ވެމްކޯގެ މެނޭޖިން ޑިރެކްޓަރު ޔޫސުފް ސިރާޖް މަގާމުގެ މަސްއޫލިއްޔަތު ތަކުން އެކަހެރިކޮށްފައިވާ ކަމަށާއި އެހެން ނަމަވެސް އޭނާއާ މެދު އެ ފިޔަވަޅު އެޅީ ޖިންސީ ފުރައްސާރައިގެ މައްސަލައެއްގައި ނޫން ކަމަށް ޕްރައިވަޓައިޒޭޝަން އެންޑް ކޯޕޮރަޓައިޒޭޝަން ބޯޑް (ޕީސީބީ) އިން މިރޭ ބުނެފި އެވެ.
ސިރާޒް ސަސްޕެންޑްކުރީ ޖިންސީ ފުރައްސާރައިގެ ތަހުގީގަކަށް ނުފޫޒު ފޯރުވާ ކަމުގެ ތުހުމަތަށް ކަމަށް ސޯޝަލް މީޑިއާގައި އަޑު ފެތުރުނު އިރު ބައެއް މީޑިއާތަކުން ވެސް އެގޮތަށް ރިޕޯޓްކުރި އެވެ.
ނަމަވެސް ޕީސީބީން ނެރުނު ބަޔާނުގައި ބުނީ ސިރާޖާ ގުޅޭ ޖިންސީ ފުރައްސާރައިގެ މައްސަލައެއް ބަލަމުން ނުގެންދާ ކަމަށާއި އޭނާއާ މެދު އެފަދަ ތުހުމަތެއް ވެސް ނެތް ކަމަށެވެ. ޕީސީބީން މިހެން ބުނި އިރު، ސީދާ ގޮތެއްގައި ޖިންސީ ފުރައްސާރައިގެ ތުހުމަތެއް ސިރާޖަށް އޮތް ކަމަކަށް މީޑިއާތަކުން ރިޕޯޓްކޮށްފައެއް ނުވެ އެވެ.
ޕީސީބީގެ ބަޔާނުގައި ބުނީ މަގާމުގެ ޒިންމާތަކުން ސިރާޖް އެކަހެރި ކުރީ ކުންފުނި ހިންގުން ނޫނީ "ގަވަނަންސާ ގުޅޭ މެނޭޖްމަންޓް" މައްސަލައެއްގައި ކަމަށެވެ. ބަލަމުންދާ މައްސަލައިގެ އެއްވެސް ތަފްސީލެއް ޕީސީބީން ދީފައި ނުވި ނަމަވެސް، ކުންފުނީގެ އެތެރޭގެ ތަހުގީގަކަށް ނުފޫޒު ފޯރުވުމަކީ ބަޔާނުގައި ބުުނެފައިވާ ދާއިރާއަށް ފެތޭނެ ތުހުމަތެކެވެ.
"...ވެމްކޯ ބޯޑް މެދުވެރިކޮށް މި ބޯޑުން ބަލަމުން ދަނީ ގަވަނަންސާ ގުޅޭ މެނޭޖްމަންޓް މައްސަލަ އެކެވެ. އެހެންކަމުން މެނޭޖިން ޑިރެކްޓަރު ތަނާޒުލުކުރުވައި މި މައްސަަލަ ބެލުމަކީ އެންމެ ރަނގަޅު ގޮތް ކަމަށް މިބޯޑުން ނިންމާފައި ވާތީވެ، މެނޭޖިން ޑިރެކްޓަރު ޔޫސުފް ސިރާޖް ވަނީ މުސާރައާއި އިނާޔަތްތަކާއެކު ދެ ހަފްތާގެ މުއްދަތަކަށް މަސްއޫލިއްޔަތު ތަކުން އެކަހެރި ކުރެވިފަ އެވެ،" ޕީސީބީގެ ބަޔާނުގައި ބުންޏެވެ.
ސިރާޖް ސަސްޕެންޑް ކުރުމާ ބެހޭ ގޮތުން ބައެއް މީޑިއާތަކުން ކުރިން ރިޕޯޓްކުރި އިރު، އެއީ ޕީސީބީގެ ބަޔާނެއްގައި ބުނި ވާހަކަތަކެއް ކަމަށް ބުނެފައިވާތީ ޕީސީބީގެ ބަޔާނުން އެކަން ދޮގުކުރި އެވެ. އެ ބޯޑުން ބުނީ މި ބަޔާނުގެ ކުރިން އެ މައްސަލައާ ގުޅޭ އެއްވެސް ބަޔާނެއް ނެރެފައި ނުވާނެ ކަމަށެވެ.
