މާލެ ސިޓީ ކައުންސިލުން އާމްދަނީ ހޯދުމަށް ކުރެވޭ ކަންކަން ނުވަތަ ހިދުމަތަކަށް ނަގާ ފީ ކަނޑައެޅުމަށް މީގެ ކުރިން މޭޔަރު ޑރ. މުހައްމަދު މުއިއްޒަށް އޮތް ބާރު ގެއްލޭ ގޮތަށް އެ ކައުންސިލުގެ ހިންގާ ގަވާއިދު އިސްލާހުކޮށްފި އެވެ.
އަލަށް އުފައްދާ ޑިމޮކްރެޓްސް ޕާޓީގެ ކައުންސިލް މެންބަރުން ހުށަހެޅި މި އިސްލާހަކީ މީގެ ކުރިން ގަވާއިދުގައި އޮންނަ ގޮތުން، ކަންކަން ނިންމުމުގައި މުއިއްޒު ކައުންސިލުގެ ބަހެއް ނުހޯދާ ވަކި ގޮތަކަށް ކަންކަން ނިންމާ ކަމުގެ ޝަކުވާ މީގެ ކުރިން އެކި ފަހަރު މަތިން ފާޅުކުރުމަށްފަހު ހުށަހެޅި އިސްލާހެކެވެ.
އެގޮތުން, މިއަދު ގެނެވުނު އިސްލާހާ އެކު މާލޭގެ އާންމު ހުސް ޖާގަތަކާއި ބިންތަކާއި ޕާކުތަކާއި މަގުތަކަށް ބަދަލު ގެނައުމަށް ނުވަތަ އެ ތަންތަން ތަރައްގީކުރުމަށް ނުވަތަ ވަކި ބޭނުމަކަށް އެކަށައެޅުމަށް ނުވަތަ ކުއްޔަށް ދިނުމަށް ނުވަތަ އެ ތަންތަނުގެ ހިދުމަތުގެ ގަޑި ބަދަލުކުރުމަށް ނިންމުމާއި، ކައުންސިލުން ފޯރުކޮށްދޭ ހިދުމަތަކަށް ނަގާ ފީއަކަށް ބަދަލު ގެނައުން އަދި ކައުންސިލަށް އާމްދަނީއެއް ލިބޭނެ ކަމެއް ނިންމޭނީ ކައުންސިލްގެ އާންމު ރަސްމީ ބައްދަލުވުމަކުން ފާސްކޮށްގެންނެވެ.
މީގެ ކުރިން ގަވާއިދު އޮތް ގޮތުން މިފަދަ ނިންމުންތައް ނިންމަމުން ގެންދިޔައީ މޭޔަރު ކަނޑައަޅާ ވަކި ކޮމިޓީއަކުންނެވެ. މި އިސްލާހާއެކު އެފަދަ ދާއިމީ ކޮމިޓީއަކުން މިފަދަ ނިންމުމެއް ނިންމި ނަމަވެސް މުޅި ކައުންސިލުން ފާސްނުވާހާ ހިނދަކު އެކަމެއް ނުކުރެވޭނެ އެވެ.
މި އިސްލާހު ފާސްކޮށްފައިވަނީ މިއަދު ބޭއްވި މާލެ ސިޓީ ކައުންސިލުގެ ރަސްމީ ބައްދަލުވުމުގެ އަގުލަބިއްޔަތުން ފާސްކޮށްގެނެވެ.
އޭގެއިތުރުން މިއަދުގެ ބައްދަލުވުމުގައި ވަނީ ކައުންސިލުގެ އެކި މަސައްކަތްތަކަށް ނެގޭ ކޮންޓްރެކްޓް މުވައްޒަފުންނާއި ކޮންސަލްޓަންޓުން ނެގުމުގެ ކުރިން އެފަދަ މުވައްޒަފުން އެ ފަހަރެއްގައި ނަގަން ބޭނުންވާ ސަބަބާއި، އަދަދު، އަދި އެ މުވައްޒަފުން ނެގޭ ސެކްޝަން ނުވަތަ ޑިޕާޓްމަންޓް ކަނޑައެޅުމަށްޓަކައި ކައުންސިލްގެ ރަސްމީ ޖަލްސާ އަށް ހުށަހަޅާ ފާސްކުރަން ޖެހޭ ގޮތަށްވެސް ހުށަހެޅުމެއް ފާސްކޮށްފަ އެވެ.
