ޓޫރިޒަމް މިނިސްޓަރު ކަމުގައި ހުންނެވި އިރު އެ މިނިސްޓްރީގެ މުވައްޒަފުންތަކަކަށް ޖިންސީ ގޯނާ ކުރި ކަމަށް ބުނާ މައްސަލައިގައި އަލީ ވަހީދުގެ މައްޗަށް ކުރި ދައުވާތައް ކުރިއަށްނުގެންދަން ޕީޖީ އޮފީހުން ނިންމައިފި އެވެ.
އަލީ ވަހީދުގެ މައްސަލަ ކްރިމިނަލް ކޯޓުގައި ހިނގަމުންދަނިކޮށް، އޭނާ ރާއްޖެއިން ބޭރަށް ފުރި ގޮތަށް އަނބުރާ އައިސްފައި ނުވާތީ، މައްސަލަ ކުރިއަށްނުގެންދެވިގެން، ކޯޓުން ވަނީ ސެޕްޓެމްބަރު 22، 2022 ގައި މައްސަލަ އަނބުރާ ޕީޖީ އޮފީހަށް ފޮނުވާލައިފަ އެވެ. އަދި, ޕީޖީ އޮފީހުން ވަނީ އޭނާ އަނބުރާ އައުމުން މައްސަލަ ފޮނުވަން އެދި އޮކްޓޯބަރު 6، 2022 ގައި މައްސަލަ އަނބުރާ ފުލުހުންނަށް ފޮނުވާލައިފަ އެވެ.
ޕީޖީ އޮފީހުން މިއަދު ނެރުނު ބަޔާނެއްގައި ބުނީ، މައްސަލަ އަނބުރާ ފުލުހުންނަށް ފޮނުވާލި ފަހުން، އަނިޔާ ލިބުނު މީހުންނާއި ހެކީންގެ ގޮތުގައި ބަޔާން ދިން މީހުން މައްސަލަ ކުރިއަށްގެންދަން ބޭނުން ނުވާ ކަމަށް ބަޔާންކޮށް، އެ އޮފީހަށާއި ފުލުހުންނަށް ސިޓީ ފޮނުވާފައިވާ ކަމަށެވެ. އެ މައްސަލައިގެ މުހިންމު ހެކީން، އެ މީހުން ތަހުގީގަށް ދިން ބަޔާންތައް އަނބުރާ ގެންދަން ބޭނުންވާ ކަމަށް ބުނެ ތަކުރާރުކޮށް ފުލުހުންނަށް ސިޓީ ފޮނުވަމުންދާ ކަމަށް ވެސް ޕީޖީ އޮފީހުން ބުންޏެވެ.
އަނިޔާ ލިބުނު މީހުންނާއި ހެކީން ފޮނުވަމުން ދިޔަ ސިޓީތަކާ ގުޅިގެން އެ މީހުންނާ ބައްދަލުކޮށް މައްސަލަ ކުރިއަށްގެންދިޔުމާ މެދު ދެކޭ ގޮތެއް ސާފުކޮށްފައިވާނެ ކަމަށް ޕީޖީ އޮފީހުގެ ބަޔާނުގައިވެ އެވެ. އަދި, އެ މީހުން ބަޔާންތައް އަނބުރާ ގެންދަން ބޭނުންވާއިރު، ހެކިބަހާ ނުލައި މައްސަލަ ކުރިއަށް ނުގެންދެވޭނެތީ ދައުވާތައް ކުރިއަށް ނުގެންދިޔުމަށް ނިންމާފައިވާ ކަމަށް ޕީޖީ އޮފީހުން ބުންޏެވެ.
"އެ މީހުންގެ ހެކިބަހާ ނުލައި މައްސަލަ ކުރިއަށްގެންދިޔުމުގެ ފުރުސަތު އޮތްތޯ ބަލައި ދިރާސާކުރި އިރު މައްސަލައިގެ މައިގަނޑު ހެއްކަކީ އަނިޔާލިބުނު މީހުންނާއި ހެކިންގެ ހެކިބަސް ކަމަށްވެފައި، އެ ހެކީންގެ ހެކިބަހާ ނުލައި މައްސަލަ ސާބިތުކުރެވިދާނެ އެއްވެސް މަގެއް ނެތަތީ، އިސްވެދެންނެވުނު ދައުވާތައް ކުރިއަށްނުގެންދިޔުމަށް ނިންމައި، މައްސަލައަކީ އަނބުރާ ފޮނުވާފައިވާ މައްސަލައެއްގެ ގޮތުގައި، 6 ޖޫން 2023 ވަނަ ދުވަހު މި އޮފީހުން ވާނީ ކަނޑައަޅާފަ," ޕީޖީ އޮފީހުގެ ބަޔާނުގައިވެ އެވެ.
ދައުވާތައް އަނބުރާ ގެންދިޔަސް، މީގެ ކުރިން އަލީ ވަހީދު ސުޕްރީމް ކޯޓުގައި އޮތް އިސްތިއުނާފީ އަޑުއެހުމަކަށް ހާޒިރުނުވި މައްސަލައިގައި އެ ކޯޓުގެ ހުރުމަތް ކެނޑި ކަމަށް ބަލައި އޭނާ ދެ މަހާއި 12 ދުވަހަށް ޖަލަށްލާން އޮތީ ހުކުމްކޮށްފަ އެވެ. އެހެންވެ، އޭނާ އަނބުރާ ރާއްޖެއަށް އަޔަސް އެ ހުކުމް ތަންފީޒު ކުރަން ޖެހޭނެ އެވެ.
މައްސަލައިގެ ފަސްފަހަތް
އަލީ ވަހީދު ރާއްޖެއިން ފިއްލެވީ ފެބްރުއަރީ 10، 2021 ގަ އެވެ. އޭގެ ފަހުން އޭނާ ހައްޔަރުކޮށްގެން ޝަރީއަތަށް ހާޒިރު ކުރުމަށް ނޮވެމްބަރު 28، 2021 ގައި ކޯޓުން އަމުރެއް ނެރުނު ނަމަވެސް މިހާތަނަށް އޭނާ ރާއްޖެއަށް ގެނެވިފައެއް ނުވެ އެވެ.
އަލީ ވަހީދު އިނގިރޭސިވިލާތަށް ވަޑައިގަތީ އޭނާގެ ޕާސްޕޯޓް ހިފަހައްޓަން ނެރެފައި އޮތް އަމުރު ކްރިމިނަލް ކޯޓުން ބާތިލްކޮށް ބޭސްފަރުވާއަށް ފުރުމުގެ ހުއްދަ އެ ކޯޓުން ދިނުމުންނެވެ. އޭނާގެ ޕާސްޕޯޓް ދޫކުރީ ޖާމިނުވާ މީހެއްގެ ގޮތުގައި ޔޫތު މިނިސްޓްރީގެ ސްޓޭޓް މިނިސްޓަރު އަސްއަދު އަލީ އެއްބަސްވުމުންނެވެ. އެ އެއްބަސްވުމުގެ މުއްދަތު ހަމަވިއިރު ވެސް އަލީ ވަހީދު ރާއްޖެ ވަޑައިގެންފައި ނުވެ އެވެ.
ކްރިމިނަލް ކޯޓުގެ އެ ނިންމުން ދައުލަތުން ހައި ކޯޓާއި ސުޕްރީމް ކޯޓުގައި ވެސް އިސްތިއުނާފުކުރި އެވެ. ނަމަވެސް، އަލީ ވަހީދު އުޅޭނޫޅޭ ތަނެއް ނޭނގި، ޗިޓް ނުފޮނުވިގެން އޭނާގެ ޕާސްޕޯޓް ހިފަހައްޓައިދޭން ހައިކޯޓަށާއި ސުޕްރީމް ކޯޓަށް ހުށަހެޅި މައްސަލަ ވެސް ބޭރުކޮށްލީ އެވެ.
އެ ފަހުން ދެވަނަ ފަހަރަށް ޕްރޮސިކިއުޓާ ޖެނަރަލްގެ ފަރާތުން އަލީގެ ޕާސްޕޯޓް ހިފަހައްޓަން ކްރިމިނަލް ކޯޓުގައި އެދުމުން އެ އަމުރު ނެރެނުދިން މައްސަލާގައި ހައިކޯޓަށް ދިޔަ އެވެ. ނަމަވެސް، އަލީގެ ގައިރު ހާޒިރުގައި މައްސަލަ ކުރިއަށް ނުގެންދެވޭނެ ކަމަށް ބުނެ، މައްސަލަ ބަލައިގެންފައިނުވެ އެވެ.
އަލީ ވަހީދު މައްޗަށް ޖިންސީ އަނިޔާ ކުރުމުގެ ދައުވާއަކާއި ޖިންސީ ގޯނާ ކުރުމުގެ ދައުވާ އާއި ޖިންސީ ގޯނާ ކުރަން އުޅުމުގެ ދައުވާ އާއި ރޭޕް ކުރަން އުޅުމުގެ ކުށުގެ ދައުވާ އާއި ބޭއަދަބީ ގޮތުގައި ޖިންސީ ގުނަވަން ހާމަކުރުމުގެ ދައުވާ އާއި ހުއްދަ ނޫން ޖިންސީ މުއާމަލާތެއް ހިންގަން އެދުމުގެ ދެ ދައުވާއެއް ކޮށްފައިވެ އެވެ.
އެ ތުހުމަތުތައް އޭނާގެ މައްޗަށް ކުރުމުން އިސްތިއުފާ ދެއްވުމަށް ރައީސް އިބްރާހިމް މުހައްމަދު ސޯލިހު އެންގެވުމުން ވެސް އިސްތިއުފާ ނުދެއްވުމުން ޖުލައި 9، 2020 ގައި އޭނާ މަގާމުން ވަކިކުރި އެވެ.
