ތިލަފުށީ ފަޅުގައި ވެރިޔަކު ނެތި އޮތް ދަގަނޑު ބޯޓު "ސީހޯމް ސެފަޔާ" ނަގަން ހަވާލުކުރި ޕާކްވަން އިންވެސްޓްމަންޓްއަށް ގްރޭޓާ މާލެ އިންޑަސްޓްރިއަލް ޒޯން ލިމިޓެޑް (ޖީއެމްއައިޒެޑްއެލް) އިން 9.2 މިލިއަން ރުފިޔާގެ ބަދަލެއް ދޭން ސިވިލް ކޯޓުން ހުކުމް ކުރި ހުކުމާ އެއްގޮތަށް ބަދަލު ދޭން ނުޖެހޭކަމަށް ކަނޑައަޅަން ހައިކޯޓްގައި އިސްތިއުނާފުކުރި މައްސަލަ ނިމެނިކޮށް، ޖީއެމްއެލްޒެޑްގެ ބެލެނިވެރިކަން ފަހުން ލިބުނު އާބަންކޯއިން އެ މައްސަލަ އަނބުރާ ނަގައިފި އެވެ.
އެ މައްސަލަ ހައިކޯޓަށް ހުށަހެޅި ފަހުން ސަރުކާރުން ވަނީ ޖީއެެމްއެލްޒެޑް، އާބަންކޯ (ކުރީގެ އެޗްޑީސީ)އާ އެއްކޮށްލަައިފަ އެވެ. އެހެން ނަމަވެސް ޝަރުއީ މަރުހަލާގައި އެ މައްސަލަ ރެކޯޑްކޮށްފައި ވަނީ ޖީއެެމްއެލްޒެޑްގެ ނަމުގައި ކަމަށް ވާތީ މައްސަލަ އަނބުރާ ގެންދަން އާބަންކޯއިން މިމަހުގެ ހަތް ވަނަ ދުވަހު ހައިކޯޓަށް ސިޓީއެއް ފޮނުވީ ޖީއެމްއެލްޒެޑްގެ ނަމުގަ އެވެ. އެ ސިޓީގައި ބުނެފައި އޮތީ އެ މައްސަލައިގައި ދެ ފަރާތުގެ ދެމެދު ކޯޓުން ބޭރުގައި ވާހަކަ ދެކެވި ސުލްހަވެރި ހައްލެއް ގެނެވިފައިވާތީ މައްސަލައިގެ ދައުވާ ފޯމު ބާތިލުކޮށްދިނުމަށް އެދޭ ކަމަށެވެ.
ޑިސެމްބަރު 15، 2020ގައި ހައި ކޯޓުގައި ރަޖިސްޓްރީ ކުރި މައްސަލައިގެ ފޯމު އެ ކޯޓުން އިއްޔެ ބާތިލު ކުރީ އެސިޓީ އާ ގުޅިގެންނެވެ.
ބޯޓު ކީހައި އެތަނުން ނަގަން ޖީއެމްއައިޒެޑްއެލްއިން ހަވާލު ކުރި ޕާކަވަން އިންވެސްޓްމެންޓް ކިޔާ އަމިއްލަ ކުންފުނިން އެ މަސައްކަތް ކުރަމުން ދަނިކޮށް އެކަން ހުއްޓުވުމުން، އެ ކުންފުންޏަށް ލިބުނު ގެއްލުމުގެ ބަދަލުގެ ގޮތުގައި 780،000 ޑޮލަރު (10.9 މިލިއަން ރުފިޔާ) ނަގައިދިނުމަށް އެދި ސިވިލް ކޯޓުގައި ދައުވާ ކުރުމުން އެ ކޯޓުގެ ގާޒީ އަލީ ނަސީރު ހުކުމްކުރެއްވީ، ޕާކަވަންއަށް 9.2 މިލިއަން ރުފިޔާގެ ބަދަލެއް ނަގައިދިނުމަށެވެ.
އެ ނިންމުން ޖީއެމްއައިޒެޑްއެލްގެ ފަރާތުން ހައި ކޯޓުގައި އިސްތިއުނާފު ކުރުމުން ތިން އަޑުއެހުމެއް ބާއްވައި، މައްސަލަ އޮތީ ނިންމުމާ ހިސާބަށް ގޮސްފަ އެވެ.
ޕާކަވަން ކުންފުންޏާއެކު ކޯޓުން ބޭރުގައި އެއްބަސްވި ގޮތް ހޯދަން އާބަންކޯގެ މީޑިއާ ޓީމަށާއި އެ ކުންފުނީގެ އެމްޑީ އަހުމަދު އާތިފަށް މި ނޫހުން ގުޅުމުން ފޯނަށް ޖަވާބުދެއްވާފައި ނުވާތީ ސްޓޭންޑް ބަދަލުވި ސަބަބެއް އަދި ކޯޓުން ބޭރުގައި ޕާކަވަން ކުންފުންޏާއެކު އެއްބަސްވި ގޮތެއް އެނގިފައި ނުވެ އެވެ.
ފަނޑިޔާރުންގެ ރައުޔު ތަފާތުވުން
މި މައްސަލައިގެ ދައުވާ ފޯމު ބާތިލު ކުރުމާ މެދު ހައި ކޯޓުގައި މައްސަލަ ބެލި ބެންޗުގެ ހިޔާލު ތަފާތުވި އެވެ. އެގޮތުން، ފަނޑިޔާރު ހުސެއިން މަޒީދުގެ ރައުޔަކީ، މައްސަލަ ބާތިލު ކުރަން ނުޖެހޭ ކަމަށެވެ.
އޭނާގެ ރައުޔުގައި ވަނީ، ތިން އަޑުއެހުމެއް ބާއްވައި، ކޯޓުގެ ވަގުތުތަކެއް އެކަމަށް ހޭދަވެފައިވާއިރު، މައްސަލައިގައި ހުކުމް ކުރުމަށް ދިރާސާ ކުރުމުގެ މަރުހަލާގައި އޮއްވާ، ރައްޔިތުންގެ ފައިސާއާ ގުޅުން ހުރި މިފަދަ މައްސަލައެއް ކޯޓުން ހުކުމް ކުރުމަކާ ނުލައި ފޯމު ބާތިލު ކުރަން ޖެހޭ ކަމަށް މައްސަލައިގެ ވަށައިގެންވާ ކަންކަމަށް ބަލާއިރު ނުދެކޭ ކަމަށެވެ. އަދި ބާތިލު ކުރަން ޖެހޭ ހަރުދަނާ ގާނޫނީ ސަބަބެއް ނުފެންނަ ކަމަށް އެ ރައުޔުގައިވެ އެވެ.
"ދައުލަތުގެ އިދާރާތަކުން ނުވަތަ ދައުލަތުގެ ކުންފުނިތަކުން ހުށަހަޅާ މިފަދަ މައްސަލަތަކުގައި ހުކުމާ ހަމައަށް ވާސިލުވެފައިވަނިކޮށް މަގުބޫލު ސަބަބެއް ބަޔާންކުރުމެއް ނެތި އިސްތިއުނާފުކުރި ސްޓޭންޑް ބަދަލުކޮށް ދެފަރާތުން ކޯޓުން ބޭރުގައި ސެޓްލްމަންޓް ހެދުމަށް ނުވަތަ ސުލްހަވެރި ހައްލެއް ލިބިފައިވާކަމަށް ބުނާ ބުނުމަކަށް ދައުވާ އަނބުރާ ގެންދިއުމަށް ދިވެހިރާއްޖޭގެ ހައިކޯޓުން ފުރުސަތުދިނުމަކީ ރަނގަޅުގޮތެއްކަމުގައި ނުދެކެމެވެ." ފަނޑިޔާރު މަޒީދުގެ ރައުޔުގައިވެ އެވެ.
އެެހެންނަމަވެސް، ދެން ތިއްބެވި ދެ ފަނޑިޔާރުން ހަސަން ޝަފީއު އަދި މުހައްމަދު ސަލީމްއަށް ފެނިވަޑައިގަތީ މައްސަލަ ހުށަހެޅި ފަރާތުން އެދުނު ގޮތަށް މައްސަލަ ބާތިލުކޮށްދިނުމަށެވެ.
ތިލަފުށީ ފަޅުގައި ގަވައިދާ ހިލާފަށް އަޅާފައި އޮތް ސީހޯމް ސެފަޔާ ތިރީސް ދުވަހުގެ ތެރޭގައި އެތަނުން ނެގުމަށް މަސައްކަތް ހަވާލުކުރީ، އެ ބޯޓުގެ މިލްކުވެރިކަން ވެސް ޕާކަވަންއަށް ދޭ ގޮތަށެވެ. ޕާކްވަން ކުންފުނިން ބޯޓު ނައްތަލުމުގެ މަސައްކަތް ކުރަމުންދަނިކޮށް، އެކަން ހުއްޓުވާލީ ގުރައިދޫ ކޯޓުގެ އަމުރެއްގެ ދަށުން ފުލުހުން ގެނެސްގެންނެވެ.
މި ބޯޓުގެ ނައްތާލުމަށް ޕާކަވަންއާ ހަވާލު ކުރި މައްސަލައާ ގުޅިގެން ޖީއެމްއައިޒެޑްއެލްގެ ވެރިން މަޖިލީހުގެ ރައްޔިތުންގެ މަޖިލީހުގެ ސަރުކާރު ކުންފުނިތަކާ ބެހޭ ކޮމިޓީ (އެސްއޯއީ ކޮމިޓީ) އަށް ހާޒިރު ކުރި އެވެ. އަދި އެ މައްސަލައިގައި އިހުމާލުވި އެންމެނަށް ފިޔަވަޅު އަޅަން ލަފާ ދިނުމަށް ވެސް އެ ކޮމިޓީއިން ނިންމާފައިވެ އެވެ.
