ޓުއަރިޒަމް މިނިސްޓްރީގެ އަންހެން މުވައްޒަފުންތަކަކަށް ޖިންސީ ގޯނާކުރި ކަމުގެ ތުހުމަތުގައި ކުރީގެ ޓުއަރިޒަމް މިނިސްޓަރު އަލީ ވަހީދުގެ މައްޗަށް އުފުލި ދައުވާތައް ޕްރޮސެކިއުޓަ ޖެނެރަލްގެ އޮފީސް (ޕީޖީ) އިން އަނބުރާ ގެންދިޔުމުން، ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހީމް މަރުހަބާ ވިދާޅުވެއްޖެ އެވެ.
އަލީ ވަހީދުގެ މައްސަލަ ކްރިމިނަލް ކޯޓުގައި ހިނގަމުންދަނިކޮށް، އޭނާ ރާއްޖެއިން ބޭރަށް ވަޑައިގެންނެވިގޮތަށް އެނބުރި ވަޑައިނުގަތުމުން، މައްސަލަ ކުރިއަށްނުގެންދެވިގެން، ކޯޓުން ވަނީ ސެޕްޓެމްބަރު 22، 2022 ގައި މައްސަލަ އަނބުރައި ޕީޖީ އޮފީހަށް ފޮނުވާލައިފަ އެވެ. އޭނާ އެނބުރި ވަޑައިގެންނެވުމުން އެ މައްސަލަ ފޮނުވާ ގޮތަށް، އޮކްޓޯބަރު 6، 2022 ގައި ޕީޖީ އޮފީހުން ވަނީ އެ މައްސަލަ އަނބުރައި ފުލުހުންނަށް ފޮނުވާލައިފަ އެވެ.
ޕީޖީން އިއްޔެ ނެރުނު ބަޔާނެއްގައި ބުނީ އަނިޔާ ލިބުނު މީހުންނާއި ހެކީންގެ ގޮތުގައި ބަޔާން ދިން މީހުން ، މިހާރު އެ މައްސަލަ ކުރިއަށް ގެންދަން ބޭނުންވާ ނުވާ ކަން ބަޔާންކޮށް އެ އޮފީހަށާއި ފުލުހުންނަށް ސިޓީ ފޮނުވާފައިވާ ކަމަށެވެ. އެހެންވެ، އެ މައްސަލަ ދެން އިތުރަށް ކުރިއަށް ގެންދެވެން ނެތް ކަމަށް އެ އޮފީހުން ނިންމި އެވެ.
ޕީޖީ އޮފީހުގެ ނިންމުމުގެ ހަބަރެއްގެ ސްކްރީން ޝޮޓަކާއެކު، ގާސިމް ރޭ ކުރެއްވި ޓްވީޓްގައި ގާސިމް ވިދާޅުވީ "ހޮނަރަބަލް އަލީ ވަހީދަށް ފަށްފަށުން މަރުހަބާ" މިހެންނެވެ.
ގާސިމް ވަނީ މީގެ ކުރިން ވެސް އަލީ ވަހީދުގެ ދިފާއުގައި ވާހަކަ ދައްކަވައިފަ އެވެ. އޭރު ޖުމްހޫރީ ޕާޓީގެ ރައީސަކަށް ވެސް ހުންނެވި އަލީ ވަހީދަށް ކުރާ ތުހުމަތުތަކާ ގުޅިގެން އެ ޕާޓީގެ ނޫސް ކޮންފެރެންސެއްގައި ގާސިމް ވިދާޅުވީ އަލީ ވަހީދު އެ ވަރުގެ ކަމެއް ކުރައްވާނެ ކަން ގަބޫލުކުރައްވަން ދަތި ކަމަށެވެ.
"އަލީ ވަހީދު ހުންނެވީ ފްރޭމް ކޮށްފައި ނޫން ކަމެއް ވެސް ނޭނގެ،" ވިޔަފާރިވެރިޔާ، ވިލާ ކުންފުނީގެ ޗެއާމަން ގާސިމް ވިދާޅުވެފައިވެ އެވެ.
އެމްޑީޕީގެ ވަޓްސްއެޕް ގްރޫޕަކަށް މީގެ ކުރިން ފޮނުއްވި މެސެޖެއްގައި ރައްޔިތުންގެ މަޖިލިހުގެ ރައީސް އަދި ކުރީގެ ރައީސް މުހައްމަދު ނަޝީދު ވެސް ވަނީ އޭރު އަލީ ވަހީދަށް ކުރި ދައުވާތައް ބޮޑު ކަމަށް ވިދާޅުވެ ކަންބޮޑުވުން ފާޅުކުރައްވައިފަ އެވެ.
"ބަޔާންތައް އަޅުގަނޑު ބެލިން، ވަރަށް ބޮޑު ދައުވާއެއް ކުރާ ކަމީ އަޅުގަނޑު ވަރަށް ކަންބޮޑުވާ ކަމެއް، އަޅުގަނޑު މި ހުންނަނީ އަޖައިބުވެފައި،" ނަޝީދު އޭރު ވިދާޅުވެފައިވެ އެވެ.
ދައުވާތައް އަނބުރާ ގެންދިޔަސް، މީގެ ކުރިން އަލީ ވަހީދު ސުޕްރީމް ކޯޓުގައި އޮތް އިސްތިއުނާފީ އަޑުއެހުމަކަށް ހާޒިރުނުވި މައްސަލައިގައި އެ ކޯޓުގެ ހުރުމަތް ކެނޑި ކަމަށް ބަލައި އޭނާ ދެ މަހާއި 12 ދުވަހަށް ޖަލަށްލާން އޮތީ ހުކުމްކޮށްފަ އެވެ. އެހެންވެ، އޭނާ އަނބުރާ ރާއްޖެއަށް ވަޑައިގަތުމުން އެ ހުކުމް ތަންފީޒު ކުރަން ޖެހޭނެ އެވެ.
މައްސަލައިގެ ފަސްފަހަތް
އަލީ ވަހީދު ރާއްޖެއިން ފިއްލެވީ ފެބްރުއަރީ 10، 2021 ގަ އެވެ. އޭގެ ފަހުން އޭނާ ހައްޔަރުކޮށްގެން ޝަރީއަތަށް ހާޒިރު ކުރުމަށް ނޮވެމްބަރު 28، 2021 ގައި ކޯޓުން އަމުރެއް ނެރުނު ނަމަވެސް މިހާތަނަށް އޭނާ ރާއްޖެއަށް ގެނެވިފައެއް ނުވެ އެވެ.
އަލީ ވަހީދު އިނގިރޭސިވިލާތަށް ވަޑައިގަތީ އޭނާގެ ޕާސްޕޯޓް ހިފަހައްޓަން ނެރެފައި އޮތް އަމުރު ކްރިމިނަލް ކޯޓުން ބާތިލްކޮށް ބޭސްފަރުވާއަށް ފުރުމުގެ ހުއްދަ އެ ކޯޓުން ދިނުމުންނެވެ. އޭނާގެ ޕާސްޕޯޓް ދޫކުރީ ޖާމިނުވާ މީހެއްގެ ގޮތުގައި ޔޫތު މިނިސްޓްރީގެ ސްޓޭޓް މިނިސްޓަރު އަސްއަދު އަލީ އެއްބަސްވުމުންނެވެ. އެ އެއްބަސްވުމުގެ މުއްދަތު ހަމަވިއިރު ވެސް އަލީ ވަހީދު އެނބުރި ރާއްޖެއަށް ވަޑައެއް ނުގަންނަވަ އެވެ.
ކްރިމިނަލް ކޯޓުގެ އެ ނިންމުން ދައުލަތުން ހައި ކޯޓާއި ސުޕްރީމް ކޯޓުގައި ވެސް އިސްތިއުނާފުކުރި އެވެ. ނަމަވެސް، އަލީ ވަހީދު އުޅޭނޫޅޭ ތަނެއް ނޭނގި، ޗިޓް ނުފޮނުވިގެން އޭނާގެ ޕާސްޕޯޓް ހިފަހައްޓައިދޭން ހައިކޯޓަށާއި ސުޕްރީމް ކޯޓަށް ހުށަހެޅި މައްސަލަ ވެސް ބޭރުކޮށްލީ އެވެ.
އެ ފަހުން ދެވަނަ ފަހަރަށް ޕްރޮސިކިއުޓާ ޖެނަރަލްގެ ފަރާތުން އަލީގެ ޕާސްޕޯޓް ހިފަހައްޓަން ކްރިމިނަލް ކޯޓުގައި އެދުމުން އެ އަމުރު ނެރެނުދިން މައްސަލާގައި ހައިކޯޓަށް ދިޔަ އެވެ. ނަމަވެސް، އަލީގެ ގައިރު ހާޒިރުގައި މައްސަލަ ކުރިއަށް ނުގެންދެވޭނެ ކަމަށް ބުނެ، މައްސަލަ ބަލައިގެންފައިނުވެ އެވެ.
އަލީ ވަހީދު މައްޗަށް ޖިންސީ އަނިޔާ ކުރުމުގެ ދައުވާއަކާއި ޖިންސީ ގޯނާ ކުރުމުގެ ދައުވާ އާއި ޖިންސީ ގޯނާ ކުރަން އުޅުމުގެ ދައުވާ އާއި ރޭޕް ކުރަން އުޅުމުގެ ކުށުގެ ދައުވާ އާއި ބޭއަދަބީ ގޮތުގައި ޖިންސީ ގުނަވަން ހާމަކުރުމުގެ ދައުވާ އާއި ހުއްދަ ނޫން ޖިންސީ މުއާމަލާތެއް ހިންގަން އެދުމުގެ ދެ ދައުވާއެއް ކޮށްފައިވެ އެވެ.
އެ ތުހުމަތުތައް އޭނާގެ މައްޗަށް ކުރުމުން އިސްތިއުފާ ދެއްވުމަށް ރައީސް އިބްރާހިމް މުހައްމަދު ސޯލިހު އެންގެވުމުން ވެސް އިސްތިއުފާ ނުދެއްވުމުން ޖުލައި 9، 2020 ގައި އޭނާ މަގާމުން ވަކިކުރި އެވެ.
