މާލެ ސިޓީގެ މަގުތަކުގެ ކަންކަން ބެލެހެއްޓުމަށް ކައުންސިލުން 78 މަގުފާރަވެރިއަކު ނެރެފި އެވެ.
މާލެ ސަރަހައްދުގައި މުޅިން އަލަށް ފެށި މި ހިދުމަތަށް 18 އަންހެން މުވައްޒަފުން އަދި 60 ފިރިހެން މުވައްޒަފުން ނިކުންނާނެ އެވެ. ސިޓީ ކައުންސިލުގެ މި ޔުނިޓުގައި އިސްވެ ހުންނަވާނީ ކުރީގެ ޑެޕިއުޓީ ކޮމިޝަނަރ އޮފް ޕޮލިސް އަހުމަދު ސަައުދީ އެވެ. މަގުފާރަވެރިންގެ ތެރޭގައި ކުރީ ފުލުހުންގެ ހިދުމަތާއި އެމްއެންޑީއެފްގައި މަސައްކަތް ކުރި ބައެއް ފަރާތްތައް ވެސް ހިމެނެ އެވެ.
މަގުފާރަވެރިންގެ މައިގަނޑު ޒިންމާއަކީ މާލޭގެ މަގުތަކުގައި އާންމުންނަށް ދިމާވާ އުނދަގޫތައް ހައްލުކުރުމެެވެ. މަގުތަކުގެ ކަންކަން ހައްލުކުރަނީ އެކަމެއް ރައްދުވާ ފަރާާތާއި ގުޅިގެންނެވެ.
ރޭ މަގުފާރަވެރިންގެ މަސައްކަތް އިފްތިތާހު ކުރުމަށް ޗަމްޕާ ސެންޓަރަލް ހޮޓަލުގައި ބޭއްވި ރަސްމިއްޔާތުގައި މާލެ ސިޓީ ކައުންސިލުގެ މޭޔަރު ޑރ. މުހައްމަދު މުއިއްޒު ވިދާޅުވީ، މަގުފާރަވެރިންގެ ހިދުމަތަކީ ބޮޑު ޒިންމާއެއް ކަމަށާއި، މިއީ އަލަށް ފަށާ މަސައްކަތެއް ކަމަށެވެ.
އަދި މި ހިދުމަތް ފެށުމުން ލިބޭ އެންމެ ބޮޑު ހިތްހަމަ ޖެހުމަކީ "ޗާލު މާލެ ސިޓީ"ގެ ދަށުން ރޭވިފައިވާ ކަމެއް ކުރެވުން ކަމަށް މުއިއްޒު ވިދާޅުވި އެވެ.
"މި ވަޒީފާއަކީ ބޮޑު ޒިންމާއެއް. ވަރަށް ވަރުގަދަ، އަމާނާތްތެރިކަމާ އެކީގައި އަދާކުރަން ޖެހޭ ޒިންމާއެއް. އެ ޒިންމާ އަދާކުރީމާ އަމިއްލަ ނަފްސައް އެލިބޭ އުފާވެރިކަމާ، އެ ޒިންމާ އަދާކޮށްދެވޭ ފަރާތް، މާލޭގެ ރައްޔިތުންނަށް އެލިބޭ ހިތްހަމަ ޖެހުމަކީ އެއީ އަޅުގަނޑުމެން ހޯދަން އަމާޒުކުރަންވީ ކަމަކީ" ރޭ ހިދުމަތަށް ނެރެވުނު މަގުފާރަވެރިންނާ މުހާތަބުކޮށް މުއިއްޒު ވިދާޅުވި އެވެ.
މުއިއްޒު ވިދާޅުވީ މިއީ ކަންކަން ކުރަންވީ މަގު ދައްކައިދިނުމަށާއި، ރަނގަޅުކޮށްދިނުމަށް އުފެއްދި ޔުނިޓެއް ކަމަށެވެ.
"މީކީ ފިޔަވަޅުއަޅަން އުފެއްދި ޔުނިޓެއް ނޫން. ކުއްވެރިކުރަން އުފެއްދި ޔުނިޓެއް ނޫން. މިއީ މަގު ދައްކައިދޭން، މުޖްތަމައުއާ ގުޅިގެން އެންގޭޖްވެގެން މުއާމަލާތްކޮށްގެން ގައިޑްކޮށްގެން ރައްޔިތުންގެ ފަޅީގައި ތިބެގެން ހިންގާނެ ޔުނިޓެއް" މުއިއްޒު ވިދާޅުވި އެވެ.
މަގު ފާރަވެރިން މަސްއޫލިއްޔަތުގެ ތެރޭގައި ހިމެނޭ ކަންކަމަކީ:
- މަގުމަތީގައި އުޅަނދުފަހަރު ދުއްވަނީ ގަވާއިދާ އެއްގޮތަށްތޯ ބެލުން
- ޕާކުކޮށްފައިވާ އުޅަނދުތައް ޕާކުކޮށްފައި ހުންނަނީ ގަވާއިދާ އެއްގޮތަށްތޯ ބެލުން
- މަގުމައްޗާއި ޕޭވްމެންޓްގައި ބަހައްޓާފއިވާ ތަކެތި ހުންނަނީ އާންމުންނަށް އުނދަގޫވާގޮތަށްތޯ ބެލުމާއި ރިޕޯޓު ކުރުން
- އިމާރާތް ކުރުމަށް މަގު ބަންދުކުރަނީ ހުއްދަ ދީފައިވާ ވަގުތުތަކުގައިތޯ އަދި މިންވަރަށްތޯ ބެލުން
- މަސައްކަތް ނިމުމުން ފެންސު ނަގާ ސާފްކުރުމުގެ ކަންކަން ދާ ގޮތް ބެލުން
- މަސައްކަތް ކުރަނީ އިމާރާތް ކުރުމަށް ދެވޭ ހުއްދަތަކާ އެއްގޮތަށްތޯ ބެލުން
- އިމާރާތްތަކުގެ ފެންހޮޅިތަކާއި، ކެފޭ/ރެސްޓޯރެންޓުގެ ދުން ހޮޅިތައް ހުންނަނީ އާންމުންނަށް އުނދަގޫ ނުވާނޭ ގޮތަށްތޯ ބެލުން
މާލޭގެ މަގުތައް ބެލެހެއްޓުމަށް މަގުފާރަވެރިން ނެރުނު އިރު، މިހާރުވެސް ސިޓީ ކައުންސިލުން އަންނަނީ މަގުތައް ބެލެހެއްޓުމަށް ގިނަ މަސައްކަތްތަކެއް ކުރަމުންނެވެ. އެގޮތުން އެކި ތަންތަނަށް ޖަމާވެފައި ހުންނަ ކުނި ނެގުމާއި، މަގުތައް މަރާމާތުކުރުން ހިމެނެ އެވެ.
