އައިޖީއެމްއެޗްގައި ވަޒީފާ އަދާކުރަމުން ދިޔަ ފިލިޕީންސްގެ ނަރުސް މޭރީ ގްރޭސް މަރުވުމުން އެ މައްސަލާގައި ދައުވާ އުފުލާފައިވާ ލަމްހާ އަބްދުލްރަހްމާން މޭރީއާ ދެކޮޅަށް ފުލުހަށް މައްސަލައެއް ހުށަހަޅައިގެން އުޅުނު ކަމަށް ޝަރީއަތަށް ހެކިބަސް ދިން މޭރީގެ އެކުވެރިޔަކު ބުނެފި އެވެ.
މޭރީ ދަންޖެހިފައި ހުއްޓައި ފެނުނު ކަމަށް އޭނާގެ ފިރިމީހާ މާވިން އެސްވައި ވާގަސް ރިޕޯޓް ކުރި ނަމަވެސް އޭނާ މަރާލީ ބޮލަށާއި ކަރަށް ހަމަލާދީ ނޭވާ ހާސްކޮށްލައިގެން ކަމަށް އޮޓޮޕްސީ ރިޕޯޓުން ދައްކަ އެވެ. އޭނާ މަރާލުމުގެ ދައުވާ ފިރިމީހާ މާވިންގެ މައްޗަށް އުފުލާފައިވާއިރު، މަރާލުމުގައި ބައިވެރިވުމުގެ ދައުވާ އުފުލާފައިވާ ލަމްހާއަކީ މާވިންގެ ލޯބިވެރިޔާ އެވެ.
ކްރިމިނަލް ކޯޓުގައި ކުރިއަށްދާ ޝަރީއަތުގައި މިހާރު ހިނގަމުން ދަނީ ދައުލަތުން ހުށަހަޅާފައިވާ ހެކިންގެ ހެކިބަސް ނެގުމެވެ. މިއަދު ބޭއްވި އަޑުއެހުމުގައި ވެސް ތިން މީހަކު ހެކިބަސް ދިނެވެ. ހަތަރު މީހުންގެ ހެކިބަސް ނެގުމަށް ތާވަލުކުރި ނަމަވެސް އެއިން އަކަކު ހެކިބަސް ދޭން ހާޒިރުވެފައެއް ނުވެ އެވެ.
ހެކިބަސް ނެގި ތިން މީހުން؛
- ޝުޒުނާ މުހައްމަދު، އައިޖީއެމްއެޗްގެ ނަރުހެއް އަދި މޭރީގެ އެކުވެރިއެއް
- ސައިފުﷲ އަބްދުލްޣަނީ، އައިޖީއެމްއެޗް އީއާރުގައި މޭރީއަށް ފަރުވާ ދިން ޑޮކްޓަރެއް
- ޝަހީމާ އާދަމް، ސީން އޮފް ކްރައިމް އޮފިސަރެއް
މޭރީގެ އެކުވެރިޔާގެ ބަސް؛
ޝުޒުނާއަކީ އައިޖީއެމްއެޗްގައި މޭރީ މަސައްކަތް ކުރި ޑައިލެސިސް ޑިޕާޓްމެންޓްގައި މަސައްކަތް ކުރަމުންދާ ނަރުހެކެވެ. ހެކިބަސް ދެމުން އޭނާ ބުނި ގޮތުގައި މޭރީ އެހެން އުޅޭއިރު ޒާތީ ދިރިއުޅުމުގެ ކަންކަން އޭނާއާ ހިއްސާކުރެ އެވެ. އެ ގޮތުން ލަމްހާއާއި މާވިންއާ ދެމެދު އޮތް ލޯބީގެ ގުޅުމުގެ ވާހަކަތައް ވެސް އޮތީ ހިއްސާކޮށްފަ އެވެ.
އޭނާގެ ހެކިބަހުގައި އެންމެ ފާހަގަ ކުރެވުނު ކަމަކީ މޭރީއާ ދެކޮޅަށް ފުރައްސާރަ ކުރުމުގެ މައްސަލައެއް ލަމްހާ ހުށަހަޅައިގެން ފުލުހަކު މޭރީއަށް ގުޅި އެވެ. އަދި ބަޔާން ދިނުމަށް ސީކްރެޓް ރެސިޕީއަށް ދިޔުމަށް އެދުމުން އެ ތަނަށް ފުލުސް މީހާއާ ބައްދަލުކުރަން ދިޔަ ކަމަށް ޝުޒުނާ ބުންޏެވެ.
"ޕޮލިސް ސްޓޭޝަނަކަށް ގޮސްފައެއް ނޫން ބަޔާން ނެގީ، ކޮފީއަކަށް އަރާފައި ބަޔާން ނެގީ، މޭރީ ކައިރީ އެހީމަ ބުނީ، ރައީސުލްޖުމްހޫރިއްޔާއާ [އިބްރާހީމް މުހައްމަދު ސޯލިހު] އާ އާއިލީ ގުޅުމެއް އޮންނަ މީހަކަށް ވާތީ، އެކަން މޭރީއަށް ވެސް އެނގޭތީ ޕޮލިސް ސްޓޭޝަނަށް ނުގޮސް ބަޔާން ދިނީއޭ،" ޕޮލިސް ސްޓޭޝަނަކަށް ގޮސް ބަޔާން ނުދިނީ ކީއްވެގެންތޯ މޭރީ ކިޔައިދިންތޯ ދައުލަތުން ސުވާލުކުރުމުން ޝުޒުނާ ބުންޏެވެ.
އެ މީހަކީ ކާކު ކަން ނޭނގޭ ކަމަށް ޝުޒުނާ ބުންޏެވެ. ނަމަވެސް ލަމްހާއާ އޮތް މައްސަލަ ހައްލުކުރަން ނިންމައިގެން އުޅުނު ދުވަސްވަރުގައި މޭރީއާއެކު ސީކްރެޓް ރެސިޕީއަށް ދިޔަ ދުވަހަކު އެ ފުލުސް މީހާއާ ބައްދަލުވި ކަމަށް ޝުޒުނާ ބުންޏެވެ.
މީގެ ކުރިން ވަނީ ފުލުހުގައި މަސައްކަތްކުރާ ލަމްހާގެ އެކުވެރިޔަކު ޝަރީއަތަށް ހެކިބަސް ދީފަ އެވެ. އެކަމަކު މުބީން އެ ދުވަހު ކިޔައިދިން ގޮތުން މޭރީއާ ބައްދަލުކުރީ ސުލްހަކުރަން ލަމްހާ ބޭނުންވާތީ އޭނާގެ މެދުވެރިއެއްގެ ގޮތުގައި މޭރީއާ ބައްދަލުކޮށް ވާހަކަ ދެއްކުމަށް ލަމްހާ އެދުމުން ކަމަށެވެ. މޭރީ މަރުވި ދުވަހު ލަމްހާ ހުރީ ވަރަށް ހިތްހަމަޖެހިފައި ކަމަށް އޭނާ އެ ދުވަހު ބުންޏެވެ.
މައްސަލައިގެ ފަސްފަހަތް؛
މޭރީ ގްރޭސް އަކީ އައިޖީއެމްއެޗްގެ ޑައިލެސިސް ޑިޕާޓްމެންޓްގެ ނަރުހެކެވެ. އޭނާގެ ފިރިމީހާ މާވިންއާއި ލަމްހާއަކީ ކެޝުއަލްޓީގައި މަސައްކަތް ކުރާ ނަރުހުންނެވެ. ފިލިޕީންސްގައި ވަރިކުރުމަކީ މަނާކަމެއް ގޮތުގައި އޮތް އިރު، ލަމްހާއާއި މާވިން އުޅުނީ ސިއްރު ލޯބީގެ ގުޅުމެއް ބާއްވައިގެން ކަމަށް ތުހުމަތު ކުރެ އެވެ.
އޮކްޓޯބަރު 19, 2021 ގައި ގްރޭސް ދަންޖެހިގެން މަރުވި ކަމަށް ބުނެ މާވިން ރިޕޯޓް ކުރިޔަސް ތުހުމަތު ކުރެވޭ ކަންކަން ހުރުމުން ފުލުހުން ތަހުގީގު އިތުރަށް ހިންގަމުން ދިޔައީ އެވެ.
އަދި ގްރޭސް މަރާލި ކަމުގެ ތުހުމަތުގައި މާވިން ހައްޔަރު ކުރީ އެ އަހަރުގެ އޮކްޓޯބަރު 27 ގަ އެވެ. ލަމްހާ ހައްޔަރު ކުރީ އޭގެ 50 ދުވަސް ފަހުން އެ އަހަރުގެ ޑިސެމްބަރު 16 ގަ އެވެ.
މާވިންގެ މައްޗަށް އެނގި ހުރެ މީހަކު މަރާލުމުގެ ކުށުގެ ދައުވާ އުފުލާފައިވާއިރު، ލަމްހާގެ މައްޗަށް ކުރަނީ އެނގި ހުރެ މީހަކު މަރާލުމުގައި ބައިވެރިވުމުގެ ކުށުގެ ދައުވާ އެވެ.
އޭގެ އިތުރަށް އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ދައުވާއާއި ހުއްދަ ނަގައިގެން ކުރަން ޖެހޭ ކަމެއް ހުއްދަ ނުނަގާ ކުރުމުގެ ދައުވާ ވެސް ލަމްހާގެ މައްޗަށް ކުރެ އެވެ. އެ ދައުވާތައް ލަމްހާގެ މައްޗަށް ކުރަނީ އައިޖީއެމްއެޗުން ހުއްދަ ނުނަގައި، ނުރައްކާތެރި ބައެއް ބޭސްތަކެއް ލަމްހާ ނެގި ކަމަށް ތުހުމަތުކޮށެވެ.
މި ދައުވާތަކަށް ލަމްހާ އާއި މާވިން އިންކާރު ކުރުމުން، ކްރިމިނަލް ކޯޓުގައި މިހާރު ކުރިއަށް ދަނީ ދައުވާތައް ސާބިތު ކުރުމަށް ދައުލަތުން ހުށަހަޅާފައިވާ ހެކިންގެ ހެކިބަސް ނެގުމުގެ މަރުހަލާ އެވެ. ދިފާއުގައި މާވިން އަދި ލަމްހާ ވެސް ހެކިތަކެއް ހުށަހަޅާފައިވެ އެވެ.
