވަސްކޮޅު ބަލާއިރު، އެމްޑީޕީ އޮންނާނީ ކާށިދޫ ދާއިރާގެ މެމްބަރު އަބްދުﷲ ޖާބިރުގެ ޗެއާމަންކަމުގައިހެން،" އޭނާ ވިދާޅުވި އެވެ.
ދިޔާނާއަކީ ދިވެހިރާއްޖޭގެ އެންމެ ފުރަތަމަ އަންހެން ބަންޑާރަ ނައިބެވެ. އަދި ސާކުގެ ފުރަތަމަ އަންހެން ސެކްރެޓަރީ ޖެނެރަލްގެވެސް މެ އެވެ. ޖާބިރަކީ އޭނާ ކުޑައިރު ނިކަމެތި މާލޭގައި އުނގު ވިޔަފާރިކޮށްގެން އުޅުނު މީހެއް ނަމަވެސް އަމިއްލަ މަސައްކަތްކޮށްގެން ލިބުނު ކާމިޔާބީގެ ސަބަބުން އޭނާއަކީ މިހާރު ރާއްޖޭގައި ހުރި އެންމެ މުއްސަނދި އެއް ދިވެއްސެވެ.
ރައްޔިތުންގެ މަޖިލީހުގެ ނައިބު ރައީސްގެ މަގާމުގައި އިވާ ހުންނެވި ނަމަވެސް އޭނާ އެ މަގާމުން ވަކި ކުރަން 50 އަށް ވުރެ ގިނަ މެމްބަރުން ސޮއި ކުރައްވާ އޮތީ ގަރާރެއް ހުށަހަޅުއްވައިފަ އެވެ. ނަމަވެސް އެ މައްސަލަ އެޖެންޑާ ނުކުރާތީ އީވާގެ މައްސަލަ ކުރިއަށްގެންގޮސްފައެއްނުވެ އެވެ.
މިހާރުގެ ރައީސުލްހުމްހޫރިއްޔާ އިބްރާހިމް މުހައްމަދު ސޯލިހު ވެރިކަމަށް ޝައުގިވެރިކަން ފާޅު ކުރެއްވުމުން އެމްޑީޕީގެ ތެރެއިން ކުރިމަތިވި ގޮންޖެހުންތަކާއެކު އެމަނިކުފާނުގެ އަނބިކަނބަލުން ފަޒްނާ އަހުމަދު ހަމަ އެ ބައިތު ސޯޝަލް މީޑިއާގައި މީގެ ފަސް އަހަރު ކުރިން ޖޫން 5، 2018 ގައި ލިޔުއްވާފައިވެ އެވެ.
އެ ބައިތުގެ ޝަރަހަ ލިޔުއްވަމުން ސަލާހުއްދީން ވިދާޅުވެފައި ވަނީ ވަކި ދަރިކޮޅަކުން ނުވަތަ ވަކި ނަސްލަކުން އަޔަތީ ބޮޑާވެގެންނަނީ "މޮޔައިން" ކަމަށެވެ.
"މިވެނި ބޭފުޅެއްގެ ދަރިކޮޅުން ނުވަތަ އެވެނި ބޭކަލެއްގެ ނަސްލަކުން އާދެވިފައި ހުއްޓަތީ ތިމާ ނޫން އެހެން މީހުންގެ މައްޗަށް ބޮޑާވާ މޮޔައިން ތިމާމެންނަށް ލިބިފައިވާ މޮޅުކަމަށްވާ ގޮތާމެދުގައި ވިސްނުން ހިންގައިލާ ނަމަ އެ ބޮޑާކަމެއް ނުގެންގުޅުނީސްތާ. އެ މޮޅުކަމަށްވާ ގޮތަކީ އަނގުރު އަލިފާނަށްވާހެން ހަމަ އެހެން ހުރެގެން ހުލިވެ ދަނީ. ހުލިވުމުން ވަނީ އަޅިއަށް،" ސަލާހުއްދީން ލިޔުއްވާފައިވެ އެވެ.
