މީހެއްގެ އީމެއިލް އެޑްރެހާއި އިންޓަނެޓް ބޭންކިން މެދުވެރިކޮށް ފައިސާ ޓްރާންސްފާ ކުރާއިރު، ބީއެމްއެލްއިން ފޯނަށް ފޮނުވާ އޯޓީޕީ ނަމްބަރެއް އޮޅުވާލައިގެން ހޯދައި އެ މީހާގެ އެކައުންޓުން ގިނަ އަދަދެއްގެ ފައިސާ ވަގަށްނެގި މައްސަލައެއްގައި މީހަކު ހަ މަހާއި 18 ދުވަހަށް ޖަލަށްލުމަށް އިއްޔެ ހުކުމްކޮށްފި އެވެ.
އޭގެ އިތުރުން 530 ގަޑިއިރު މުޖުތަމައަށް ހިދުމަތް ކުރަން ވެސް އޭނާގެ މައްޗަށް ކްރިމިނަލް ކޯޓުން އަމުރު ކުރި އެވެ.
މ. ނާސްލީމަންޒިލް، ހަސަން ރިޔާޒާއި، ވ. އާއަލި، އައިޝަތު ރަފާގެ މައްޗަށް، އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތުގައި ބާރު ހިންގުމުގެ ދައުވާ ކުރީ މެއި 5، 2022 ވަނަ ދުވަހު، އެޗްޑީސީގެ ފަރާތުން ކަމަށް ބުނެ މީހަކަށް ގުޅައި އެ މީހާގެ އީމެއިލް އެޑްރެހާއި އިންޓަނެޓް ބޭންކިން އޯޓީޕީ ހޯދައިގެން، އޭނާގެ އެކައުންޓުގައި ހުރި ގިނަ އަދަދެއްގެ ފައިސާ ރިޔާޒާއި ރަފާގެ އެކައުންޓަށް ޖަމާކޮށްފައިވާތީ އެވެ.
ދައުލަތުގެ ދައުވާގައިވާ ގޮތުން ރިޔާޒު އެ މީހާގެ އެކައުންޓުން ނަގާފައި ވަނީ 25،000ރ. އެވެ. އަދި ރަފާ ނަގާފައި ވަނީ 16،000ރ. އެވެ. އެ ފައިސާ އަކީ އަމިއްލަ ފައިސާ ނޫންކަން އެނގި ހުރެ، އެ ދެ މީހުން ވެސް ކ. ކާށިދޫގައި ހުންނަ ބީއެމްއެލްގެ އޭޓީއެމްއިން އެ ފައިސާ ނަގާފައިވާ ކަމަށް ދައުލަތުގެ ދައުވާގައިވެ އެވެ.
ކްރިމިނަލް ކޯޓުގައި ދައުވާ އިއްވުމުން، ރިޔާޒު ވަނީ ދައުވާއަށް އިއުތިރާފުވެފަ އެވެ. އެހެންވެ، އޭނާގެ މައްސަލަ ކުރިއަށްގެންދިޔައީ އަވަސް ނިޔާގެ މައްސަލައެއްގެ ގޮތުގަ އެވެ.
ރިޔާޒު ކޯޓުގައި އެދުނީ އޭނާއަށް ޖަލު އަދަބު ނޫން އަދަބެއް ދިނުމަށެވެ. އޭނާ ބުނީ، އޭނާ އަކީ ޓެކްސީ ޑްރައިވަރެއް ކަމަށާއި ޖަލަށްލައިފި ނަމަ ދަރިފުޅު ވަރަށް ބިކަވާނެ ކަމަށެވެ.
އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތުގައި ބާރު ހިންގުމުގެ ދައުވާއަށް އޮންނަ އަސާސީ އަދަބަކީ ނުވަ މަހާއި 18 ދުވަހަށް ޖަލަށްލުމެވެ. ދައުވާއަށް އިއުތިރާފުވެއްޖެ ނަމަ އަދަބު ދަރަޖަ އެއް ދަރަޖަ ލުއިވާނެ އެވެ.
އެ މައްސަލައިގައި ރިޔާޒު އިއުތިރާފުވި ނަމަވެސް، މީގެ ކުރިން އޮކްޓޯބަރު 26، 2021 ގައި އޭނާ އެނގި ހުރެ ހުއްދަ ނޫން ތަނަކަށް ވަނުގެ މައްސަލައެއްގައި ކުށް ސާބިތުވެފައިވާތީ، ކުށަށް އިއުތިރާވުމުން ލިބޭ ލުއި އޭނާއަށް ނުލިބެ އެވެ.
އެކަމަކު، އަދަބު ވީހާ ވެސް ލުއިކޮށްދޭން އެދިފައިވާއިރު، އޭނާގެ ސިއްހީ ހާލަތާ ގުޅިގެން ހުށަހެޅި ލިޔުންތަކަށް ބަލާފައި ކޯޓުން ނިންމީ އަދަބުގެ އެއްބައި މުޖުތަމައަށް ހިދުމަތް ކުރުމަށް ބަދަލު ކުރުމަށެވެ. އެގޮތުން އޭނާގެ މައްޗަށް ހުކުމް ކުރީ، ހަ މަހާއި 11 ދުވަހަށް ޖަލަށްލުމާއެކު 530 ގަޑިއިރު މުޖުތަމައަށް ހިދުމަތް ކުރުމަށެވެ.
ރަފާ ކްރިމިނަލް ކޯޓުގައި ބުނީ، އޭނާގެ އެކައުންޓަށް ފައިސާ ޖަމާ ކުރީ ރައްޓެއްސަކު ކަމަށާއި އެއީ ވައްކަން ކޮށްގެން ހޯދި ފައިސާ ކަމެއް އޭނާއަށް ނޭނގޭ ކަމަށެވެ. އެ ރަހުމަތްތެރިޔާ އެދުނީ، އޭނާގެ ބޭންކު ކާޑު ހަލާކުވެފައިވާތީ، މުސާރަ ޓްރާންސްފާ ކުރުމުން ނަގުދު ފައިސާއިން ނަގައިދިނުމަށް ކަމަށް ރަފާ ކިޔައިދިނެވެ.
ވަކީލަކު ހަމަޖައްސުމުން ބޭއްވި އަޑުއެހުމުގައި ރަފާގެ ވަކީލު ބުނީ، މި މައްސަލައާ ގުޅިގެން ދައުލަތާއެކު މަޝްވަރާ ކުރުމަށާއި މުރާޖައާ ކުރުމަށް ފުރުސަތު ބޭނުންވާ ކަމަށެވެ. އެކަމަށް ދައުލަތުން އިއުތިރާޒު ނުކުރުމުން، ކޯޓުން ނިންމީ ރަފާގެ ބައި ވަކި ގަޒިއްޔާއެއްގެ ގޮތުގައި ކުރިއަށްގެންދާށެވެ.
