ވަކި ދާއިރާއަކުން ހާއްސަވުމަށް ބޭނުންވާ މެޑިކަލް އޮފިސަރުންނަށް އަމާޒުކޮށް ޔުނިވާސަލް ފައުންޑޭޝަނުން ތިން ސްކޯލާޝިޕް ދިނުމަށް ނިންމައިފި އެވެ.
އެކަން ހާމަކޮށް އެ ފައުންޑޭޝަނުން ރޭ ނެރުނު އިއުލާނެއްގައި ބުނެފައި ވަނީ މި ސްކޯލާޝިޕުގެ ދަށުން ދަރިވަރުންގެ ހުރިހާ ހަރަދެއް ކަވަރުކޮށްދޭނެ ކަމަށެވެ. ސްކޯލާޝިޕް ލިބޭ ފަރާތްތަކުގެ ކޯސް ފީ އާއި ދަތުރު ކުލި، މެޑިކަލް އިންޝޫރެންސް އަދި ވިސާ ހަރަދުތައް މި ސްކޯލާޝިޕްގެ ދަށުން ހަމަޖައްސައިދޭނެ އެވެ.
އެއީ ޕޯސްޓު-ގްރެޖުއޭޓު ލެވެލުގެ ސްކޯލާޝިޕެކެވެ. އެ ސްކޯލާޝިޕަށް އެދުމުގެ ފުރުސަތު އަންނަ އޯގަސްޓް 31، ގެ ނިޔަލަށް އޮތީ ހުޅުވާލައިފަ އެވެ.
ޝަރުތުތައް؛
- ދިވެއްސެއް ކަމުގައިވުން
- ޔުނިވާސިޓީ އިން ޖާގަލިބުނު ކަމުގެ ލިޔުން އޮތުން
- އެމްބީބީއެސް ފުރިހަމަކުރުމަށް ފަހު ރާއްޖޭގައި މަދުވެގެން ދެއަހަރު މަސައްކަތްކޮށްފައިވުން
- ކޯސް ފުރިހަމަކުރުމަށް ފަހު ރާއްޖޭގައި މަސައްކަތްކުރަން އެދޭ ފަރާތަކަށްވުން
- ސެލެކްޝަން އިންޓަވިއުއިން ފާސްވުން
އޭގެ އިތުރުން ތައުލީމް ހާސިލުކުރަން އެދޭ ޔުނިވަރސިޓީއަކީ، މެލޭޝިއާ، އިންޑޮނޭޝިއާ، ތައިލެންޑް، ފިލިޕީންސް، ބަންގްލަދޭޝް، އިންޑިއާ، އަދި ސްރީލަންކާ، މި ގައުމުތަކުގައި ހުންނަ ޔުނިވަރސިޓީއަކަށް ވާންޖެހެ އެވެ.
މީގެ ކުރިން ވެސް ޔުނިވާސަލް ފައުންޑޭޝަނުން ވަނީ މިފަދަ ގިނަ ސްކޯލާޝިޕުތަކެއް ދީފަ އެވެ. ސްކޯލާޝިޕް ދިން ފަރާތްތަކުގެ ތެރޭގައި އޭޑީކޭގެ ކުޑަކުދިންގެ ހާއްސަަ ޑޮކްޓަރު ޑރ. އަބްދުﷲ ނިޔާފް ވެސް ހިމެނެ އެވެ.
