ސަރުކާރު ކުންފުނިތަކުގެ މުވައްޒަފުން ބަލަންޖެހޭނީ ދައުލަތުގެ މުވައްޒަފުންގެ ގޮތުގައި ކަމަށް ސުޕްރީމް ކޯޓުން މިއަދު ކަނޑައަޅައިފި އެވެ.
ސުޕްރީމް ކޯޓުން މިގޮތަށް ނިންމީ ވެމްކޯގެ ކުރީގެ އެމްޑީ މުހައްމަދު ޝިފާއުގެ މައްޗަށް ދައުލަތުން ކުރި ކޮރަޕްޝަންގެ ދައުވާއެއް ބޭރުކޮށްލަން ނިންމި ނިންމުމެއްގެ އިސްތިއުނާފުގަ އެވެ. އެއީ ވެމްކޯއަށް ނުއަގުގައި ބާ ވެހިކަލެއް ގަތް މައްސަލައެއްގަ އެވެ.
އެ މައްސަލައިގައި މިދިޔަ އަހަރުގެ ޑިސެމްބަރު 11، ވަނަ ދުވަހު ކްރިމިނަލް ކޯޓުން ނިންމީ ޝިފާއުގެ މައްޗަށް ކުރި ދައުވާ މައުލޫއީ ގޮތުން ކުރިއަށް ނުގެންދެވޭނެ ކަމަށެވެ. އެއީ އެއް ކުށެއް ދެ ގާނޫނުގައި ބަޔާންކޮށްފައި އޮންނަ ހާލަތުގައި އަމަލު ކުރަން ޖެހޭ އުސޫލާ ހިލާފު ކަމަށް ބުނެ އެވެ. އެ ނިންމުމަށް ހައި ކޯޓުން ވެސް ތާއީދު ކުރި އެވެ. ޝިފާއުގެ މައްޗަށް ކޮރަޕްޝަން މަނާ ކުރުމުގެ ގާނޫނުގެ ދަށުން ކުރި ދައުވާގައިވާ ކުށަކީ ގާނޫނުލްއުގޫބާތުގައި ވެސް ބަޔާންކޮށްފައިވާ ކުށެކެވެ.
ގާނޫނުލްއުގޫބާތުގައި އޮންނަނީ އެ ގާނޫނުގައި ކަނޑައެޅިފައިވާ ކުށަކާއި އެކުށަކާ ގުޅުންހުރި އުސޫލަކާއި އެހެން ގާނޫނެއްގައި ކަނޑައެޅިފައިވާ ކުށަކާއި ނުވަތަ އެކުށަކާ ގުޅުންހުރި އުސޫލަކާ އެއްވެސް ފުށުއެރުމެއްވާ ނަމަ، އެ ހާލަތުގައި އިސްކަންދޭނީ ގާނޫނުލްއުގޫބާތަށް ކަމަށެވެ.
އޭގެ އިތުރުން ހާއްސަ ގާނޫނުތަކެއް ބަޔާންކޮށް، އެއިން ގާނޫނެއްގައިވާ ކުށަކާއި ގާނޫނުލްއުގޫބާތުގައިވާ ކުށަކާ ފުށޫއަރާ ނަމަ އިސްކަން ދޭން ޖެހޭނީ ހާއްސަ ގާނޫނަށް ކަމަށް ބުނެފައިވެ އެވެ.
ދައުލަތުން ހައި ކޯޓުގައި ބުނި ގޮތުގައި ކޮރަޕްޝަން މަނާކުރުމުގެ ގާނޫނުގެ ދަށުން ދައުވާ ކުރީ ގާނޫނުލްއުގޫބާތުގައި "ދައުލަތުގެ މުވައްޒަފުން" ގެ މާނައިގެ ތެރޭގައި ދައުލަތުގެ ކުންފުނިތަކުގެ މުވައްޒަފުން ނުހިމެނޭތީ އެވެ. އެހެންވެ، ދައުލަތުގެ ކުންފުނިތަކުގެ މުވައްޒަފުންނަށް ދައުވާ ކުރެވޭނީ ކޮރަޕްޝަން މަނާ ކުރުމުގެ ގާނޫނުގެ ދަށުން ކަމަށް ބުނެފައިވެ އެވެ.
ޝިފާއުގެ މައްސަލަ ދައުލަތުން ސުޕްރީމް ކޯޓުގައި އިސްތިއުނާފު ކުރުމުން މިއަދު މައްސަލަ ބެއްލެވި ތިން ފަނޑިޔާރުންގެ އިއްތިފާގުން ކުރި ހުކުމުގައި ވަނީ، މި މައްސަލައިގައި ހިމެނޭ ކުށަކީ ދެ ގާނޫނުގައި ވެސް ބަޔާންކޮށްފައިވާ ކުށެއް ކަމާ މެދު ސުވާލެއް ނެތް ކަމަށެވެ. އަދި ހަމައެކަނި ހިލާފު އޮތީ ދައުލަތުގެ މުވައްޒަފުންގެ މާނައިގެ ތެރޭގައި އެސްއޯއީތަކުގެ މުވައްޒަފުން ހިމެނޭތޯ ކަމަށް ފަނޑިޔާރުން ވިދާޅުވި އެވެ.
ގާނޫނުލްއުގޫބާތުގައި "ދައުލަތުގެ މުވައްޒަފުން" މާނަކޮށްފައި ވަނީ ކަނޑައެޅިގެން ސަރުކާރުގެ މުސާރަ ލިބޭ މުވައްޒަފުންގެ ތެރެއިން ވަކި ބަޔަކު އިސްތިސްނާވާ ގޮތަށް ނޫން ކަމަށް ފަނޑިޔާރުން ވިދާޅުވި އެވެ.
ދައުލަތުގެ މުވައްޒަފުން ގާނޫނުލްއުގޫބާތުގައި މާނަކޮށްފައިވާއިރު، އެ މާނައިގެ އިބާރާތުގައި މުވައްޒަފުންގެ ގިންތިތައް ޖުމްލަކޮށް ބަޔާންކޮށްފައި އޮތުމުންނާއި ދެ ޖުމްލަ ނިމެނޭ ތަނުގައި "ހިމެނޭ ގޮތަށެވެ" އާއި "މީހުން ވެސް ހިމެނޭ" މިހެން އޮތުމުން ވެސް، ގާނޫނުގެ މަގްސަދަކީ ސަރުކާރުގެ ވަކި މުވައްޒަފުންތަކެއް އެއިން އިސްތިސްނާ ކުރުން ނޫން ކަމަށް ހުކުމުގައި ބުނެފައިވެ އެވެ.
ހުކުމުގައި ވަނީ ދައުލަތުގެ މުވައްޒަފުންގެ ތެރޭގައި ގާނޫނުން އުފައްދާ އެކި މުއައްސަސާތަކާއި ދައުލަތުގެ ކުންފުނިތައް ވެސް ހިމެނިގެންދާނެ ކަމަށެވެ. އަދި އެއީ ދައުލަތުގެ އަސާސީ މަގުސަދެއް އަދާ ކުރުމަށް އުފައްދާފައިވާ ތަންތަނުގެ މުވައްޒަފުން ކަމަށް ބެލެވޭނެ ކަމަށް ވެ އެވެ.
ދައުލަތުގެ ކުންފުނިތަކުގެ މުވައްޒަފުން ދައުލަތުގެ މުވައްޒަފުންގެ ތެރޭގައި ނުހިމަނާ ނަމަ އެއް ކުށެއްގައި އެއް ބަޔަކަށް ލުއިތަކެއް ލިބިފައި އަނެއް ބަޔަކަށް ބުރަވެދާނެކަން ވެސް ހުކުމުގައި ފާހަގަކޮށްފައިވެ އެވެ. އެގޮތުން ދިފާއުވުމާއި އަދަބު ކަނޑައެޅުމުގައި ވެސް ތަފާތު ހުންނާނެކަން ފާހަގަކުރި އެވެ.
"... ނަތީޖާއަކަށް ވެގެންދާނީ ދައުލަތުގެ ތިން ބާރާއި މިނިވަން މުއައްސަސާތަކުގެ މީހުން ހިންގާ މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދުމާއި ހޯދައިދިނުމުގެ އަމަލުތަކަށް ލުއި އަދަބު ލިބިގެންދާއިރު، ދައުލަތުގެ ކުންފުނިތަކުގެ މުވައްޒަފުންނަށް އެފަދަ ކުށްތަކާ ގުޅިގެން ބުރަ އަދަބެއް ލިބިގެންދިޔުން،" ހުކުމުގައިވެ އެވެ.
ސުޕްރީމް ކޯޓުން ނިންމީ ދައުލަތުގެ މުވައްޒަފުންގެ މާނައިގެ ތެރޭގައި ސަރުކާރު ކުންފުނިތަކުގެ މުވައްޒަފުން ނުހިމެނޭ ކަމަށް ހައި ކޯޓުން ނިންމީ ގޯސްކޮށް ކަމަށެވެ. އޭގެ އިތުރުން، ގާނޫނުލްއުގޫބާތުގެ ދަށުން އެ މައްސަލައިގައި އަލުން ޝިފާއުގެ މައްޗަށް ދައުވާ ކުރުމަށް ހުރަހެއް ނެތް ކަމަށް ވެސް ސުޕްރީމް ކޯޓުން ނިންމި އެވެ.
ފަނޑިޔާރު މަހާޒު އަލީ ޒާހިރު ރިޔާސަތު ބެލެހެއްޓެވި މި މައްސަލައިގައި އޭނާގެ ރައުޔަށް ދެން ތިއްބެވި ދެ ފަނޑިޔާރުން ހުސްނުއްސުއޫދާއި ޑރ. އަޒްމިރަލްދާ ޒާހިރު ތާއީދުކުރެއްވި އެވެ.
ޝިފާއުގެ މައްޗަށް މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާއެއް ހޯދައިދިނުުމުގެ ދައުވާ ކުރީ ޑިސެމްބަރު، 2017، ގައި އޭނާ ވެމްކޯގެ އެމްޑީއަކަށް ހުންނެވި އިރު އެ ކުންފުންޏަށް އާ ޑަމްޕް ޓްރަކެއް ގެނައުމަށް އޭނާއާ ވިޔަފާރީގެ ގުޅުން އޮންނަ މީހަކާއެކު އެއްބަސްވުމެއް ހެދި ކަމުގެ ތުހުމަތުގަ އެވެ.
ދައުލަތުން ބުނާ ގޮތުގައި ޝިފާއުއާ ގުޅުން އޮންނަ ފަރާތަކުން އޭނާ ވެމްކޯއަށް ހޯދީ އެނގި ހުރެ ބާ ޓްރަކެކެވެ. އަދި ވެމްކޯއަށް އެ ވެހިކަލް ވިއްކީ ނުއަގުގައި ކަމަށް ވެސް ދައުލަތުން ބުނެ އެވެ.
