މި އަހަރުގެ ފުރަތަމަ ހަތަރު މަހު 539 އެކްސިޑެންޓު މަގުމަތީގައި ހިނގައި 77 މީހަކަށް ހާނީއްކަވެފައިވާ ކަމަށް ފުލުހުން މިއަދު ބުނެފި އެވެ.
ފުލުހުން އާންމު ކުރި މި އަހަރުގެ ފުރަތަމަ ކުއާޓަރުގެ ތަފާސްހިސާބުތަކަށް ބަލާއިރު އެންމެ ގިނައިން އެކްސިޑެންޓު ހިނގާފައި އެންމެ ކާރުބާރުބޮޑު މާލެ ސިޓީގަ އެވެ. މާލޭގައި 516 އެކްސިޑެންޓު ހިނގިއިރު އެއީ މުޅި ރާއްޖޭގައި ހިނގި އެކްސިޑެންޓުގެ ތެރެއިން 95 ޕަސެންޓެވެ.
މިއަހަރު ހިނގި އެކްސިޑެންޓުތަކަށް ބަލާއިރު އެންމެ ގިނައިން އެކްސިޑެންޓުވެފައި ވަނީ ކާރެވެ. އެކްސިޑެންޓުތަކުގައި 341 ކާރު ހިމެނުނެވެ. އެކްސިޑެންޓުވި ސައިކަލުގެ އަދަދަކީ 317 އެވެ. އޭގެ އިތުރުން، ހަ ހެވީ-ވެހިކަލެއް ވެސް އެކްސިޑެންޓުވެފައިވެ އެވެ.
މާލޭގެ އިތުރުން ދެން އެންމެ ގިނައިން އެކްސިޑެންޓު ހިނގީ ފުވައްމުލަކުގަ އެވެ. އެ ރަށުގައި ނުވަ އެކްސިޑެންޓު ހިނގި އެވެ. އަދި އައްޑޫގައި ހަ އެކްސިޑެންޓު ހިނގިއިރު ކުޅުދުއްފުށީގައި ހިނގީ އެންމެ ތިން އެކްސިޑެންޓެވެ.
ފުރަތަމަ ހަތަރު ކުއާޓަރުގައި ޓްރެފިކުގެ ގަވާއިދުތަކަށް އެންމެ ގިނަ މީހުން ހިލާފުވީ ލައިސަންސު ނެތި ވެހިކަލް ދުއްވައިގެނެވެ. އެގޮތުން ލައިސަންސު ނުލައި ސައިކަލު ދުއްވުމުގެ 824 މައްސަލައެއް އޭޕްރީލްގެ ނިޔަލަށް ފުލުހުން ބެލި އެވެ. ދެން އެންމެ ގިނައީ ރޯޑްވާދިނަންސް ނުހައްދައި ދުއްވުމުގެ މައްސަލަ އެވެ. އެފަދަ 283 މައްސަލަ ފުލުހުން ބެލި އެވެ.
