މަތީ ފަންގިފިލާތަކުގެ ބެލްކަންޏަށް ނުކުތީމާ ފެންނަން އޮންނާނީ ކަނޑުގެ ރީތި މަންޒަރެކެވެ. ރީތި ގޮތްގޮތަށް ބަނދެފައިވާ ސަފާރީތަކާއި އެހެން ކަނޑު އުޅަނދުތަކުގެ ހަރަކާތްތަކެވެ. ހުޅުމާލޭގެ ފިތުރޯނުމަގުގައިވާ އިމާރާތްތަކުން އެޕާޓްމަންޓް ގަތް މީހުންގެ އުއްމީދަކީ މި އެވެ. ދުނިޔޭގެ ހުރިހާ ތަނެއްގައި ވެސް ބިމާއި އެޕާޓްމަންޓްގެ އަގު ކަނޑައަޅަނީ މިފަދަ ކަންކަމަށް ބަލައިގެންނެވެ.
ހުޅުމާލޭގެ ހުޅަނގު ފަރާތު ފަޅުތެރެއިން ބޮޑުބައެއް ހިއްކައިލާ ވާހަކަ ފެތުރުމާއެކު ބައެއް މީހުން ކަންބޮޑުވި އެއްކަމަކީ މި އެވެ. ސޯޝަލް މީޑިއާ ޓްވިޓާގައި ހިޔާލުފާޅުކުރި އެކަކު ބުނި ގޮތުގައި ހުޅުމާލޭގެ ހުޅަނގު ފަރާތު ފަޅުތެރެއިން އިތުރު ސަރަހައްދެއް ހިއްކާ ނަމަ ފިތުރޯނުމަގުގައި ހުރި އިމާރާތްތަކުގެ ނަން ވެސް ބަދަލުކުރަން ޖެހެ އެވެ. އޭނާ އެހެން ބުނީ ކަނޑު ފެންނަކަން ދޭހަވާ ގޮތަށް ނަންދީފައިވާ އިމާރާތަކަށް ނިސްބަތްކޮށެވެ.
"ރެއިންބޯ އޯޝަން ފްރޮންޓް ދެން ޖެހޭނީ ނަން ބަދަލުކުރަން؟," އޭނާ ބުންޏެވެ.
ހުޅުމާލޭގެ ފޭސް ދެއަކާއި އެކެއްގެ ބައެއް ވެސް ހިމެނޭ ގޮތަށް، ހުޅަނގު ފަރާތު ފަޅުތެރެއިން ބައެއް ހިއްކަން އުޅޭކަން ވަނީ "އަދަދު" އަށް އެނގިފަ އެވެ. އެކަމުގެ މަޝްވަރާ ކުރިއަށްދާ ކަމަށް އާބަންކޯއިން އިއްޔެ ބައެއް މީޑިއާތަކަށް ކަށަވަރުކޮށްދިނެވެ.
އެ ހަބަރު އިއްޔެ ފެތުރުމާއެކު ސޯޝަލް މީޑިއާގައި ހިޔާލުފާޅުކުރި ގިނަ މީހުން އެކަމާ ދެކޮޅެވެ. އެއް ބައެއްގެ ކަންބޮޑުވުމަކީ ހުޅުމާލޭގައި ތަރައްގީކުރަން ޕްލޭންކޮށްފައިވާ ކްރޫޒް ޓާމިނަލް ހަގީގަތަކަށް ހެދުމުގެ ފުރުސަތު ގެއްލުމެވެ. އޭރުން އެ ގެއްލެނީ މުސްތަގުބަލުގެ ޖީލަށް ހުޅުވެން އޮތް ވަޒީފާގެ އެތައް ފުރުސަތެކެވެ.
"މީގެން އިނގެނީ ޕުލޭނެއް ނެތްކަން! ތިތަން ހިއްކާ ހައުސިންގް އެޅީމަ ތިތަނަށް އަންނަ އެންމެން ވަޒީފާ އަކަށް ކީއްކުރަނީ؟ ރައީސް ޔާމީން ފުލެޓު އަޅައިގެން ހުޅުމާލެ ތޮއްޖައްސަނީ ކަމަށް ބުނި މީހުންނަށް ނުވިސްނޭ އޭރު ޖޮބްސް ކުރިއޭޓް ކުރަން ކުރި ޕުލޭންކަން މި ބަދަލު ކުރެވެނީ،" ޓްވިޓާގައި ހިޔާލުފާޅުކުރި މީހަކު ބުންޏެވެ.
އެ މައްސަލާގައި ހިޔާލުފާޅުކުރައްވައި ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސައިން ކުރެއްވި ޓްވީޓެއްގައި ކަންބޮޑުވުން ފާޅުކުރެއްވީ މާލެ ސަރަހައްދުގައި މިހާރުވެސް އޮތް ބޮޑު މައްސަލައެއް ކަމަށްވާ ބަނދަރުގެ ދަތިކަން އިތުރަށް ބޮޑުވާނެތީ އެވެ.
"ހުޅުމާލޭގެ މާސްޓަ ޕްލޭން ބަދަލު ކުރުމަކީ އޭގެ ނޭދެވޭ އަސަރުތައް ތާއަބަދަށް ފޯރާނެ ކަމެއް. މާލޭގެ ބަނދަރުން ޖާގަ ނުލިބިގެން ރައްޔިތުން އުފުލަންޖެހޭ ތަކުލީފުރައް މިހާރުވެސް އިންތިހާއަށް ބޮޑު،" އޭނާ ވިދާޅުވި އެވެ.
ހިޔާލުފާޅުކުރި ގިނަ ބަޔަކު ބުނީ އެ ސަަރަހައްދު ހިއްކައިފި ނަމަ އެކަން ވާނީ އިއާދަނުކުރެވޭ ވަރުގެ ބޮޑު ގެއްލުމަކަށް ކަމަށެވެ. އަދި އެފަދަ ބޮޑު ނިންމުމެއް ނިންމުމުގެ ކުރިން އާންމުންގެ ހިޔާލާއި މަޝްވަރާ ނުހޯދައި ކުރިއަށްދިޔުމަކީ ވެސް ގިނަ ބަޔަކު އެކަމާ ނުރުހިންވި އެއް ސަބަބެވެ.
