މިދިޔަ މަހުގެ ބިލު ސްޓެލްކޯއިން ތައްޔާރުކޮށްފައި ވަނީ ކަސްޓަމަރުންގެ މީޓަރުން ރީޑިން ނުނަގައި ކަމަށް ބުނެ ބައެއް ފަރާތްތަކުން ފަތުރަމުންދާ ހަބަރުތައް އެ ކުންފުނިން ދޮގުކޮށްފި އެވެ.
މެއި 1, 2023 ގައި "ދިޔަރެސް" ނޫހުގައި ވަނީ ސްޓެލްކޯއިން މީޓަރު ރީޑިން ނެގުމަކާ ނުލައި ކަރަންޓު ބިލުތައް ބޮޑުކޮށްފައިވާ ކަމަށް ތުހުމަތުކޮށް ހަބަރެއް ޝާއިއުކޮށްފަ އެވެ. މިއަދު ސްޓެލްކޯއިން ނެރުނު ބަޔާނެއްގައި އެ ތުހުމަތުތައް ސިފަކުރީ "އެއްވެސް އަސާސެއް ނެތް, ދޮގު ތުހުމަތުތަކެއްގެ" ގޮތުގަ އެވެ.
"ދިޔަރެސް ނޫހުން ޝާއިއުކޮށްފައިވާ މި ހަބަރަކީ އެއްވެސް އަސާސެއް ނެތް، ހަގީގަތާ ހިލާފު، ދޮގު މައުލޫމާތު ހިމަނައިގެން މި ކުންފުންޏާ މެދު ރައްޔިތުންގެ މެދުގައި ނުތަނަވަސްކަން އުފައްދައި، ސިޔާސީ މަންފާއެއް ހޯދުމަށް ލިޔެފައިވާ ހަބަރެއްކަމަށް ފާހަގަކުރެވެ," ސްޓެލްކޯއިން މިއަދު ނެރުނު ބަޔާނެއްގައި ބުނެފައިވެ އެވެ.
އަދި, އެ ކުންފުނިން ކަރަންޓު ބިލު އަބަދުވެސް ތައްޔާރު ކުރަނީ މީޓަރުގެ ރީޑިންގެ މައްޗަށް ކަމަށާއި މީޓަރުގެ ރީޑިން ހުންނާނީ ކަސްޓަމަރުން ކަރަންޓު ބޭނުން ކުރާ މިންވަރަށް ކަމަށް ވެސް އެ ކުންފުނިން ބުންޏެވެ.
އަދި, މޯބައިލް އެޕްލިކޭޝަން މެދުވެރިކޮށް ކަރަންޓު ބިލުގެ ޖުމުލަ އަދަދު ކަސްޓަމަރުންނަށް ހިސާބު ކުރެވޭނެ ކަމަށާއި އޭގެ އިތުރުން ކަސްޓަމަރުންނަށް ކަރަންޓު ބޭނުންކުރައްވާ މިންވަރު (ރީޑިން) ފެންނަން ހުންނާނެ ކަމަށް ވެސް ސްޓެލްކޯއިން ބުނެ އެވެ.
"ކޮވިޑް-19ގެ ހާއްސަ ހާލަތުގައި ކަރަންޓު ރީޑިން ނެގުމަށް އަމަލުކުރި އުސޫލަށް މިހާރުވެސް ރީޑިން ނަގާ ކަމަށް މި ހަބަރުގައި ބަޔާންކޮށްފައި އޮތް އޮތުމަކީ ކަމުގެ ހަގީގަތަށް ވާސިލުވުމަށް އެއްވެސް މަސައްކަތެއް ނުކޮށް ރައްޔިތުންނަށް އޮޅުވާލުމަށް ގަސްދުގައި ކޮށްފައިވާ ކަމެއް," ސްޓެލްކޯއިން ބުނެފައިވެ އެވެ/
މިއަހަރުވެސް ހޫނު މޫސުމާ ގުޅިގެން، އާންމުން ހޭލުންތެރި ކުރުވުމަށް، ނޫސްވެރިންނަށް ހާއްސަކޮށްގެން ވެސް މައުލޫމާތު ފޯރުކޮށްދިން ކަމަށް އެ ކުންފުނިން ބުންޏެވެ.
"ރައްޔިތުންނަށް ފޯރުކޮށްދޭ އަސާސީ ހިދުމަތަކާއި ގުޅުވައި ކަނޑައެޅިގެން ދޮގު ވާހަކަ ފަތުރައި، ނުތަނަވަސްކަން އުފެއްދުމަކީ މިކުންފުނިން ބަލައިގަންނާނެ ކަމެއް ނޫން," ސްޓެލްކޯގެ ބަޔާނުގައި ބުނެފައިވެ އެވެ.
