ރައްޔިތުންގެ މަޖިލީހުގެ ނައިބު ރައީސްގެ މަގާމުން ގަލޮޅު އުތުރު ދާއިރާގެ މެމްބަރު އިވާ އަބްދުالله ވަކިކުރުމުގެ މަސައްކަތް ވެރިކަން ކުރާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޕާލިމެންޓަރީ ގްރޫޕުން ފަށައިފި އެވެ.
މަޖިލީހުގެ ތިން ދައުރަށް ވެސް އީވާ އިންތިހާބުވީ އެމްޑީޕީގެ ޓިކެޓުގަ އެވެ. އެހެން ނަމަވެސް, އޭނާ ވަނީ މިއަދު އެ ޕާޓީން ވަކިވެވަޑައިގެންފަ އެވެ.
އީވާގެ މި ނިންމުމާ އެކު އެމްޑީޕީގެ ޕީޖީން އޭނާގެ އިތުބާރު ނެތް ކަމަށް ހުށަހެޅުމުގެ މަސައްކަތް ފަށާފައިވާކަން "އަދަދު" ނޫހަށް ވަނީ ކަށަވަރުވެފަ އެވެ.
އަދި, އެ ކަމަށް ބޭނުންވާ ސޮއި ހަމަކޮށްފައިވާ ކަމަށާއި ހުށަހަޅާނެ ވަގުތެއް ޕީޖީ ގްރޫޕުން ނިންމާނެ ކަމަށް ވެސް "އަދަދު" ނޫހަށް ވަނީ ޔަގީން ކުރެވިފަ އެވެ.
އީވާއަކީ އެމްޑީޕީ އުފެދުނީއްސުރެ އެ ޕާޓީގެ އިސް ސަފުގައި ހަރަކާތްތެރިވަމުންދާ ބޭފުޅެކެވެ. ރައީސް އިބްރާހިމް މުހައްމަދު ސޯލިހުގެ ބައެއް ސިޔާސަތުތަކާއި ހިތްހަމަޖެހިވަޑައިނުގެން ސަރުކާރަށް އޮތް ތާއިދު ރައީސް މުހައްމަދު ނަޝީދު ގެންދެވުމާ އެކު އެމަނިކުފާނު މަސައްކަތް ކުރެއްވީ ވަކި ފެކްޝަނެއް އުފައްދައިގެންނެވެ.
"ފިކުރެއްގެ ދިރުން" ނަމުގައި އުފެއްދި މި ފެކްޝަނުގެ ހަރަކާތްތަކުގައި އެންމެ އިސްކޮށް ހުންނަވާ އެއް ބޭފުޅަކީ އީވާ އެވެ. އެ ފެކްޝަނުގައި ނަޝީދު އާއި އީވާ ހިމެނޭހެން 14 މަޖިލިސް މެންބަރުން ދިޔައީ ހަރަކާތްތެރިވަމުންނެވެ.
އޭގެ ތެރެއިން މެދު ހެންވޭރު ދާއިރާގެ މެންބަރު އަލީ އާޒިމް އެމްޑީޕީން ވަކިކޮށްފައި ވަނިކޮށް މިއަދު އީވާ އާއި އިތުރު 11 މެމްބަރަކު ވަނީ އެމްޑީޕީން ވަކިވެފަ އެވެ. އެމްޑީޕީގައި މަޑުކުރެއްވީ ނަޝީދު އެކަންޏެވެ.
އީވާ މަގާމުން ވަކިކުރުމަށް މީގެކުރިން ވެސް އެމްޑީޕީގެ ތެރެއިން ގޮވާލާފައިވެ އެވެ. މަޖިލީހުގެ ރިޔާސަތުން އަމަލުކުރަނީ ގަވާއިދާ ހިލާފަށް ކަމަށް ބުނެ އެމްޑީޕީގެ ޕީޖީ ގްރޫޕުން ކަންބޮޑުވުން ވެސް ފާޅުކޮށްފައިވެ އެވެ.
މަޖިލީހުގެ ރައީސް ނުވަތަ ނައިބު ރައީސްގެ މަގާމުގައި ހުންނަވާ ބޭފުޅަކު އެ މަގާމުން ވަކިކުރަން ހުށަހެޅޭނީ މަޖިލިހުގެ ޖުމުލަ މެމްބަރުންގެ ހަތަރުބައިކުޅަ އެއްބަޔަށް ވުރެ މަދު ނޫން އަދަދެއްގެ މެމްބަރުންގެ ސޮޔާއެކު ހުށަހަޅާ ގަރާރަކުންނެވެ. އެއީ މިހާރު ތިއްބެވި 87 މެންބަރުންގެ ތެރެއިން 22 މެމްބަރުންގެ ސޮޔެވެ.
ގާނޫނުއަސާސީގައިވާ ގޮތުން ނަމަ ރައްޔިތުންގެ މަޖިލީހުގެ ރައީސް ނުވަތަ ނައިބު ރައީސްގެ އިތުބާރު ނެތް ކަމަށް ދެބައިކުޅަ އެއްބައި މެންބަރުންގެ ވޯޓުން ފާސްވާނެ އެވެ. އެއީ 43 މެންބަރުންނެވެ. އެ އަދަދަށް އެމްޑީޕީގެ ޕީޖީގައި މެމްބަރުން ތިއްބަވާނެ އެވެ.
