ވެރިކަން ހިންގާ މާލޭގައި ދިރިއުޅޭ ރައްޔިތުންނަށް ޗަމްޕާ ބްރަދާސްގެ ފަރާތުން އެހީވުމުން މާލޭ ސިޓީ ކައުންސިލުން އެކަމުގެ އަގުވަޒަންކޮށްފި އެވެ.
ނިމިދިޔަ މި އަހަރުގެ ރޯދަ މަހާ ދިމާކޮށް މާލެއަށް ބެހުމަށް 10 ޓަނުގެ ކަރަލާއި ކާށި ޗަމްޕާ ކުންފުނިން ކައުންސިލާ ހަވާލު ކުރި އެވެ. ކައުންސިލުން ވަނީ 50،000 އަށް ވުރެ ގިނަ ކާށި ބަހައިފަ އެވެ. އަދި 4650 ކަރާ ވެސް ކައުންސިލުން ބެހި އެވެ.
އުއްޗު ރޯދަ މަހު ބެހި ކަރާ: 10 ޓަނުގެ ކަރަލާއި ކާށި ބެހި -- ފޮޓޯ: ކައުންސިލް
ޗަމްޕާ ކުންފުނީގެ އަގުވަޒަންކޮށް މާލޭގެ މޭޔަރު ޑރ. މުހައްމަދު މުއިއްޒު މިއަދު ޗަމްޕާގެ ވެރިޔާ އަހުމަދު މޫސާ (އުއްޗު) އަށް ވަނީ ފިލައެއް އަރުވައިފަ އެވެ.
މިމަހުގެ ތެރޭގައި އުއްޗު ވަނީ ހއ. ހޯރަފުށީ ސްކޫލަށް 1.1 މިލިއަން ރުފިޔާ ހަދިޔާކޮށްފަ އެވެ. އޭނާއަކީ ދާއިމީކޮށް ބައެއް ކަންކަމަށް އަދި ތަންތަނަށް އެހީ ދެމުން އަންނަ މީހެކެވެ. އެގޮތުން ސިފައިންގެއަށް ވެސް ގަވާއިދުން އެހީވެ އެވެ.
އުއްޗުއަކީ ދިވެހިރާއްޖޭގެ އެންމެ މުއްސަނދި އެއް ކުންފުނި ކްރައުން އެންޑް ޗަމްޕާގެ އެއް ވެރިޔާ އެވެ. ކްރައުން އެންޑް ޗަމްޕާއިން 10 ރިސޯޓެއް ރާއްޖޭގައި ހިންގާއިރު 2000 އެއްހާ މުވައްޒަފުން ގެންގުޅެ އެވެ.
