ހުޅުމާލޭ ދެ ވަނަ ފިޔަވަހީގައި ތަަރައްގީކުރާ ވިނަރެސް ފްލެޓު ގަަންނަ ފަރާތްތަކުގެ ތެރެއިން ބޭނުން ޔުނިޓެއް ނެގުމުގެ އިހްތިޔާރު ދިނުމުގައި އިސްކަން ދޭނީ އެއްފަހަރާ ތަނުގެ އަގު ދައްކައި ހަލާސްކުރާ މީހުންނަށް ކަމަށް އާބަންކޯއިން ބުނެފި އެވެ.
އާބަންކޯއިން ކުރި އިއުލާނެއްގައި ބުނެފައި ވަނީ ވިނަރެސް ފްލެޓުތައް ގަންނަ މީހުންގެ ތެރެއިން އެއްފަހަރާ އަގު ދައްކާ މީހުންނަށް ޔުނިޓު އިހްތިޔާރުކުރުމުގެ ފުރުސަަތު ދިނުމުގެ ކުރިން އެމީހެއްގެ މާލީ ގާބިލުކަން ހުރި މިންވަރު ބެލުމަށް އިވެލުއޭޝަނެއް ކުރިއަށް ގެންދާނެ ކަމަށެވެ.
"އިސްވެ ދެންނެވުނު އުސޫލުގެ ދަށުން ޔުނިޓު އިހްތިޔާރުކުރުން ކުރިއަށް ދިޔަ ނަމަވެސް، ޔުނިޓު އިހްތިޔާރުކުުރުމަަށް ފަހު ކޮންމެ ފަރާތަތަކަށްވެސް އެފަރާތަކުން އިހްތިޔާރުކޮށްފައިވާ ޕޭމެންޓު މޮޑެލް ބަދަލުކުރުމުގެ އިތުރު އެއް ފުރުސަތު ދިނުމަށް ވަނީ ހަމަޖެހިފަ، " އާބަންކޯއިން ކުރި އިއުލާނުގައި ބުނެފައިވެ އެވެ.
އެއްފަހަރާ ފައިސާ ދައްކާ މީހުން ދައްކަން ޖެހޭ ގޮތަށް ކުރިން އޮތް 50،000ރ. ބުކިންފީ ނުނަގާ ގޮތަށް މިހާރު ނިންމާފައިވާ ކަމަށާއި އެމީހުން ދައްކަން ޖެހޭނީ ތާޑް-ޕާޓީ އިވެލުއޭޝަން ފީ އެކަނި ކަމަށް ވެސް އެއިއުލާނުގައި ބުނެފައިވެ އެވެ.
ވިނަރެސް މަޝްރޫއުގެ ދަށުން އިމާރާތްކުރި ފުލެޓުތަކަކީ ވިއްކާ ފުލެޓުތަކެއް ނަމަވެސް އެތަންތަން ގަތުމުގެ ފުރުސަތު ލިބޭ މީހުން ކަނޑައަޅާފައި ވަނީ ޕޮއިންޓު ދީގެންނެވެ.
ފަންނީ ވަޒީފާތަކުގައި އުޅޭ ފަރާތްތަކާއި މެދުފަންތީގެ އާއިލާތަކަށް އަމާޒުކޮށްގެން ހުޅުމާލޭ ދެ ވަނަ ފިޔަވަހީގައި ތަރައްގީ ކުރި ވިނަރެސްގެ 1344 އެޕާޓުމަންޓު ގަތުމަށް ހުޅުވާލި ފުރުސަތުގައި ޖުމްލަ 1413 ފޯމު ހުށަހަޅާފައިވެ އެވެ. ފޯމު ހުށަހެޅި މީހުންގެ ތެރެއިން ޝަރުތުހަމަވީ 723 މީހުންނެވެ.
