މީހަކަށް 19 އަހަރު ދުވަހަށް ކުއްޔަށް ދީފައިވާ އެޕާޓްމަންޓެއް އެހެން މީހަކަށް ފަސް އަހަރު ދުވަހަށް ކުއްޔަށް ދޭ ކަމަށް ހަދައި އޮޅުވާލައިގެން 364،500.ރ ހޯދިކަން ސާބިތުވެ، މ.ފާގަތިގެ، އިބްރާހީމް ހުނައިން ތިން އަަހަރާއި ދެ މަހަށް ޖަލަށް ލާން ކްރިމިނަލް ކޯޓުން މިއަދު ހުކުމްކޮށްފި އެވެ.
މ. ފާގަތިގޭގެ އެޕާޓްމަންޓެއް ކުއްޔަށް ދިނުމުގެ ނަމުގައި އޮޅުވާލައިގެން އެހެން އެތައް ބައެއްގެ އަތުން ވެސް ގިނަ އަދަދެއްގެ ފައިސާ ހޯދި ކަމަށް ތުހުމަތުކުރެވޭ ހުނައިނު ޖަަލަށްލާން ކްރިމިނަލް ކޯޓުން މިއަދު ހުކުމްކުރީ އދ.މާމިނގިލި، ފްރީޕާކް އަހުމަދު އަފްޒަލްގެ އަތުން އޮޅުވާލައިގެން 364،500.ރ ނެގިކަން ސާބިތުވެގެންނެވެ. އެ މައްސަލާގައި ހުނައިނާ ދެކޮޅަށް ދައުލަތުން އުފުލީ ގާނޫނުލް އުގޫބާތުގެ 212 ވަނަ މާއްދާގެ (ހ) ގައި ބަޔާންކުރާ މަކަރާއި ހީލަތް ހެދުމުގެ ކުށުގެ ދައުވާ އެވެ.
ކްރިމިނަލް ކޯޓުގެ ހުކުމުން އެނގޭ ގޮތުގައި ފާގަތިގޭގެ ތިން ކޮޓަރީގެ އެޕާޓްމަންޓް އަފްޒަލަށް ފަސް އަހަރު ދުވަހަށް ކުއްޔަށް ދިނުމުގެ އެއްބަސްވުމެއް ހަދައި، ގޭގެ ވެރިފަރާތް ކަމަށްވާ ހުނައިނުގެ މަންމަ ލައްވާ އޭނާ ސޮއިކުރުވީ މަންމައަށް އޮޅުވާލައިގެންނެވެ.
އަފްޒަލްގެ އަތުން ހޯދި 364،500.ރ މަހަކު 60،000.ރ އަށް ވުރެ މަދުނުވާ ގޮތަކަށް ބަހާލައިގެން ކޯޓަށް ދައްކަން ވެސް ކްރިމިނަލް ކޯޓުން ހުނައިނަށް ކުރި ހުކުުމުގައި ވެ އެވެ.
