މާލޭ ސިޓީގެ ޕާކުތަކަށް ވޯކް ޕާމިޓް އޮތް ބިދޭސީންނާއި ޓޫރިސްޓުންނަށް ފައިސާ ދައްކައިގެން ނޫނީ ނުވަދެވޭ ގޮތަށް ކަނޑައަޅާފައިވާ ނިންމުމާއި އެއްގޮތަށް އެފަދަ މީހުންގެ އަތުން ނަގާނެ ފީގެ އަދަދު މިއަދު ކަނޑައަޅައިފި އެވެ.
ސިޓީ ކައުންސިލުގެ ހަތަރުވަނަ ދައުރުގެ 107 ވަނަ ރަސްމީ އާންމު ޖަލްސާގައި އެ ކައުންސިލުގެ ކޯޕަރޭޓް ކޮމިޓީން ހުށަހެޅި ގޮތަށް މި އަދަދުތައް ފާސްކުރީ 11 މެމްބަރުންގެ ވޯޓާ އެކު އެވެ. އެއްވެސް ކޮޅަކަށް ހަތަރު މެމްބަރުން ވޯޓު ދީފައި ނުވެ އެވެ.
ބިދޭސީން އަތުން ފީ ނަގާ ރޭޓުތައް
- ވޯކް ޕާމިޓް އޮންނަ ބިދޭސީން - 15ރ.
- އެއްވެސް ލިޔުމެއް ނެތް ބިދޭސީން - 50ރ.
- ޓޫރިސްޓުން - 75ރ.
- ކެމެރާ ހިފައިގެން ވަންނަ ޓޫރިސްޓުން - 500ރ.
އެކަމަކު, އުމުރުން ދުވަސްވީ މީހުންގެ އެހީތެރިންނާއި ކުޑަކުދިން ގޮވައިގެން އުޅޭ ބިދޭސީ މެއިޑުންގެ އަތުން އެއްވެސް ފީއެއް ނުނަގާނެ އެވެ. އަދި, 18 އަހަރު ނުވާ ބިދޭސީ ހުރިހާ ކުދިންނަށް ވެސް އެއްވެސް ފީއަކާ ނުލައި މާލޭގެ ޕާކުތަކަށް ވަދެވޭނެ އެވެ.
މި ނިންމުން ފާސްކުރީ މޭޔަރު ޑރ. މުހައްމަދު މުއިއްޒުގެ ހުށަހެޅުމަކާ އެކު އެވެ. އެއީ, ރާއްޖޭގައި ހުންނަ ޑިޕްލޮމެޓިކް މިޝަންތަކުގެ ކާޑު އޮންނަ މީހުން ފީ ނެގުމުން އިސްތިސްނާވާ ގޮތަށެވެ.
މީގެ ކުރިން ރައީސް އަބްދުﷲ ޔާމީންގެ ވެރިކަމުގައި ބިދޭސީން ސަލްޓަން ޕާކަށް ވަންނަން ޓިކެޓު ނަގަން ޖެހޭ ގޮތް ހެދި އެވެ. އެކަމަކު، ފަހުން އެތަނުން ފީ ނެގުން ހުއްޓާލި އިރު، ލޮނުޒިޔާރަތް ޕާކު އަބަދުވެސް އޮންނަނީ އެންމެނަށް ހިލޭ ވަދެވޭ ގޮތަށެވެ.
މިފަދަ ފީއެއް ނަގަން ސިޓީ ކައުންސިލުން ނިންމުމުން އާންމުންގެ މެދުގައި ހިޔާލު ތަފާތުވުންތަކެއް ހުއްޓެވެ. ދިވެހީންނެކޭ އެއް އުސޫލަކުން ބިދޭސީންނަށް ވެސް ހިލޭ ވަދެވެން ޖެހޭނެ ކަމަށް ބައެއް މީހުން ބުނާ އިރު، ކައުންސިލުގެ ނިންމުމަށް ތާއީދުކޮށް ވެސް ބައެއް މީހުން ވާހަކަ ދެއްކި އެވެ.
މި ނިންމުމުގެ ފަހަތުގައި ވަނީ، މާލޭގައި ހިތްފަސޭހަކުރަން ހުންނަ ތަންތަނުގައި ބިދޭސީން ގިނަވުމުމުގެ ކަންބޮޑުވުމާއި އެކަމުގެ ސަބަބުން ދިވެހިންނަށް އުނދަގޫ ކުރިމަތިވަމުން ދިޔުން ކަމަށް މާލެ ސިޓީ ކައުންސިލުން އެކަން ފާސްކުރި ބައްދަލުކުރުމުގައި މެމްބަރުން ދެއްކި ވާހަކަތަކުން އެނގެ އެވެ.
