އިދިކޮޅުގެ މުޒާހަރާއެއްގެ ތެރެއިން ހައްޔަރު ކުރި އަށް މީހަކު ބަންދު ކުރަން ގެންދިޔުމުން، އެކި ޝަރުތުކޮށްފައި ދޫކޮށްލި އަމުރުތައް ގާނޫނާ ހިލާފަށް ކަމަށް ކަނޑައަޅައި އެ އަމުރުތައް ބާތިލު ކަމަށް ހައި ކޯޓުން މިއަދު ކަނޑައަޅައިފި އެވެ.
އިދިކޮޅުން މާލޭގައި ކުރަމުން ދިޔަ ސިލްސިލާ މުޒާހަރާތަކުގެ ތެރެއިން، މިދިޔަ އޭޕްރިލް 13 ވަނަ ދުވަހު މުޒާހަރާގެ ބައެއް ބައިވެރިން އާރްޓީއެލްގެ ބަހަކަށް މަގުމަތިން ހުރަސްއެޅި މައްސަލައެއްގައި އަށް މީހަކު ހައްޔަރުކޮށް، ފުލުހުން ކްރިމިނަލް ކޯޓުގައި އެދުނީ އެ އަށް މީހުން 15 ދުވަހަށް ބަންދުކުރާށެވެ. ފުލުހުން ބުނީ އެ މީހުން، ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނާއި ހިލާފަށް އެއްވެ، އާންމު ދަތުރުފަތުރު ކުރުމަށާއި ފުލުހުންގެ ދައުރު އަދާކުރުމަށް ހުރަސްއަޅާފައިވާ ކަމަަށެވެ.
އެ އަށް މީހުން 15 ދުވަހަށް ބަންދު ކުރަން އެދުމުން ކްރިމިނަލް ކޯޓުން ނިންމީ ޝަރުތުކޮށްފައި އެ މީހުން ދޫކޮށްލާށެވެ. އެގޮތަށް ދޫކުރީ، ފުލުހުންނަށް ބަންދުގައި ބަހައްޓަން ޖެހޭ ސަބަބެއް ބުނެނުދެވޭ ކަމަށް ބުނެ އެވެ.
ބައެއް މީހުންނަށް ގެއިން ބޭރަށް ނުކުމެވޭނެ ކާފިއުއެއް ކަނޑައެޅި އިރު، އެކި މީހުންނަށް ކުރީ އެކި ޝަރުތެވެ. އެގޮތުން ހަ މީހަކަށް ވަކި ވަގުތެއްގައި ނޫނީ ގެއިން ބޭރަށް ނުނިކުމެވޭ ގޮތަށް "ކާފިއު"އެއް ހެދި އިރު، އެފަދަ ޝަރުތެއް ނުކޮށް ދެ މީހަކު ދޫކޮށްލި އެވެ. ކާފިއު ދީފައި ދޫކޮށްލި މީހުންގެ ތެރެއިން ފަސް މީހަކު ރޭގަނޑު 9:00 އިން ފެށިގެން ހެނދުނު 6:00 އަށް ގެއިން ބޭރަށް ނުދިޔުމަށް ޝަރުތުކުރި އިރު، ރޭގަނޑު 8:00އިން ފެށިގެން ހެނދުނު 6:00 އަށް ގެއިން ބޭރަށް ނުނިކުތުމަށް ވެސް މީހަކަށް ޝަރުތުކުރި އެވެ.
އޭގެ އިތުރުން، އުޅޭ އެޑްރެސް ނުވަތަ ނަމްބަރު ބަދަލުވެއްޖެ ނަމަ ފުލުހުންނަށް އެންގުމަށް ފަސް މީހަކަށް ޝަރުތުކުރި އެވެ. ހައްޔަރު ކުރި ހުރިހާ އެންމެނަށް ވެސް ކުރި ޝަރުތުތަކުގެ ތެރޭގައި ހިމެނެނީ ހަމައެކަނި، ފުލުހުންގެ ތަހުގީގަށް އެއްބާރުލުން ދިނުމަށާއި، ފުލުހުންގެ ހުއްދަ ލިޔުމުން ހޯދައިގެން ނޫނީ މާލެއިން ބޭރަށް ނުދިޔުމެވެ.
ކްރިމިނަލް ކޯޓުން އެ އަމުރުތައް ނެރުނީ، އެފަދަ އަމުރުތައް ނެރޭ އިރު އަމަލު ކުރަން ޖެހޭ ގާނޫނީ އުސޫލުތަކާ ހިލާފު ކަމަށް ބުނެ އެ އަށް މީހުންގެ ފަރާތުން ދަށު ކޯޓުން ނެރުނު އަމުރުތައް ހައި ކޯޓުގައި އިސްތިއުނާފު ކުރި އެވެ.
ހައި ކޯޓުގެ ފަނޑިޔާރު ހުޒައިފާ މުހައްމަދު ރިޔާސަތު ބެލެހެއްޓެވި އެ މައްސަލައިގައި، ތިން ފަނޑިޔާރުންގެ އިއްތިފާގުން މިއަދު ހުކުމް ކުރީ، އެ މީހުން ޝަރުތުކޮށްފައި ބަންދުން ދޫކޮށްލަން ނެރުނު އަމުރުތައް ގާނޫނާ ހިލާފު ކަމަށެެވެ.
މީގެ ކުރިން ހައި ކޯޓުން ނިންމާފައިވާ، ޝަހީބު އިބްރާހިމް ވ. ޕީޖީ ގަޒިއްޔާގައި ކޯޓު އަމުރު ނެރުމާ މެދު ކަނޑައެޅި އުސޫލު ހުކުމުގައި ފާހަގަކުރި އެވެ. އެ ގަޒިއްޔާގެ ނިންމުމުގައިވާ ގޮތުން، މީހެއްގެ ބަންދާ މެދު ގޮތެއް ނިންމާއިރު، މީހާއާ ދެކޮޅަށް ހުށަހަޅާ ހެކި ވަޒަންކުރުމަށްފަހު ފަނޑިޔާރު ނިންމާ ގޮތާއި، ގާނޫނު އަސާސީގެ 49 ވަނަ މާއްދާގައި ބުނާ ސަބަބެއް އޮތްކަން ނުވަތަ ނޫން ކަމާއި ފަނޑިޔާރުގެ ނިންމުން ނިންމި ގާނޫނީ ނައްސު، ކޯޓު އަމުރުގައި ސާފުކޮށް އެނގެން އޮންނަންވާނެ އެވެ.
އެ ގަޒިއްޔާގައި އެގޮތަށް ނިންމީ ވެސް، ފަނޑިޔާރުން ނިންމާ ނިންމުންތައް އިސްތިއުނާފު ކުރެވޭނެތީ، އެ ނިންމުމުގައި ގޯހެއް އޮތްކަން ވެސް އެނގޭނީ ފަނޑިޔާރުން އެގޮތަށް ނިންމި ސަބަބު ނުވަތަ ގާނޫނީ ނައްސު ހުލާސާކޮށް ވިޔަސް ބަޔާންކޮށްގެންކަން ހައި ކޯޓުން ފާހަގަކުރި އެވެ.
titledesc
އޭގެ އިތުރުން، ޝަރުތުކޮށްފައި މީހަކު ބަންދުން ދޫކުރެވޭނީ ވެސް އެ މީހަކު ކުށް ކުރިކަމަށް ތުހުމަތުކުރެވޭ ވަރަށް ހެކި ހުރެގެން ކަމާއި އެކަން ކޯޓު އަމުރުން ފެންނަންވާނެކަން ވެސް ހައި ކޯޓުން ފާހަގަކުރި އެވެ.
އެކަމަކު، މި މައްސަލައިގައި ހިމެނޭ އަމުރުތަކުގައި ހެކި ވަޒަން ކުރި ގޮތެއް އަަދި ހެކި ދަރަޖަ ކުރި ގޮތެއް ވެސް އެނގޭކަށް ނެތް ކަމަށް ހުކުމުގައިވެ އެވެ. ހެކި ވަޒަން ކުރި ގޮތެއް ދޭހަވާ ސާފު ގާނޫނީ ނައްސެއް ނުވަތަ އިރުޝާދެއް، އަދި ކުޑަމިނުން "ހެކި" މި ލަފުޒު ވެސް އަމުރުތަކުގައި ނެތް ކަމަށް ހުކުމުގައިވެ އެވެ.
މި މައްސަލައިގައި ފަނޑިޔާރު ހުޒެއިފާ ރައުޔަށް ދެން ތިއްބެވި ދެ ފަނޑިޔާރުން، އަހުމަދު ޝަކީލް އަދި ހުސެއިން މަޒީދު ތާއީދުކުރެއްވި އެވެ.
