މާލޭގެ މޭޔަރު ޑރ. މުހައްމަދު މުއިއްޒު ދިވެހި ދައުލަތާ ދެކޮޅަށް ބޭރުގެ އާބިޓްރޭޝަނަކަށް ދޮގު ބަޔާނެއް ދިން ކަމަށް ބުނާ މައްސަލައިގެ ހުކުމް ކުރުމުގެ އަޑުއެހުން ކްރިމިނަލް ކޯޓުން މާދަމާއަށް ތާވަލުކޮށްފި އެވެ.
މުއިއްޒު ދޮގު ބަޔާނެއް ދިން ކަމަށް ދައުލަތުން ތުހުމަތު ކުރަނީ ހައުސިން ޔުނިޓުތަކެއް ހެދުމަށް ނޫމަޑި ކުންފުންޏާއެކު ސަރުކާރުން ހެދި އެއްބަސްވުން ބާތިލުކުރުމުން ނޫމަޑިން 155 މިލިއަން ޑޮލަރު ހޯދަން ނެދަލޭންޑްސްގެ އާބިޓްރޭޝަންނަށް ހުށަހެޅި މައްސަލައިގަ އެވެ.
އެ މައްސަލައިގައި ޝަރީއަތުގެ މަރުހަލާގައި އެންމެ ފަހު ކަމަކަށް އޮންނަ ހުލާސާ ބަޔާން އިއްވުން ބޭއްވީ މިދިޔަ މަހުގެ 17 ވަނަ ދުވަހު އެވެ. ހުލާސާ ބަޔާނަކީ ޝަރީއަތް ހިނގައިދިޔަ ގޮތާ މެދު ދެކޭ ގޮތާއި، ހިނގި ކަންކަމާއި ފާހަގަ ކުރެވުނު ނުކުތާތައް ހުލާސާ ގޮތެއްގައި ކޮންމެ ހަސްމެއްގެ ފަރާތުން ހުށަހަޅައިދޭ ބަޔާނެކެވެ.
ކްރިމިނަލް ކޯޓުގެ މާދަމާގެ އަޑުއެހުންތަކުގެ ތާވަލުން އެނގޭ ގޮތުގައި އެ މައްސަލަ ނިންމަން ބާއްވާ އަޑުއެހުން ތާވަލުކޮށްފައި ވަނީ މެންދުރު 12:00 އަށެވެ.
ނޫމަޑިއާއެކު ދިވެހި ސަރުކާރުގެ ފަރާތުން ހައުސިން މިނިސްޓްރީން ވެފައިވާ އެއްބަސްވުން އުވާލިއިރު މުއިއްޒަކީ އޭރުގެ ހައުސިން މިނިސްޓަރެވެ.
މުއިއްޒަށް ކުރާ ދައުވާގައި ބުނަނީ ނޫމަޑި މައްސަލާގައި، މަސައްކަތް ޝެޑިއުލްއާ އެއްގޮތަށް ކުރިއަށްދާ ކަމަށް ނެދަލޭންޑްސްގައިި ހުންނަ ޕާމެނެންޓް ކޯޓް އޮފް އާބިޓްރޭޝަނަށް ބަޔާނެއް ދީފައިވާ ކަމަށެވެ. އަދި، އެ ކުންފުންޏަށް އެހެން ޕްރޮޖެކްޓެއް ދިނުމާ ގުޅޭ ގޮތުން ކުރިއަށް ދިޔަ މަޝްވަރާތަކެއްގައި ބައިވެރިވެފައި ނުވާނެ ކަމަށް ބަޔާން ދެއްވާފައިވާ ކަމަށެވެ.
ދައުލަތުން މުއިއްޒުގެ މައްޗަށް ތުހުމަތު ކުރަނީ، ހައުސިން މިނިސްޓަރު ކަމުގެ މަގާމުގައި ހުންނަވައި އޭނާ އަމިއްލައަށް ނިންމެވި ނިންމުންތަކެއް އެއީ ދޮގެއް ކަމަށް ވިދާޅުވެ، މިނިސްޓަރު ކަމުގެ މަގާމުން ވަކިވެވަޑައިގަތުމަށް ފަހު އާބިޓްރޭޝަނަށް ބަޔާން ދެއްވި ކަމުގެ އެވެ.
ދައުވާ ސާބިތުވެއްޖެ ނަމަ، އޭނާގެ މައްޗަށް އަންނާނީ އަސާސީ މިންގަނޑުން ހަތަރު މަހާއި 24 ދުވަހުގެ ޖަލު ހުކުމެކެވެ.
