މިއަހަރު މިހާތަނަށް ފެމިލީ ކޯޓުން 732 ކައިވެންޏާއި 416 ވަރި ރަޖިސްޓްރީ ކޮށްދީފައިވާ ކަމަށް އެ ކޯޓުން ހާމަކޮށްފި އެވެ.
މި އަހަރުގެ ފުރަތަމަ ހަތަރު މަސް ތެރޭގައި ފެމިލީ ކޯޓުން ވަނީ ކައިވެންޏާއި ވަރީގެ އިތުރުން ވެސް 713 އެހެނިހެން މައްސަލަ ބަލާ ނިންމާފަ އެވެ. އޭގެ ތެރޭގައި އާއިލީ މައްސަލަތަކާއި, ހަރަދުގެ މައްސަލަތަކާއި ކުޑަކުދިންނާއި ގުޅުންހުރި މައްސަލަތައް ހިމެނެ އެވެ.
މި އަހަރު ރަޖިސްޓްރީކުރި ކައިވެނި/ވަރީގެ ތަފާސްހިސާބު:
- ޖެނުއަރީ: 195 ކައިވެނި, 127 ވަރި
- ފެބްރުއަރީ: 178 ކައިވެނި, 98 ވަރި
- މާޗް: 245 ކައިވެނި, 115 ވަރި
- އޭޕްރީލް: 114 ކައިވެނި, 76 ވަރި
މި މުއްދަތުގެ ތެރޭގައި ފެމިލީ ކޯޓުން ވަނީ ވަރިއާ ބެހޭ ޖުމްލަ 556 މައްސަލަ ނިންމާފަ އެވެ. އޭގެ ތެރޭގައި ވަރިވުމަށާއި, ވަރި ކުރުމަށް އަދި ވަރި ސާބިތު ކުރުމަށް ހުށަހެޅި މައްސަލަތަކާއި ވަރިއާ މެދު ޝައްކުވެގެން ހުށަހެޅި މައްސަލަތައް ހިމެނެ އެވެ.
މިއަަހަރުގެ ފުރަތަމަ ހަތަރު މަސް ތެރޭގައި ފެމިލީ ކޯޓަށް ވަނީ ގެވެށި އަނިޔާގެ ޖުމްލަ 25 މައްސަލައެއް ހުށަހަޅާފަ އެވެ. އެ ކޯޓުން ވަނީ އޭގެ ތެރެއިން 17 މައްސަލައެއް ނިންމާފަ އެވެ.
ފެމިލީ ކޯޓުން ނިންމި އިތުރު މައްސަލަތަކަށް ބަލާލާއިރު, ބެލެނިވެރިކަމާއި ބަލަދުވެރިކަން, ވަލީ ހޯދުން, ސުލްހަ ކުރުން, މަރު ސާބިތު ކުރުން އަދި ހުކުމް ތަންފީޒު ކުރުން ހިމެނޭހެން ޖުމްލަ 63 މައްސަލައެއް މިއަހަރު ނިންމާފައި ވެއެވެ.
ހަރަދުގެ މައްސަލަތަކުގެ ތެރެއިން ދަރިންގެ ހަރަދު ހޯދުން, ސާބިތު ހަރަދު ހޯދުން އަދި ދަރިންގެ ހަރަދު ކެނޑުން ހިމެނޭހެން މިއަހަރު ޖުމްލަ 33 މައްސަލައެއް ނިންމި އެވެ.
އޭގެ އިތުރުން ފެމިލީ ކޯޓުން ވަނީ މިއަހަރު ކުޑަކުދިންނާ ގުޅުން ހުރި ޖުމްލަ 44 މައްސަލައެއް ނިންމާފަ އެވެ. އޭގެ ތެރޭގައި ހަޟާނާތުގެ މައްސަލަތަކާއި, ނަސަބު ތަފާތު ކުރުމުގެ މައްސަލަތަކާއި, ދަރިން ނުދެއްލުމުގެ މައްސަލަަތަކުގެ އިތުރުން ފޮސްޓާ ކުރުމާއި ދަރިއަކު ބަލައި ބޮޑުކުރުން އެހެން މީހަކާ ހަވާލުކުރުމުގެ މައްސަލަތައް ހިމެނެ އެވެ.
