އަލަށް އެކުލަވާލި ހުޅުމާލޭ ޕްލޭނިން އަދި އިމާރާތްކުރުމުގެ ގަވާއިދުގެ ދަށުން ބައެއް ސަރަހައްދުތަކުގައި މިހާރު ހިންގަމުން އަންނަ ގެސްޓް ހައުސްތައް ހިންގިދާނެކަމާމެދު ސުވާލު އުފެދިއްޖެ އެވެ.
އޭޕްރީލް 26 ގައި ގެޒެޓްކުރި އެ ގަވާއިދުގައިވާ ގޮތުން، ގަވާއިދަށް އަމަލު ކުރަން ޖެހޭނީ ހުޅުމާލޭ ނެއިބަހުޑް އެކަކާއި ދޭއް އަދި ތިނެއްގައި އެކަންޏެވެ. އެ ސަރަހައްދުތަކުގައި ކޮށްފައިވާ ބައެއް އިމާރާތްތަކުގައި މިހާރު ކުރަމުން އަންނަ އެއް މަސައްކަތް ކަމަށްވާ ގެސްޓްހައުސް ހިންގުން ވެސް އެގަވާއިދަށް އަމަލުކުރަން ފެށުމުން މަނާވާނެ އެވެ. އެކަން އެނގެނީ އެ ގަވައިދުގެ ހަތް ވަނަ މާއްދާގެ ހ. އިންނެވެ.
"ދިރިއުޅުމަށް ދޫކޮށްފައިވާ ގޯތިތައް ދޫކޮށްފައި ވަނީ އާންމު ދިރިއުޅުމަށް. ނަމަވެސް ބައެއް ހާލަތްތަކުގައި ބިންމަތީ ބައި [ގްރައުންޑް ފްލޯ] އާއި ފުރަތަމަ ފަންގިފިލާ [ފަސްޓް ފްލޯ] އާއި ބޭސްމަންޓް، ދިރިއުޅުން ނޫން ބޭނުންތަކަށް، ކޯޕަރޭޝަން ހުއްދަކުރާ ގޮތެއްގެ މަތިން ބޭނުންކުރެވިދާނެ،" އެ މާއްދާގައި ބުނެފައިވެ އެވެ.
ހުޅުމާލޭގެ ނެއިބަހުޑް އެކަކާއި ދޭއް އަދި ތިނަކުން ދިރިއުޅެން ދޫކޮށްފައިވާ ގޯތިތަކުގައި ކުރުން މަނާ ކަންތައްތައް އެ މާއްދާގެ ށ. ގައި ވަނީ ބަޔާންކޮށްފަ އެވެ. އެއީ:
- ސިނާއީ މަސައްކަތްތައް
- އަލިފާން ހިފާ ޒާތުގެ ތަކެތި ގެންގުޅޭ ނުވަތަ އެފަދަ ތަކެތި ރައްކާކުރެވޭ ތަންތަން ހެދުން
- އާއްމުންނަށް އުނދަގޫވާ ވަރަށް އަޑުގަދަވާ ކަންކަމާއި ވަސްދުވާ ކަންތައްތައް
- ކުނޑި އުފެދޭ ނުވަތަ ހަޑިވާ ފަދަ މަސަައްކަތްތައް
- ގުދަން ކުރުން (ވެއާހައުސް، ސްޓޯރޭޖް ފަދަ ބޭނުންތަކަށް
އެ ނޫން މަސައްކަތްތައް ވެސް ކުރެވޭނީ އެ ގަވާއިދުގެ ހ. ގައި ބުނާ ގޮތުން ފަސްޓް ފްލޯ އާއި ގްރައުންޑް ފްލޯ އަދި ބޭސްމަންޓްގައި އެކަންޏެވެ.
އާ ގަވާއިދުން އުފެދޭ ބޮޑު އަނެއް މައްސަލައަކީ އެ ގަވައިދަށް އަމަލުކުރަން ފެށުމުގެ ކުރިން ކޮށްފައިވާ އިމާރާތްތައް ވެސް ގަވާއިދާ އެއްގޮތަށް ބަދަލުކުރަން ޖެހުމެވެ. އެކަން ބަޔާންކޮށްފައި އޮތީ ގަވައިދުގެ 20 ވަނަ މާއްދާގަ އެވެ.
"...މި ގަވާއިދަށް ޢަމަލުކުރަން ފަށާނީ، ދިވެހި ސަރުކާރުގެ ގެޒެޓުގައި މި ގަވާއިދު ޝާއިއުކުރާ ދުވަހުން ފެށިގެންނެވެ. މި ގަވާއިދަށް ޢަމަލުކުރަން ފަށާ ތާރީހުން ފެށިގެން، ކުރިން އަމަލުކުރަމުން ދިޔަ ހުޅުމާލެ ޕްލޭނިންގ އަދި އިމާރާތް ކުރުމުގެ ގަވާއިދު އުވުނީ. އަދި ހުޅުމާލެ ޕްލޭނިން އަދި އިމާރާތް ކުރުމުގެ ގަވާއިދުގެ ގޮތުގައި އަމަލުކުރާނީ މި ގަވާއިދަށް،" އެ މާއްދާގައިވެ އެވެ.
"ހުޅުމާލެ ޕްލޭނިން އަދި އިމާރާތްކުރުމުގެ ގަވައިދު" ގެ ނަމުގައި ރައްޔިތުންގެ މަޖިލީހުގެ ގަވައިދު ކޮމިޓީން އެކުލަވައިލި އެ ގަވައިދު، ގެޒެޓްކުރަން ހައުސިން މިނިސްޓްރީއަށް ފޮނުވުމުން އެ ގަވައިދު ގެޒެޓް ނުކުރާތީ ކަންބޮޑުވުން ފާޅުކޮށް އެކޮމިޓީން ރިޕޯޓެއް ވެސް އެކުލަވައިލި އެވެ. އެ ގަވާއިދު ހަތް ދުވަހުގެ ތެރޭގައި ގެޒެޓްކުރަން އަންގާ ގޮތަށް އެ ރިޕޯޓް އޮތް ނަމަވެސް އެ ބައި މަޖިލީހުން ފާހެއް ނުކުރެ އެވެ.
"ހުޅުމާލޭ ޕްލޭނިން އަދި އިމާރާތް ކުރުމުގެ ގަވައިދު"ގެ ނަމުގައި 18 ވަނަ ރައްޔިތުންގެ މަޖިލީހުގެ ގަވައިދު ކޮމިޓީން އެކުލަވައިލި އެ ގަވައިދު ގެޒެޓް ނުކޮށްގެން، 19 ވަނަ ރައްޔިތުންގެ މަޖިލީހުގެ ގަވައިދު ކޮމިޓީއަށް ވެސް ހައުސިން މިނިސްޓަރު މުހައްމަދު އަސްލަމް އެތައް ފަހަރަކު ހާޒިރު ކުރި އެވެ. އެ ގަވައިދު ގެޒެޓް ކުރުމާ ދެކޮަޅު ހައްދަވައި، އެ ގަވައިދުގައި ހުރި ގިނަ މައްސަލަތަކެއްގެ ތަފްސީލު މިނިސްޓަރު އޭރު ކޮމިޓީއަށް ދެއްވި އެވެ.
