ހިޔާގެ ދެ ފްލެޓަކަށް ބަދަލު ގެނެސް ދެ އެޕާޓްމަންޓު އެއްކޮށްލި މައްސަލައިގައި އެ ދެ ފްލެޓް ވެސް އަތުލަން ނިންމި ނިންމުން އާބަންކޯ އިން ބަދަލުކޮށްފި އެވެ.
އާބަންކޯއިން މީޑިއާތަކަށް މިއަދު މައުލޫމާތު ދިން ގޮތުގައި އެއްކޮށްލި ދެ ފްލެޓްގެ ދެމެދުގައި އަލުން ފާރު ރާނައި ކުރިން ހުރި ގޮތަށް ބަދަލުކުރަން ދިން މުއްދަތު އިތުރުކޮށްދޭން ފްލެޓްގެ ވެރިން އެދުމުން އިތުރު ހަތް ދުވަހުގެ ފުރުސަތެއް ދިނެވެ. މުހުލަތު އެގޮތަށް އިތުރުކޮށްދިނުމުން ފްލެޓްގެ ވެރިން އެ މަސައްކަތް ފަށާފައިވާ ކަމަށާއި ފްލެޓް އަތު ނުލަން ނިންމީ އެހެންވެކަމަށް ވެސް އެކޯޕަރޭޝަނުން ބުންޏެވެ.
"ނަމަވެސް ކޮށްފައިވާ ޖޫރިމަނާއަށް އެއްވެސް ލުއެއް މިކޯޕަރޭޝަނަކުން ނުދޭނެ. މިކޯޕަރޭޝަނުން މަސައްކަތް ކުރަމުން މިދަނީ މިފަދަ ކަންކަން ތަކުރާރުވެ ނުދިއުމަށް،" އާބަން ކޯއިން ބުންޏެވެ.
ހިޔާގެ ދެ ފްލެޓެއް އެއްކޮށްލައި، އެއް އެޕާޓްމަންޓްގެ ގޮތުގައި ފައްކާކޮށްފައި ވަނިކޮށް އެނގުމުން އާބަންކޯއިން އެ ދެ ފްލެޓްގެ ވެރިން 100،000.ރ އިން ޖޫރިމަނާކޮށް 10 ދުވަހުގެ ތެރޭގައި ދެ ފްލެޓް ކުރިން ހުރި ގޮތަށއް އިއާދަކުރަން އެންގި އެވެ. އެ މުއްދަތު ހަމަވި އިރު އެ މަސައްކަތް ކޮށްފައި ނުވާތީ އެކޯޕަރޭޝަނުން ދެން އެންގީ 14 ދުވަހުގެ ތެރޭގައި ދެ ފްލެޓް ހުސްކޮށް އެކޯޕަރޭޝަނާ ހަވާލުކުރާށެވެ.
