އިންޑިއާ އެމްބަސީގައި ހުޅު ޖަހަން ގޮވާލި މައްސަލަ އާއި ކްލަބްހައުސްގައި ދެއްކި ވާހަކަތަކާ ގުޅިގެން ދައުލަތުން ދައުވާކޮށްފައިވާ އައްބާސް އާދިލް ރިޒާ މިއަދު ކްރިމިނަލް ކޯޓަށް ހާޒިރުނުވުމުން އޭނާގެ ޝަރީއަތުގެ އަޑުއެހުން ކެންސަލްކޮށްފި އެވެ.
މާލޭގެ އެކި ތަންތަނާއި އިންޑިއާގެ ހައި ކޮމިޝަނުގައި ހުޅު ޖަހަން ގޮވާލި މައްސަލައިގައި ދައުލަތުން އައްބާސްގެ މައްޗަށް އުފުލީ ފަނާކޮށްފާނެ ކަމުގެ ބިރު ދެއްކުމުގެ ދައުވާ އެވެ.
އެ މައްސަލައިގެ ފުރަތަމަ އަޑުއެހުން މިއަދު ހެނދުނު 10:00 އަށް ތާވަލު ކުރި ނަމަވެސް، ކޯޓުން ވަނީ އެ އަޑުއެހުން ކެންސަލްކޮށްފަ އެވެ. ކްރިމިނަލް ކޯޓުގެ މީޑިއާ އޮފިޝަލު ވިދާޅުވީ އެ އަޑުއެހުން ކެންސަލް ކުރަން ޖެހުނީ އަޑުއެހުމަށް އައްބާސް ހާޒިރުނުވުމުން ކަމަށެވެ.
ދައުލަތުން އައްބާސްގެ މައްޗަށް އުފުލާފައިވާ ދައުވާގައިވާ ގޮތުން އޭނާ ވަނީ ޑިސެމްބަރު 22، 2022 ގައި ކްލަބްހައުސްގައި ވާހަކަ ދައްކަމުން، ކުރީގެ ރައީސް އަބްދުﷲ ޔާމީންގެ ޝަރީއަތް ކުރިއަށްދާ ގޮތާ މެދު ހިތްހަމަނުޖެހިގެން މާލޭގެ އެކި ތަންތަނުގައި ހުޅު ރޯކުރަން ގޮވާލައިފަ އެވެ.
އޭގެ އިތުރުން، ޖެހިގެން އައި ދުވަހު އޭނާގެ ނަމުގައިވާ ޓްވިޓާ އެކައުންޓުން ރާއްޖޭގައި ހުންނަ އިންޑިއާގެ ހައި ކޮމިޝަނުގައި ހުޅުޖެހުމަށް ގޮވާލައި ޓްވީޓުކޮށްފައިވާ ކަމަށް ދައުވާގައިވެ އެވެ.
އޭނާގެ މައްޗަށް ދައުލަތުން އުފުލާފައިވާ ދައުވާ ސާބިތުވެއްޖެ ނަމަ އަންނާނެ އަދަބަކީ އެއް އަހަރާއި ހަތް މަހާއި ހަ ދުވަހުގެ ޖަލު ހުކުމެކެވެ.
އައްބާސްއަކީ މީގެ ކުރިން ސަރުކާރުގެ އިސް މަގާމުތަކެއް އަދާކުރި މީހެކެވެ. އޭނާ އަކީ ކުރީގެ ރައީސް ޑރ. މުހައްމަދު ވަހީދު ހަސަންގެ ތަރުޖަމާނުކަން ކުރެއްވުމުގެ އިތުރުން އެ ވެެރިކަމުގައި ފައިނޭންސް މިނިސްޓްރީގެ ސްޓޭޓް މިނިސްޓަރުކަން ވެސް ކުރި މީހެކެވެ.
އޭގެ ފަހުން، ކޮމިޝަނާ ޖެނެރަލް އޮފް ކަސްޓަމްސްގެ މަގާމާއި މެލޭޝިޔާގައި ހުންނަ ސަރުކާރުގެ ޓްރޭޑް ރެޕްރެޒެންޓިވްގެ މަގާމާއި މީރާގެ ބޯޑު މެމްބަރުކަމުގެ މަގާމު ރައީސް އަބްދުﷲ ޔާމީންގެ ވެރިކަމުގައި ފުރި އެވެ.
